શ્રીનગર: જમ્મુ-કાશ્મીરના વિશ્વપ્રસિદ્ધ હિલ સ્ટેશન ગુલમર્ગમાંથી એક અત્યંત ચિંતાજનક અને મોટા સમાચાર સામે આવ્યા છે. ગુલમર્ગના પ્રખ્યાત ગંડોલા રોપવે (Gulmarg Gondola) માં અચાનક ટેકનિકલ ખામી સર્જાવાને કારણે આખી રોપવે સિસ્ટમ અધવચ્ચે જ થંભી ગઈ હતી. આ અકસ્માતને પગલે પ્રવાસીઓથી ભરેલી અંદાજે ૬૫ જેટલી કેબિનો (Ropeway Cabins) જમીનથી સેંકડો ફૂટ ઊંચે હવામાં અટવાઈ પડી હતી. પ્રાથમિક અહેવાલો મુજબ, આ નાની-મોટી કેબિનોની અંદર બાળકો, મહિલાઓ અને વૃદ્ધો સહિત અંદાજે ૩૦૦ જેટલા પ્રવાસીઓ ફસાયા હોવાની આશંકા છે, જેને કારણે પ્રવાસીઓમાં ભારે ગભરાટ અને અફરાતફરીનો માહોલ સર્જાયો હતો.
ભારતીય સેનાના ‘ચિનાર કોર્પ્સ’ એ સંભાળ્યો મોરચો
રોપવે હવામાં અટકી પડવાની અને લોકો ફસાયા હોવાની માહિતી મળતા જ સ્થાનિક વહીવટી તંત્ર, જમ્મુ-કાશ્મીર પોલીસ અને ભારતીય સેના (Indian Army) ના જવાનો તાત્કાલિક ઘટનાસ્થળે દોડી ગયા હતા. ભારતીય સેનાની પ્રખ્યાત #ChinarCorps ના ટ્રેન્ડ જવાનો અને ગુલમર્ગ ગંડોલાના ઓપરેટર્સે સંયુક્ત રીતે ટાંચા સાધનો અને ભારે પવન વચ્ચે યુદ્ધના ધોરણે વિરાટ રેસ્ક્યૂ ઓપરેશન હાથ ધર્યું છે. સેનાના જવાનો દોરડા અને આધુનિક રેસ્ક્યૂ કીટની મદદથી હવામાં લટકતી કેબિનો સુધી પહોંચીને લોકોને સુરક્ષિત નીચે ઉતારી રહ્યા છે.
ગળા સુધી શ્વાસ અટક્યા, બાળકો-વૃદ્ધો ગભરાઈને રડવા લાગ્યા
ભીષણ ઠંડી અને ઊંચાઈ પર ઓક્સિજનની અછત વચ્ચે કલાકો સુધી હવામાં લટકી રહેવાને કારણે અનેક પ્રવાસીઓની તબિયત લથડી હોવાના અહેવાલો છે. ખાસ કરીને કેબિનની અંદર રહેલા નાના બાળકો અને વૃદ્ધો ગભરાઈને રડવા લાગ્યા હતા. ઇન્ડિયન આર્મીએ સત્તાવાર સોશિયલ મીડિયા હેન્ડલ પરથી માહિતી આપતા જણાવ્યું છે કે, “કુલ ૬૫ કેબિનો હવામાં અટવાઈ હતી, જેમાંથી અત્યાર સુધીમાં અત્યંત ત્વરિત અને સુવ્યવસ્થિત કામગીરી કરીને ૧૬ કેબિનોમાંથી ૮૦ જેટલા પ્રવાસીઓને સુરક્ષિત બહાર કાઢી લેવામાં આવ્યા છે.”
બાકીના પ્રવાસીઓ માટે રેસ્ક્યૂ ઓપરેશન ચાલુ
હાલમાં પણ બાકીની કેબિનોમાં ફસાયેલા અંદાજે ૨૦૦ થી વધુ પ્રવાસીઓને બહાર કાઢવા માટે ઓપરેશન પૂરજોશમાં ચાલી રહ્યું છે. સેના અને સ્થાનિક ગંડોલા ઓપરેટર્સની ટીમો દરેક કેબિન સુધી પહોંચવાનો પ્રયાસ કરી રહી છે. આર્મીએ નાગરિકોને અફવાઓથી દૂર રહેવા અને લેટેસ્ટ અપડેટ્સ માટે જોડાયેલા રહેવા અપીલ કરી છે. ઉલ્લેખનીય છે કે ગુલમર્ગ ગંડોલા એ એશિયાના સૌથી ઊંચા રોપવે પૈકીનો એક છે, જ્યાં દરરોજ હજારો પ્રવાસીઓ બરફ આચ્છાદિત પહાડોની મજા માણવા આવતા હોય છે, ત્યારે આ પ્રકારની ટેકનિકલ ખામી સુરક્ષા વ્યવસ્થા સામે મોટા સવાલો ઉભા કરે છે.
