લુણાવાડા: મહીસાગર જિલ્લા કલેક્ટર અર્પિત સાગરના અધ્યક્ષ સ્થાને જિલ્લા સેવા સદનના સભાખંડ ખાતે ‘જિલ્લા રોડ સેફ્ટી કમિટી’ની અગત્યની બેઠક સંપન્ન થઈ હતી. આ બેઠકનો મુખ્ય હેતુ જિલ્લામાં માર્ગ અકસ્માતોની સંખ્યા ઘટાડવા, ટ્રાફિક વ્યવસ્થાપનને વધુ સુદ્રઢ બનાવવા અને નાગરિકોની માર્ગ સુરક્ષા સુનિશ્ચિત કરવાનો હતો.
બાળકોની સુરક્ષા અંગે કલેક્ટરનું કડક વલણ
બેઠક દરમિયાન કલેક્ટર અર્પિત સાગરે શાળાએ જતા બાળકોની સલામતી અંગે ગંભીરતા દાખવી હતી. તેમણે સ્પષ્ટ શબ્દોમાં સૂચના આપી હતી કે, સ્કૂલ રિક્ષાઓમાં ક્ષમતા કરતા વધુ બાળકો બેસાડવા એ ગંભીર ગુનો છે. જે કોઈ રિક્ષા ચાલકો બાળકોના જીવના જોખમે રિક્ષા હંકારતા જણાશે, તેમની સામે કોઈ પણ પ્રકારની દયા દાખવ્યા વગર કડકમાં કડક કાનૂની કાર્યવાહી (Strict Action) કરવા માટે આરટીઓ (RTO) અને પોલીસ વિભાગને આદેશ આપ્યા છે.
લુણાવાડામાં ટ્રાફિક સમસ્યાના નિવારણ માટે આદેશ
જિલ્લા મથક લુણાવાડા શહેરમાં સતત વધતા જતા ટ્રાફિકના ભારણને ધ્યાને લઈ, કલેક્ટરએ સંબંધિત અધિકારીઓને ‘એક્શન મોડ’માં આવવા જણાવ્યું હતું. શહેરના મુખ્ય માર્ગો પર ટ્રાફિકનું સુદ્રઢ અને કાયમી નિવારણ લાવવા માટે ત્વરિત કામગીરી હાથ ધરવા સ્પષ્ટ સૂચનાઓ આપી હતી.
ઉચ્ચ અધિકારીઓની ઉપસ્થિતિ
આ બેઠકમાં ડી.વાય.એસ.પી. (DySP), સહાયક પ્રાદેશિક વાહન વ્યવહાર અધિકારી (RTO), માર્ગ અને મકાન વિભાગ (સ્ટેટ) ના અધિકારીઓ તેમજ ચીફ ઓફિસર સહિત વિવિધ વિભાગના ઉચ્ચ અધિકારીઓ હાજર રહ્યા હતા. તમામ વિભાગોને પરસ્પર સંકલન સાધીને રોડ સેફ્ટીના નિયમોનું ચુસ્ત અમલીકરણ કરાવવા તાકીદ કરવામાં આવી હતી.
