વડોદરા/કરજણ: વડોદરા જિલ્લામાં સરકારી અનાજનું કાળુંબજાર કરનારા તત્વો સામે પોલીસે લાલ આંખ કરી છે. કરજણ પોલીસે બાતમીના આધારે ઓપરેશન હાથ ધરીને પાદરાના સરકારી ગોડાઉનમાંથી સગેવગે કરવામાં આવતા સરકારી અનાજનો મોટો જથ્થો ઝડપી પાડ્યો છે. આ ઘટનામાં પોલીસે ટેમ્પો સાથે લાખો રૂપિયાનો મુદ્દામાલ જપ્ત કરી એક શખ્સની ધરપકડ કરી છે.
ઘઉં, ચોખા અને ચણાની 185 બોરીઓ જપ્ત
પોલીસે કરજણ જુના બજાર પાસેથી એક શંકાસ્પદ ટેમ્પો અટકાવ્યો હતો. જેની તપાસ કરતા તેમાંથી ઘઉં, ચોખા અને ચણાની કુલ 185 બોરીઓ મળી આવી હતી. પોલીસ તપાસમાં ખુલાસો થયો છે કે આ જથ્થો પાદરા સરકારી ગોડાઉનનો છે અને તેને બજારમાં ગેરકાયદેસર રીતે વેચવા માટે લઈ જવામાં આવી રહ્યો હતો.
મુદ્દામાલની વિગત:
ચોખાની બોરીઓ ઉપર ‘ફોર્ટીફાઇડ રાઈસ પ્રકાશ ફૂડ પ્રોસેસિંગ’, ‘લક્ષ્મી રાઈસ’ અને ‘કે.કે. એન્ટરપ્રાઇઝ’ જેવા લેબલ મળી આવ્યા છે. દરેક બોરી ઉપર “ગણ રાજ્ય સહકારી વિતરણ સંઘ મર્યાદિત” એવું સત્તાવાર લખાણ જોવા મળ્યું છે. પોલીસે કુલ ₹7.48 લાખનો મુદ્દામાલ જપ્ત કર્યો છે.
મોટા માથાઓની સંડોવણીની આશંકા વચ્ચે તપાસ તેજ
કરજણ પોલીસે ટેમ્પો ચાલક કાના કાળુભાઇ મીરની અટકાયત કરી કાયદેસરની કાર્યવાહી હાથ ધરી છે. આ કૌભાંડમાં માત્ર એક ડ્રાઈવર જ નહીં, પરંતુ ગોડાઉનના સંચાલકો કે પુરવઠા વિભાગના મોટા માથાઓની સંડોવણી હોવાની પ્રબળ આશંકા સેવાઈ રહી છે. હાલમાં જિલ્લા પુરવઠા વિભાગની ટીમે પણ સ્થળ પર પહોંચીને તપાસનો ધમધમાટ શરૂ કર્યો છે. પાદરાથી કરજણ સુધી આ અનાજ કેવી રીતે પહોંચ્યું અને તેનો અસલી આકા કોણ છે, તે દિશામાં પોલીસે તપાસ કેન્દ્રીત કરી છે.
