ગીર, ગુજરાત: ગીરના જંગલ પર રાજ કરનાર અને જેમની અતૂટ મિત્રતાની વાર્તાઓ આજે પણ વન્યજીવ પ્રેમીઓની જીભ પર છે, તેવા સિંહબંધુ ‘જય’ અને ‘વીરૂ’ની જોડીને એક વિશિષ્ટ સંગીતમય શ્રદ્ધાંજલિ અર્પણ કરવામાં આવી રહી છે. પરિમલ નથવાણી પ્રસ્તુત અને જાણીતા લોકગાયક આદિત્ય ગઢવીના દમદાર કંઠે ‘જય-વીરૂની જોડી’ શીર્ષક હેઠળનું આ મ્યુઝિકલ ટ્રિબ્યુટ ૭ ઓગસ્ટે રિલીઝ થશે.
બે સિંહ – એક જીવ: ગીરની દંતકથા
જય અને વીરૂની જોડી ગીરના જંગલના ઇતિહાસમાં સુવર્ણ અક્ષરે લખાયેલી છે. ‘શોલે’ ફિલ્મના જય અને વીરૂની જેમ, આ બે સિંહોની મિત્રતા પણ અતૂટ હતી. તેઓ હંમેશા સાથે રહેતા, શિકાર કરતા અને પોતાના શક્તિશાળી વર્ચસ્વથી જંગલ પર રાજ કરતા હતા. તેમની આ અનોખી મિત્રતા અને નિર્ભયતાએ તેમને પ્રવાસીઓ અને વન્યજીવ પ્રેમીઓમાં અત્યંત લોકપ્રિય બનાવ્યા હતા. ગીરની મુલાકાત લેનાર દરેક વ્યક્તિ આ જોડીને એકવાર જોવાની ઈચ્છા રાખતી.
જોકે, કુદરતના નિયમ મુજબ, તાજેતરમાં એક પછી એક બંને સિંહોએ દુનિયાને અલવિદા કહ્યું. તેમના મૃત્યુએ માત્ર ગીરના જંગલમાં જ નહીં, પરંતુ સમગ્ર ગુજરાત અને દેશના વન્યજીવ પ્રેમીઓમાં ઊંડા શોકની લાગણી ફેલાવી હતી.
બે સિંહ – એક જીવ ?
સાહસ અને સખાપ્રેમનું એવું સ્વરૂપ કે જે મર્યા પછી આજે પણ ગીરની કંદરાઓમાં અમર છે..
બે સિંહ ભાઈઓની જોડીને મળી રહેલ સંગીતમય શ્રદ્ધાંજલી એટલે ‘જય-વીરૂની જોડી’
ભાઈ @AdityaGadhvi03 ની દહાડ.. જલ્દી જ.. @mpparimal #Gujarat pic.twitter.com/P9NJtVQRO1— Sagar Patoliya (@kathiyawadiii) August 6, 2025
સંગીતના માધ્યમથી શ્રદ્ધાંજલિ
આ બે સિંહબંધુઓની અમર ગાથાને સંગીત દ્વારા જીવંત રાખવાનો પ્રયાસ પરિમલ નથવાણી દ્વારા કરવામાં આવ્યો છે. આ પ્રોજેક્ટ માટે ગુજરાતના લોકપ્રિય ગાયક આદિત્ય ગઢવીની પસંદગી કરવામાં આવી છે. આદિત્ય ગઢવીનો શક્તિશાળી અને લાગણીસભર અવાજ જય અને વીરૂની વાર્તાને દર્શકોના દિલ સુધી પહોંચાડશે તેવી આશા છે.
