પુણે (મહારાષ્ટ્ર): મહારાષ્ટ્રના સુપ્રસિદ્ધ લોહગઢ કિલ્લા પરથી ૨૬ વર્ષીય યુવક કેતન અગ્રવાલના નીચે પટકાઈ જવાથી થયેલા મોતનો ભેદ ઉકેલીને પુણે ગ્રામીણ પોલીસે એક સંતોષકારક અને ચોંકાવનારો ખુલાસો કર્યો છે. પ્રાથમિક દ્રષ્ટિએ અકસ્માત લાગતી આ ઘટના વાસ્તવમાં કોઈ ફિલ્મી સ્ક્રિપ્ટને પણ માત આપે તેવી પૂર્વઆયોજિત હત્યા હોવાનું પોલીસ તપાસમાં સામે આવ્યું છે. પુણે પોલીસે આ ચર્ચિત કેસમાં અદાલતમાં ૫,૦૫૩ પાનાની ચાર્જશીટ રજૂ કરી છે, જેમાં કેતનની મંગેતર સિયા ગોયલ અને તેના સાગરીતો ચેતન ચૌધરી તથા રિતેશ હાંગે દ્વારા રચવામાં આવેલા પદ્ધતિસરના કાવતરાની સનસનાટીભરી વિગતો જાહેર થઈ છે.
પોલીસ ચાર્જશીટ મુજબ, આ કાવતરાની શરૂઆત ૧૮ જૂનના રોજ થયેલી ઘટનાના અઠવાડિયા પહેલાં જ થઈ ગઈ હતી. મંગેતર સિયા અને તેના સાથીદારોએ પહેલાં કેતનને ગંભીર રીતે ઈજા પહોંચાડવા માટે અન્ય લોકોને સોપારી આપવાનો પ્રયાસ કર્યો હતો, પરંતુ તેમણે ના પાડતાં આખરે ત્રણેયે જાતે જ કેતનને રસ્તામાંથી હટાવવાનું નક્કી કર્યું હતું. આ માટે તેમણે ગુનાહિત ફિલ્મો, પોડકાસ્ટ અને મેઘાલયના ચર્ચિત હનીમૂન મર્ડર કેસ સહિત અગાઉના કેસોની ઓનલાઇન રિસર્ચ કરી હતી. લોનાવાલા આસપાસના અનેક સ્થળોની તપાસ કર્યા બાદ લોહગઢ કિલ્લાની પસંદગી કરવામાં આવી હતી, જેથી હત્યાને સહેલાઈથી અકસ્માત તરીકે દર્શાવી શકાય. ચાર્જશીટમાં એવો પણ ખુલાસો થયો છે કે ૧૪ જૂને પણ સિયાએ કિલ્લા પરથી કેતનને ધક્કો માર્યો હતો, પરંતુ તે એક ઝાડી પકડીને બચી ગયો હતો, ત્યારે સિયાએ સાપ હોવાનું બહાનું બતાવી વાત વાળી લીધી હતી.
પ્રથમ પ્રયાસ નિષ્ફળ ગયા બાદ કેતનને ફરીથી કિલ્લા પર લાવવા માટે ‘માહી’ નામના ફેક ઇન્સ્ટાગ્રામ આઈડીનો સહારો લેવામાં આવ્યો હતો. અન્ય એક યુવતીના ફોટોનો ઉપયોગ કરીને બનાવાયેલા આ એકાઉન્ટ પરથી સિયાના સરપ્રાઇઝ બર્થડે પ્લાનનું બહાનું બનાવી કેતનને ૧૮ જૂને ફરી લોહગઢ કિલ્લા પર બોલાવવામાં આવ્યો હતો. ઘટનાના દિવસે આરોપી ચેતન અલગથી કિલ્લા પર પહોંચી ગયો હતો અને કેતન તથા સિયાનો પીછો કરી રહ્યો હતો, જેના સીસીટીવી ફુટેજ પણ પોલીસને મળ્યા છે. કિલ્લાના એક એકાંત સ્થળે પહોંચતા જ સિયાએ કેતનને પાછળથી ધક્કો માર્યો હતો અને ત્યારબાદ ચેતને તેને લાત મારીને ઊંડી ખાઈમાં ફેંકી દીધો હતો, જેના કારણે તેનું કરૂણ મોત નીપજ્યું હતું.
આ સમગ્ર કાવતરાને સાબિત કરવામાં સાયબર અને ડિજિટલ ફોરેન્સિક પુરાવાઓએ મુખ્ય ભૂમિકા ભજવી છે. પોલીસે આરોપીઓ દ્વારા ડિલીટ કરવામાં આવેલા ઇન્સ્ટાગ્રામ ચેટ્સ, વોટ્સએપ મેસેજિસ, કોલ ડિટેઇલ રેકોર્ડ્સ (CDR), સીસીટીવી કેમેરાના ફુટેજ અને ચેટ્સ રિકવર કરીને મજબૂત કેસ તૈયાર કર્યો છે. હાલ સિયા, ચેતન અને રિતેશ ત્રણેય આરોપીઓ જેલહવાલે છે. પુણે પોલીસે કોર્ટ સમક્ષ તમામ ટેકનિકલ અને સાક્ષીઓના નિવેદનો રજૂ કર્યા છે, જેથી આ જઘન્ય અપરાધ કરનારા ગુનેગારોને સખતમાં સખત સજા અપાવી શકાય.
