સંયુક્ત રાષ્ટ્ર મહાસભા (UNGA)ના ૮૦મા સત્રમાં અમેરિકી રાષ્ટ્રપતિ ડોનાલ્ડ ટ્રમ્પે એક સનસનાટીપૂર્ણ દાવો કર્યો છે. તેમણે જણાવ્યું કે, માત્ર સાત મહિનાના સમયગાળામાં તેમણે સાત ‘અનંત’ યુદ્ધોનો અંત લાવી દીધો છે, જેમાં પાકિસ્તાન અને ભારત વચ્ચેના સંઘર્ષનો પણ સમાવેશ થાય છે. તેમના આ દાવાઓએ આંતરરાષ્ટ્રીય સ્તરે ભારે ચર્ચા જગાવી છે.
પોતાના સંબોધનમાં ટ્રમ્પે કહ્યું કે, “માત્ર સાત મહિનાના સમયગાળામાં, મેં સાત અનંત યુદ્ધોનો અંત લાવ્યો છે. આમાં કંબોડિયા અને થાઈલેન્ડ, કોસોવો અને સર્બિયા, કોંગો અને રવાંડા, પાકિસ્તાન અને ભારત, ઈઝરાયેલ અને ઈરાન, ઈજિપ્ત અને ઇથોપિયા અને આર્મેનિયા અને અઝરબૈજાનનો સમાવેશ થાય છે.” તેમણે ભારપૂર્વક જણાવ્યું કે કોઈ પણ રાષ્ટ્રપતિ કે વડાપ્રધાને આટલો ટૂંકા ગાળામાં આટલી મોટી સિદ્ધિ હાંસલ કરી નથી.
ટ્રમ્પે સંયુક્ત રાષ્ટ્ર (UN) પર પણ આકરા પ્રહારો કર્યા હતા. તેમણે કહ્યું કે, “એક પણ કેસમાં સંયુક્ત રાષ્ટ્રએ મદદ કરવાનો પ્રયાસ પણ કર્યો નથી. મેં સાત યુદ્ધોનો અંત લાવ્યો, દરેક દેશના નેતાઓ સાથે કામ કર્યું, છતાં સંયુક્ત રાષ્ટ્ર તરફથી મને મદદ માટે એક પણ ફોન આવ્યો નથી.” ટ્રમ્પે UNના હેતુ પર જ સવાલ ઉઠાવતા કહ્યું કે UNમાં અપાર સંભાવનાઓ છે, પરંતુ તે તેનો લાભ ઉઠાવવામાં નિષ્ફળ રહ્યું છે.
ચીન અને ભારત યુક્રેનમાં ચાલી રહેલા યુદ્ધના ‘પ્રાથમિક ફંડર’ છે : Donald trump
ડોનાલ્ડ ટ્રમ્પનો UNGAમાં મોટો દાવો: ‘મેં ૭ યુદ્ધોનો અંત લાવ્યો’#DonaldTrump #UNGA #USA #India #ukrainewar #China #internationalrelations #pmmodi #latestnews pic.twitter.com/4lY9VxN94m— LokVani (@LVaniNews) September 23, 2025
આ સંબોધન દરમિયાન, ટ્રમ્પે બે વ્યક્તિગત ઘટનાઓનો પણ ઉલ્લેખ કર્યો. તેમણે જણાવ્યું કે UNમાં એસ્કેલેટર કામ કરતું નહોતું અને તેમનું ટેલિપ્રોમ્પ્ટર પણ બંધ હતું. તેમણે મજાકમાં કહ્યું કે, “જો ફર્સ્ટ લેડી ફિટ ન હોત તો તેઓ પડી ગયા હોત, પરંતુ અમે બંને ખૂબ જ સારી સ્થિતિમાં છીએ.”
સૌથી મોટો અને ચિંતાજનક દાવો કરતા ટ્રમ્પે કહ્યું કે ચીન અને ભારત યુક્રેનમાં ચાલી રહેલા યુદ્ધના ‘પ્રાથમિક ફંડર’ છે. તેમણે આ બંને દેશો પર યુક્રેન યુદ્ધને આર્થિક મદદ કરવાનો આરોપ લગાવ્યો, જેણે આંતરરાષ્ટ્રીય રાજકારણમાં નવા વિવાદને જન્મ આપ્યો છે. ટ્રમ્પના આ નિવેદનોએ તેમના સંબોધનને અત્યંત ચર્ચાસ્પદ અને વિવાદાસ્પદ બનાવ્યું છે.
