હવે સડકો પર ‘ડિજિટલ ક્રાંતિ’ : વિશ્વની સૌથી મોટી મોબિલિટી કોઓપરેટિવ બની ‘ભારત ટેક્સી’

ગાંધીનગર: સામાન્ય રીતે ભારતમાં જ્યારે પણ ‘સહકારિતા’ (Cooperative) શબ્દનો ઉલ્લેખ થાય છે, ત્યારે દરેક નાગરિકના મનમાં આણંદની અમૂલ ડેરીની દૂધ ક્રાંતિ આપોઆપ યાદ આવી જાય છે. પરંતુ હવે, ૨૦૨૬ના આધુનિક યુગમાં ગુજરાતની સડકો પર એક નવી અને અભૂતપૂર્વ ડિજિટલ ક્રાંતિ દોડી રહી છે, જેનું નામ છે ‘ભારત ટેક્સી’. આ માત્ર એક સામાન્ય ટેક્સી બુકિંગ એપ નથી, પરંતુ વડાપ્રધાન નરેન્દ્ર મોદીના ‘સહકારથી સમૃદ્ધિ’ના વિઝનને પાયાના સ્તરે સાકાર કરતી એક ક્રાંતિકારી પહેલ છે. આ મોડલની સૌથી મોટી વિશેષતા એ છે કે આમાં જોડાયેલા હજારો ડ્રાઇવરો હવે કોઈ કોર્પોરેટ કંપનીના બંધુઆ મજૂર કે કર્મચારી નથી, પરંતુ તેઓ પોતે આ પ્લેટફોર્મના વાસ્તવિક માલિકો (Sovereign Owners) છે. કેન્દ્રીય ગૃહ અને સહકારિતા મંત્રી અમિત શાહ દ્વારા ગત ૫ ફેબ્રુઆરીના રોજ લોન્ચ કરવામાં આવેલી આ અનોખી પહેલ આજે ટેક્નોલોજી અને માનવીય ગરિમાના સંગમનું વિશ્વનું સૌથી મોટું આદર્શ ઉદાહરણ બની ગઈ છે.

કમિશન પ્રથાની કાયમી બાદબાકી: ડ્રાઇવરોના પરિવારોમાં ખુશાલી

મોબિલિટી અને ઓનલાઇન કેબ ઇન્ડસ્ટ્રીમાં અત્યાર સુધી ખાનગી એગ્રીગેટર કંપનીઓ ડ્રાઇવરો પાસેથી ભારે કમિશન વસૂલતી હતી, જેના કારણે ડ્રાઇવરો આખો દિવસ વૈતરું કરવા છતાં અનિશ્ચિત આવક અને આર્થિક ભીંસમાં જીવતા હતા. ‘ભારત ટેક્સી’એ આ કમિશનખોરીના જૂના ખેલનો કાયમી અંત આણી દીધો છે. અહીં કોઈ વચેટિયા કે મલ્ટીનેશનલ કોર્પોરેટ નથી, કારણ કે ડ્રાઇવર્સ જ આ કોઓપરેટિવના મુખ્ય સ્ટેકહોલ્ડર્સ છે.

ભારત ટેક્સીના ચેરમેન અને અમૂલના એમડી જયેન મહેતાએ આ અંગે વિગતો આપતા જણાવ્યું હતું કે, “ભારત ટેક્સીએ ડ્રાઇવર-ઓન્ડ મોડલને જમીની સ્તરે વાસ્તવિકતા બનાવીને એ સુનિશ્ચિત કર્યું છે કે, રાઇડની ૧૦૦% કમાણી કોઈપણ પ્રકારની વહીવટી કપાત વિના સીધી જ ડ્રાઇવરોના બેંક ખાતા સુધી પહોંચે. આજે તે દુનિયાની સૌથી મોટી મોબિલિટી કોઓપરેટિવ તરીકે ઊભરી આવી છે.” આ પ્લેટફોર્મ સાથે જોડાયા પછી, સામાન્ય ડ્રાઇવરોની માસિક આવકમાં ૨૫% થી ૩૦% સુધીનો સીધો ધરખમ વધારો નોંધાયો છે.

