વિજયનગર પોળો ફોરેસ્ટ ખાતે વણજ ડેમમાં પાણીનો પ્રવાહ અચાનક વધી જતાં ફસાયેલા છ યુવકોને વિજયનગર પોલીસે સહીસલામત રીતે બચાવી લીધા હતા. સાબરકાંઠા પોલીસ દ્વારા આ ઓપરેશનની માહિતી આપવામાં આવી હતી.
આ ઘટના આજે સવારે 6 વાગ્યા આસપાસ બની, જ્યારે ઇન્ટરનશિપ કરી રહેલા યુવકોનો એક ગ્રુપ પોળો ફોરેસ્ટ ફરવા માટે નીકળ્યો હતો. સવારના સમયે ડેમમાં પાણીનો પ્રવાહ ઓછો હોવાથી તેઓ ફોરેસ્ટની અંદર પ્રવેશ્યા હતા. પરંતુ, સવારે 10 થી 10:30 વાગ્યાની આસપાસ ઉપરવાસમાં ભારે વરસાદ થવાથી વણજ ડેમમાં પાણીનો પ્રવાહ અચાનક વધી ગયો. આ કારણે તેઓ ડેમના બીજી તરફ ફસાઈ ગયા અને પાછા આવી શકે તેવી પરિસ્થિતિ ન રહી.
વિજયનગર પોળો ફોરેસ્ટ ખાતેવણજ ડેમમાં પાણીનો પ્રવાહ વધવાથી ફસાઈ ગયેલ ૬ છોકરાઓને સહી સલામત રીતે રેસ્ક્યુ કરી પાછા લાવતી વિજયનગર પોલીસ.@CMOGuj @sanghaviharsh @dgpgujarat @GujaratPolice @DIGPGnrRange #SabarkanthaPolice#GujaratPolice#VijaynagarPolo#PoloForest pic.twitter.com/JbbwIa9j66— Superintendent Of Police (SP) (@SPSabarkantha) September 7, 2025
વિજયનગર પોલીસ સ્ટેશનના પેટ્રોલિંગ દરમિયાન, પોલીસ અધિકારીઓએ આ યુવકોને જોયા. યુવકોને આશ્વાસન આપ્યા બાદ, પોલીસે વન વિભાગના કર્મચારીઓની મદદ લીધી. તેઓએ બીજી તરફથી ડુંગર ઓળંગીને યુવકો પાસે પહોંચીને તેમને રેસ્ક્યુ કર્યા.
પોલીસની આ સમયસર અને હિંમતભરી કાર્યવાહીથી છ યુવકોનો જીવ બચી ગયો. યુવકોએ પોલીસ અને વન વિભાગના કર્મચારીઓનો ખૂબ ખૂબ આભાર માન્યો હતો. આ ઘટના પરથી સ્પષ્ટ થાય છે કે ચોમાસા દરમિયાન નદી કે ડેમ વિસ્તારોમાં ફરવા જતી વખતે સાવચેતી રાખવી અત્યંત જરૂરી છે.
