ગરમી સહન શક્તિ બહાર! ફ્રાન્સમાં હીટવેવના કારણે બદલાયો રિયલ્ટી ટ્રેન્ડ, ઘર ખરીદનારાઓ માટે ‘ક્લાઇમેટ કમ્ફર્ટ’ બન્યું પ્રાથમિકતા

પેરિસ (ફ્રાન્સ): યુરોપમાં સતત વધી રહેલું વૈશ્વિક તાપમાન અને ઉનાળામાં આવતા તીવ્ર હીટવેવ (Heatwaves) હવે માત્ર પર્યાવરણ પૂરતા મર્યાદિત નથી રહ્યા, પરંતુ તે ફ્રાન્સના રિયલ એસ્ટેટ માર્કેટને પણ સંપૂર્ણપણે બદલી રહ્યા છે. ફ્રાન્સમાં ઘર કે એપાર્ટમેન્ટ ખરીદનારા અને ભાડે રાખનારા લોકો માટે હવે ઘરના લોકેશન કે કિંમત જેટલું જ મહત્ત્વ ‘હીટ રેઝિસ્ટન્સ’ (ગરમી સામે રક્ષણ) નું થઈ ગયું છે. લોકો હવે એવા ઘરોની પસંદગી કરી રહ્યા છે જ્યાં ઉનાળાના આકરા તાપમાં પણ શાંતિથી રહી શકાય. રિયલ એસ્ટેટ નિષ્ણાતોના જણાવ્યા અનુસાર, હવે લોકો ઘર પસંદ કરતી વખતે શટર્સ (બારીના પડદા-કવર), એર કન્ડીશનીંગ અને સીધા સૂર્યપ્રકાશથી બચાવતી રચનાઓ ધરાવતા મકાનોને પ્રથમ પસંદગી આપી રહ્યા છે.

પેરિસના ઝિંક છત વાળા ઐતિહાસિક ઘરો બન્યા ‘હીટ ટ્રેપ’

ફ્રાન્સની રાજધાની પેરિસમાં પ્રખ્યાત ઓસ્માન (Haussmann) શૈલીની ઇમારતોના ટોપ ફ્લોર પર આવેલા એપાર્ટમેન્ટ્સની ધાતુ (ઝિંક) ની બનેલી છત ઉનાળામાં ભઠ્ઠીની જેમ તપે છે. પેરિસના રિયલ એસ્ટેટ એજન્ટ જણાવે છે કે, આ ઉપલા માળના ઘરોમાં ઉનાળામાં ઇન્ડોર હીટ એટલી વધી જાય છે કે ત્યાં રહેવું અસહ્ય બની જાય છે. પરિણામે, ખરીદદારો હવે દક્ષિણ દિશા તરફ મુખ ધરાવતા (South-facing) ઘરો અને ક્રોસ-વેન્ટિલેશન (હવાની અવરજવર) ન હોય તેવા એપાર્ટમેન્ટ્સ ખરીદતા અચકાઈ રહ્યા છે. પેરિસના ૩૦ વર્ષીય બાયર કેમિલ કુટુરિયરે જણાવ્યું હતું કે, હવે મે અને જૂન મહિનાથી જ હીટવેવ શરૂ થઈ જાય છે. આગામી ૧૦ થી ૧૫ વર્ષ સુધી આ ઘરમાં રહેવાનું હોવાથી, ગરમીના કારણે ઘર છોડીને ભાગવું પડે તેવો સ્ટુડિયો કોઈ ખરીદવા માંગતું નથી.

૮૦% લોકો આકરા તાપથી પરેશાન, ૩૩% લોકો ટ્રાન્સફર થવા તૈયાર

આંકડાકીય સર્વેક્ષણોમાં ફ્રાન્સની આ ગંભીર સ્થિતિ સામે આવી છે:

• ૫૦% ઘરો બન્યા ટ્રેપ: પૂગેટ કન્સલ્ટન્ટ્સ અને IGNEs ના સંશોધન મુજબ, ફ્રાન્સના લગભગ અડધોઅડધ ઘરો ઉનાળામાં ‘હીટ ટ્રેપ’ (ગરમી રોકી રાખતા ઘરો) તરીકે કામ કરે છે.
• ૮૦% લોકોએ અનુભવી અગવડતા: ક્લાસિફાઇડ પ્લેટફોર્મ Leboncoin ના ૧,૭૫૦ લોકો પર કરાયેલા સર્વેમાં ૮૦% યુઝર્સે સ્વીકાર્યું કે તેઓ અતિશય ગરમીથી અસ્વસ્થતા અનુભવે છે.
• સ્થળાંતરની તૈયારી: સર્વેમાં ભાગ લેનારા એક તૃતીયાંશ (૩૩%) લોકોએ જણાવ્યું કે જો હીટવેવની તીવ્રતા વધશે તો તેઓ અન્ય સ્થળે શિફ્ટ થવાનું વિચારશે.

બાયર્સના પ્રશ્નો બદલાયા: હવે ‘દિશા અને ઝાડ-પાન’ અંગે થાય છે પૂછપરછ

રિયલ એસ્ટેટ નેટવર્ક લાફોરેટના યાન જેહાન્નોએ જણાવ્યું હતું કે, બાયર્સ હવે માત્ર ચોરસ ફૂટ નથી જોતા. તેઓ હવે ઘરની દિશા (Orientation), માળ (Floor level), શેડિંગ, આસપાસ ઝાડ-પાન છે કે નહીં અને રાત્રિ દરમિયાન હવાની અવરજવર કેવી રહે છે તેની પૂછપરછ કરે છે. કેટલાક એપાર્ટમેન્ટ્સ, જેમાં સામસામે બારીઓ (Cross-ventilation) નથી, તેને વેચવામાં એજન્ટોને ભારે મુશ્કેલી પડી રહી છે. જે દેશમાં અગાઉ એસી (Air Conditioning) લક્ઝરી ગણાતું હતું, ત્યાં હવે તે ઘરનું મુખ્ય સેલિંગ પોઇન્ટ બની ગયું છે.

દીર્ઘકાલીન હોમ લોન અને પ્લાનિંગ પર અસર

ફ્રાન્સની નેશનલ વેધર સર્વિસ અનુસાર, ગ્લોબલ વોર્મિંગના કારણે દેશમાં દર વર્ષે ઉનાળો વધુ ગરમ થવાની ધારણા છે. Leboncoin ના માર્કેટિંગ ડિરેક્ટર સોફી બોર્ગના મતે, ‘ક્લાઇમેટિક કમ્ફર્ટ’ (હવામાનલક્ષી અનુકૂળતા) હવે લોકો ઘર ક્યાં ખરીદવું તે નક્કી કરવામાં લોકેશન જેટલું જ મહત્વનું પરિબળ બની ગયું છે. આ બદલાતા ટ્રેન્ડ અને વાતાવરણના જોખમોના કારણે બેંકો અને ખરીદદારો માટે લાંબા ગાળાના હોમ લોન પ્લાનિંગ (Long-term mortgage planning) કરવું પણ મુશ્કેલ બની રહ્યું છે.