મુસાફરોને ડાયનેમિક પ્રાઇસિંગમાંથી મુક્તિ: ભાડામાં ૧૫%ની સીધી બચત

ભારત ટેક્સી માત્ર ડ્રાઇવરોનું શોષણ અટકાવવા સુધી સીમિત નથી, પરંતુ તેણે સામાન્ય પેસેન્જરોના ગજવાને પણ મોટી રાહત આપી છે. ખાનગી ઓલા-ઉબેર જેવી કેબ એપ્સમાં વરસાદ કે પીક-અવર્સ દરમિયાન ‘ડાયનેમિક પ્રાઇસિંગ’ અથવા ‘સરચાર્જ’ના નામે બેફામ ભાડું વસૂલવામાં આવે છે. તેની સામે ભારત ટેક્સીએ પોતાનું ભાડાનું માળખું સંપૂર્ણપણે સ્થિર, ન્યાયી અને પારદર્શક રાખ્યું છે. આના કારણે મુસાફરોને સરેરાશ ૧૫% ઓછું ભાડું ચૂકવવું પડે છે. સામાન્ય રીતે અન્ય ખાનગી કંપનીઓ જ્યાં પ્રતિ કિલોમીટર રૂપિયા ૩૦ સુધીનું ભાડું વસૂલે છે, ત્યાં ભારત ટેક્સીના ચાલકો ગ્રાહકો પાસેથી માત્ર રૂપિયા ૧૭ થી ૧૮ જેટલું વ્યાજબી ભાડું લે છે. આ એક પ્યોર ‘વિન-વિન’ (બંને પક્ષે ફાયદો) મોડલ સાબિત થયું છે.

૩૫ લાખથી વધુ યુઝર્સનું વિશાળ નેટવર્ક, હવે વડોદરા સર કરવા તૈયારી

આજે આ આંદોલન માત્ર ગુજરાત પૂરતું સીમિત નથી રહ્યું. ગુજરાતમાં ૧ લાખ વાહનો સહિત દેશભરમાં ૬ લાખથી વધુ ડ્રાઇવરો અને ૩૫ લાખથી વધુ ગ્રાહકોના વિશાળ નેટવર્ક સાથે ભારત ટેક્સી રાષ્ટ્રીય સ્તરે ધૂમ મચાવી રહી છે. અમદાવાદ અને સુરત જેવા મેગા સિટીઝમાં અકલ્પનીય સફળતા મેળવ્યા બાદ, હવે ‘સંસ્કારી નગરી’ વડોદરા આ સેવાના વિસ્તરણનું આગામી મુખ્ય કેન્દ્ર બનવા જઈ રહ્યું છે. વડોદરાના નાગરિકો સાથે સીધા જોડાવા માટે કંપની આઈટી પાર્ક, મોટી હાઉસિંગ સોસાયટીઓ અને એરપોર્ટ જેવા હાઈ-ટ્રાફિક વિસ્તારોમાં ‘બિલો ધ લાઇન’ (BTL) માર્કેટિંગ વ્યૂહરચના અપનાવી રહી છે. અમદાવાદ રિક્ષા ચાલક એકતા યુનિયનના પ્રેસિડેન્ટ અજય કુમાર ગુપ્તાએ પણ તમામ ચાલકોને આ ‘આપણા ભારતની સ્વદેશી કંપની’ સાથે જોડાવા અપીલ કરી છે, જેમાં ડોક્યુમેન્ટ સબમિટ કર્યાના માત્ર ૧૨ જ કલાકમાં આસાન મંજૂરી મળી જાય છે.

ગુજરાત પોલીસનું ‘સુરક્ષા કવચ’ અને અદ્યતન ટેક્નોલોજી

મુસાફરો અને ખાસ કરીને મહિલાઓની સુરક્ષાને સર્વોચ્ચ પ્રાધાન્ય આપતા ભારત ટેક્સીએ એપ્લિકેશનમાં ગુજરાત પોલીસ સાથે સીધું SOS ઇન્ટિગ્રેશન (સેફ્ટી સિસ્ટમ) કર્યું છે, જે કોઈપણ કટોકટીમાં રક્ષણ પૂરું પાડે છે. આ ઉપરાંત, સેવાઓમાં વ્યાવસાયિકતા જાળવી રાખવા માટે અત્યાર સુધી ૧૦,૦૦૦થી વધુ ડ્રાઇવરોને સ્પેશિયલ સોફ્ટ સ્કિલ્સ, કસ્ટમર કેર અને ડિજિટલ હેન્ડલિંગની વ્યાવસાયિક ટ્રેનિંગ આપવામાં આવી છે.

યાત્રિકોની સુવિધા માટે સોમનાથ અને દ્વારકા જેવા જગપ્રસિદ્ધ પવિત્ર યાત્રાધામો માટે ખાસ સમર્પિત રૂટ કનેક્ટિવિટી શરૂ કરાઈ છે. એટલું જ નહીં, મેટ્રો રેલ, GSRTC એસ.ટી. બસો અને એરપોર્ટ ઓથોરિટી સાથે સાંકળેલી તેની ‘ઇન્ટિગ્રેટેડ ટ્રાન્ઝિટ સિસ્ટમ’ને લીધે હવે મુસાફરો એક જગ્યાએથી બીજી જગ્યાએ કોઈપણ અડચણ વિના ખૂબ જ સરળતાથી મુસાફરી કરી શકશે.