લાઈનમાંથી ઓનલાઈન : હવે ગુજરાતમાં ઘરે બેઠા મોબાઈલ પર મળશે રેશનકાર્ડ, આવક અને જાતિના દાખલા

ગાંધીનગર:હવે રાજ્યના નાગરિકોને સરકારી કચેરીઓના ધક્કા ખાવામાંથી કે અલગ-અલગ વેબ પોર્ટલ પર લોગઈન કરવાની ઝંઝટમાંથી કાયમી મુક્તિ મળશે. મુખ્યમંત્રી ભૂપેન્દ્ર પટેલના નેતૃત્વમાં ગુજરાત સરકાર અને ફેસબુક-વોટ્સએપની પેરેન્ટ કંપની મેટા (Meta Platforms Inc.) વચ્ચે ગાંધીનગર ખાતે એક મહત્વપૂર્ણ કરાર (MoU) સંપન્ન થયા છે. આ કરાર અંતર્ગત હવે નાગરિકોને માત્ર એક જ વોટ્સએપ નંબર પરથી તમામ મહત્વની સરકારી સેવાઓ ઉપલબ્ધ કરાવાશે.

એક જ વોટ્સએપ નંબર પર મળશે આ ૨૦ સરકારી સેવાઓ

રાજ્ય સરકારે સુગમ ડિજિટલ ગુજરાત ઇનિશિયેટિવ હેઠળ પાંચ મુખ્ય સરકારી વિભાગોની અંદાજે ૨૦ જેટલી પ્રજાલક્ષી સેવાઓ ટૂંક સમયમાં વોટ્સએપ ચેટબોટ (WhatsApp Chatbot) મારફતે લાઈવ કરવાનું આયોજન કર્યું છે. આ સુવિધા અંતર્ગત શહેરી અને ગ્રામીણ બંને વિસ્તારના નાગરિકો નીચે મુજબના કામો ઘર બેઠા માત્ર થોડી જ ક્લિક્સમાં કરી શકશે :

પ્રમાણપત્રો: આવકના દાખલા, જાતિના પ્રમાણપત્રો અને EWS (આર્થિક રીતે નબળા વર્ગ) ના સર્ટિફિકેટ.

મહેસૂલ અને કાયદો: જમીનના મહેસૂલ રેકોર્ડ્સ (૭/૧૨, ૮-અ) અને સત્તાવાર સોગંદનામા (Affidavits).

નાગરિક પુરવઠો: રેશન કાર્ડ ઓનલાઈન અપડેટ કરવાની સુવિધા.

ફરિયાદ નિવારણ: કોઈપણ સરકારી કામકાજ અંગેની ઓનલાઈન ફરિયાદો (Grievance Redressal) અને તેનું રિયલ ટાઈમ સ્ટેટસ ટ્રેકિંગ.

ગુજરાતી અને અંગ્રેજી બંને ભાષામાં એન્ડ-ટુ-એન્ડ સુવિધા

આ આધુનિક વોટ્સએપ ચેટબોટ સંપૂર્ણપણે દ્વિભાષી એટલે કે ગુજરાતી અને અંગ્રેજી બંને ભાષાઓમાં કાર્યરત રહેશે. આ પ્રોજેક્ટની સૌથી મોટી ખાસિયત એ છે કે નાગરિકોને માત્ર સરકારી યોજનાઓની માહિતી જ નહીં મળે, પરંતુ અરજી ફોર્મ ભરવાથી લઈને સર્ટિફિકેટ કે દસ્તાવેજ ડાઉનલોડ કરવા સુધીની ‘એન્ડ-ટુ-એન્ડ’ (End-to-End) પ્રક્રિયા વોટ્સએપ પર જ પૂર્ણ થઈ જશે. આનાથી સામાન્ય માણસના સમય અને નાણાં બંનેની મોટી બચત થશે તેમજ વહીવટી તંત્રમાં પારદર્શિતા અને જવાબદેહી વધુ સુદ્રઢ બનશે.

ઉચ્ચ અધિકારીઓ અને મેટાના ડિરેક્ટર્સની હાજરી

આ ઐતિહાસિક કરાર પર રાજ્ય સરકારના સામાન્ય વહીવટ વિભાગના સચિવ હારિત શુક્લા અને મેટા કંપનીના ડિરેક્ટર તથા હેડ ઓફ પોલિસીઝ અમન જૈન તેમજ કન્ટ્રી ડિરેક્ટર એ. શ્રીનિવાસે હસ્તાક્ષર કર્યા હતા. આ પ્રસંગે રાજ્યના મુખ્ય સચિવ એમ. કે. દાસ, મુખ્યમંત્રીના મુખ્ય સલાહકાર ડૉ. હસમુખ અઢિયા, અધિક મુખ્ય સચિવ અંજુ શર્મા સહિતના વરિષ્ઠ સચિવો અને મહાનુભાવો વિશેષ ઉપસ્થિત રહ્યા હતા. આવનારા દિવસોમાં આ પ્લેટફોર્મ સાથે તબક્કાવાર સરકારના અન્ય વિભાગોની વધુ સેવાઓ પણ સાંકળવામાં આવશે.