નડિયાદ: ૨ એપ્રિલ ૨૦૨૬ના રોજ ખેડા જિલ્લા ચૂંટણી અધિકારી અને કલેક્ટર અમિતપ્રકાશ યાદવે સ્થાનિક સ્વરાજની સંસ્થાઓની ચૂંટણી અંગે પત્રકાર પરિષદ યોજી વિગતો આપી હતી. ખેડા જિલ્લામાં જિલ્લા પંચાયત, નડિયાદ મહાનગરપાલિકા, તાલુકા પંચાયતો અને નગરપાલિકાઓની કુલ બેઠકો પર યોજાનાર સામાન્ય અને પેટા ચૂંટણીઓને લઈને વહીવટી તંત્ર સંપૂર્ણપણે સજ્જ છે.
બેઠકોનું સમીકરણ: ક્યાં કેટલી ચૂંટણી?
જિલ્લા ચૂંટણી અધિકારીના જણાવ્યા મુજબ જિલ્લામાં નીચે મુજબની બેઠકો પર જંગ જામશે:
- ખેડા જિલ્લા પંચાયત: કુલ 42 બેઠકો માટે સામાન્ય ચૂંટણી.
- નડિયાદ મહાનગરપાલિકા: કુલ 13 વોર્ડની 52 બેઠકો માટે પ્રથમવાર સામાન્ય ચૂંટણી.
- તાલુકા પંચાયત (9): નડિયાદ, માતર, ખેડા, મહેમદાવાદ, મહુધા, ઠાસરા, વસો, ગળતેશ્વર અને ફાગવેલની કુલ 176 બેઠકો.
- નગરપાલિકા (4): કપડવંજ, કણજરી, કઠલાલ અને ઠાસરાની કુલ 25 વોર્ડની 100 બેઠકો.
- પેટા ચૂંટણી: મહેમદાવાદ (વોર્ડ 1 અને 5) તથા મહુધા (વોર્ડ 5) ની બેઠકો પર પેટા ચૂંટણી યોજાશે.
મતદારોનું સંખ્યાબળ: 14 લાખથી વધુ નાગરિકો કરશે મતદાન
ખેડા જિલ્લાના મતદારોના આંકડા જોઈએ તો લોકશાહીના આ પર્વમાં નાગરિકોનો ઉત્સાહ જોવા મળી રહ્યો છે:
- જિલ્લા પંચાયત: કુલ 11,97,555 મતદારો (6.15 લાખ પુરુષ અને 5.82 લાખ સ્ત્રી).
- નડિયાદ મનપા: કુલ 1,96,162 મતદારો.
- નગરપાલિકાઓ: કુલ 78,568 મતદારો.
મતદાન મથકો અને વ્યવસ્થા
ચૂંટણી પ્રક્રિયાને પારદર્શક બનાવવા માટે તમામ મતદાન ઈવીએમ (EVM) દ્વારા કરવામાં આવશે. જિલ્લામાં કુલ મતદાન મથકોની વ્યવસ્થા નીચે મુજબ છે:
- જિલ્લા પંચાયત માટે 1,468 મથકો.
- નડિયાદ મહાનગરપાલિકા માટે 217 મથકો.
- નગરપાલિકાઓ માટે 88 મથકો.
જિલ્લા ચૂંટણી અધિકારી અમિતપ્રકાશ યાદવે અપીલ કરી છે કે આ ચૂંટણી પ્રક્રિયા લોકાભિમુખ અને શાંતિપૂર્ણ વાતાવરણમાં પૂર્ણ થાય તે માટે તમામ પક્ષો અને નાગરિકો વહીવટી તંત્રને સહકાર આપે. આચારસંહિતાના ચુસ્ત પાલન સાથે જિલ્લામાં લોકશાહીનો આ જંગ ખેલાશે.
