મુંબઈ: પ્રેમમાં મળેલા ધોખા અને બ્રેકઅપ બાદ બદલાની ભાવનાનો એક અનોખો અને ચોંકાવનારો કિસ્સો મહારાષ્ટ્રમાંથી સામે આવ્યો છે. મહારાષ્ટ્ર પબ્લિક સર્વિસ કમિશન (MPSC) ના ડ્રગ ઈન્સ્પેક્ટર (ગ્રુપ-બી) પરીક્ષાના પરિણામ બાદ ગર્લફ્રેન્ડે સગાઈ કરવાની ના પાડીને બ્રેકઅપ કરી લેતાં, અકળાયેલા બોયફ્રેન્ડે ૫ લાખ રૂપિયાના પેપર લીક કૌભાંડનો પર્દાફાશ કરી દીધો છે. આ કેસના કારણે સમગ્ર ભરતી પ્રક્રિયા રદ કરવાની ફરજ પડી છે અને MPSCના ત્રણ વરિષ્ઠ અધિકારીઓ સહિત ૬ લોકોની ધરપકડ કરવામાં આવી છે.
શું હતો સમગ્ર પ્રેમ અને દગાનો ખેલ?
મહત્વકાંક્ષી ઉમેદવાર ઋતુજા પાટીલ (Rutuja Patil) અને તેનો પ્રેમી લોકેશ ઉર્ફે ગૌરવ રાજશ્રી પાટીલ (Gaurav Patil) વચ્ચે લાંબા સમયથી પ્રેમ સંબંધ હતો. મીડિયા રિપોર્ટ અનુસાર ઋતુજાએ ૨૨ માર્ચે યોજાયેલી ડ્રગ ઈન્સ્પેક્ટરની પરીક્ષા આપી હતી. ૨૨ જુલાઈએ જાહેર થયેલા પરિણામમાં તે પાસ થઈ ગઈ. પરીક્ષા પાસ કર્યા બાદ તેના પરિવારે લગ્ન માટે ના પાડી દેતાં ઋતુજાએ ગૌરવને અવગણવાનું શરૂ કર્યું અને આખરે તેની સાથે બ્રેકઅપ કરી લીધું. ગર્લફ્રેન્ડે દગો આપતાં જ ગુસ્સામાં આવેલા ગૌરવે MPSC કમિશનને ઈમેઈલ કરીને ઋતુજા અને તેના પરિવારે ૫ લાખ રૂપિયા આપીને પેપર લીક કરાવ્યું હોવાના તમામ પુરાવા સોંપી દીધા.
૫ લાખ રૂપિયામાં કેવી રીતે લીક થયું MPSCનું પેપર?
પોલીસ તપાસમાં બહાર આવેલી વિગતો અનુસાર, આ કૌભાંડમાં સરકારી અધિકારીઓથી લઈને કોચિંગ ક્લાસ સુધીની આખી સાંકળ જોડાયેલી હતી:
| કૌભાંડનું સ્ટેપ | સામેલ વ્યક્તિ / સંસ્થા | કામગીરી |
| ૧. પેપરની ચોરી | વિશ્વેશ્વર નાકટે (સહાયક વિભાગીય અધિકારી) | MPSC ઑફિસમાંથી પ્રશ્નપત્ર મેળવ્યું |
| ૨. અધિકારીઓની મિલીભગત | અભિજીત લેંડવે (અંડર સેક્રેટરી) અને ગોપાલ મરાઠે | પેપર આગળ પહોંચાડ્યું |
| ૩. કોચિંગ ઈન્સ્ટિટ્યૂટ | પ્રવીણ પાટીલ (કૌટિલ્ય કોચિંગ ક્લાસ) | અધિકારીઓ પાસેથી પેપર મેળવ્યું |
| ૪. પેપરની ખરીદી | અમૃત નામદેવ પાટીલ (ઋતુજાના પિતા) | પ્રવીણ પાટીલને ₹૫ લાખ આપી પેપર ખરીદ્યું |
પરીક્ષાના બે દિવસ પહેલા (૨૦ માર્ચે) જ આ પ્રશ્નપત્ર ઋતુજા સુધી પહોંચી ગયું હતું. ૨૯૪ પ્રશ્નોમાંથી ૭૭ પ્રશ્નો લીક થયેલા સેટ સાથે આબેહૂબ મેચ થતા હતા.
કમ્પ્લેઈન પાછી ખેંચી પણ તંત્ર એક્શનમાં આવી ગયું
આશ્ચર્યજનક વાત એ છે કે, ઈમેઈલ કર્યા બાદ ગૌરવે પોતાની ફરિયાદ પાછી ખેંચવાનો પ્રયાસ પણ કર્યો હતો. જોકે, ત્યાં સુધીમાં પોલીસે તપાસ તેજ કરી દીધી હતી. પોલીસે આ સમગ્ર કૌભાંડમાં સામેલ ૩ MPSC અધિકારીઓ સહિત કુલ ૬ લોકોની ધડપકડ કરી જેલ હવાલે કર્યા છે. કમિશન દ્વારા ડ્રગ ઈન્સ્પેક્ટરની આખી ભરતી પ્રક્રિયા રદ કરી દેવામાં આવી છે. સોશિયલ મીડિયા પર આ કિસ્સો ભારે ચર્ચાનો વિષય બન્યો છે.
