મુંબઈ: પોતાની બોલ્ડ પર્સનાલિટી અને રોકડા જવાબો માટે જાણીતી બોલીવુડ અભિનેત્રી મલ્લિકા શેરાવતે એક એવો દાવો કર્યો છે જેને લઈને સોશિયલ મીડિયા પર સન્સનાટી મચી ગઈ છે. પ્રાઇમ વિડીયો પર ટૂંક સમયમાં શરૂ થઈ રહેલા સુપરહિટ રિયાલિટી શો ‘ધ ટ્રેટર્સ સિઝન ૨’ (The Traitors Season 2) ના સેટ પર મલ્લિકાએ ખુલાસો કર્યો છે કે હૉલીવુડના દિગ્ગજ સુપરસ્ટાર અને ‘મિશન ઈમ્પોસિબલ’ ફેમ ટૉમ ક્રૂઝ (Tom Cruise) ને તેમના પર ભારે ક્રેઝ અને ક્રશ છે. મલ્લિકાના આ દાવા બાદ શોના અન્ય સ્પર્ધકો સહિત સોશિયલ મીડિયા પર લોકો આશ્ચર્યચકિત થઈ ગયા છે.
“જો ફોન હોત તો વિડીયો બતાવત”: શોની અંદર શું થઈ વાતચીત?
સોશિયલ મીડિયા પર વાયરલ થયેલી ‘ધ ટ્રેટર્સ ૨’ ની એક અનસીન ક્લિપમાં સ્ટેન્ડ-અપ કોમેડિયન આદિત્ય કુલશ્રેષ્ઠ (કુલ્લુ), ક્રિસ્ટલ ડિસોઝા, અભિષેક મલ્હાન અને મલ્લિકા શેરાવત એકસાથે બેઠેલા જોવા મળે છે. વાતચીત દરમિયાન કોમેડિયન કુલ્લુએ મલ્લિકાને પૂછ્યું, “તમને ક્યારેય કોઈના પર ક્રશ થયો છે? કે પછી બધાને તમારા પર જ ક્રશ થાય છે?” આ સવાલનો જવાબ આપતાં મલ્લિકાએ ખૂબ જ આત્મવિશ્વાસ સાથે કહ્યું: “ના, બધાને મારા પર જ ક્રશ થાય છે. આજકાલ તો હૉલીવુડ સ્ટાર ટૉમ ક્રૂઝને પણ મારા પર ક્રશ થયો છે! હું મજાક કે જૂઠું નથી બોલી રહી. જો અત્યારે મારી પાસે મારો ફોન હોત, તો હું તમને તેના મોકલેલા વિડીયો પણ બતાવી દેત.” આ સાંભળીને અભિષેક મલ્હાન અને કુલ્લુએ આશ્ચર્યથી પૂછ્યું કે ટૉમ ક્રૂઝ કેવા વિડીયો મોકલે છે? ત્યારે મલ્લિકાએ સ્પષ્ટતા કરતાં કહ્યું કે, “જ્યારે અમે સાથે પાર્ટી કરતા હતા ત્યારના વિડીયો છે. તે ખરેખર ફેબ્યુલસ માણસ છે.”
નેટીઝન્સે આપ્યા રમુજી રિએક્શન્સ
મલ્લિકા શેરાવતનો આ વિડીયો વાયરલ થતાં જ સોશિયલ મીડિયા યુઝર્સે અલગ-અલગ પ્રતિક્રિયાઓ આપવાનું શરૂ કર્યું છે. કેટલાક નેટીઝન્સે આ વાતને ટ્રોલ કરતાં લખ્યું કે “અસલી મિશન ઈમ્પોસિબલ તો આ વાત પર વિશ્વાસ કરવાનો છે”, તો વળી કેટલાક ફેન્સે કહ્યું કે મલ્લિકા પોતાની બોલ્ડ સ્ટાઇલ માટે જ જાણીતી છે અને શોમાં મનોરંજન પૂરું પાડી રહી છે.
‘ધ ટ્રેટર્સ સિઝન ૨’ વિશે
કરન જોહરના હોસ્ટિંગ હેઠળ બનેલો સુપરહિટ રિયાલિટી શો ‘ધ ટ્રેટર્સ ૨’ ૧૩ ઓગસ્ટ ૨૦૨૬થી પ્રાઇમ વિડીયો પર સ્ટ્રીમ થઈ રહ્યો છે. જેસલમેરના ભવ્ય સૂર્યગઢ પેલેસમાં શૂટ થયેલા આ શોમાં મલ્લિકા શેરાવત ઉપરાંત રિયા ચક્રવર્તી, મુનવ્વર ફારૂકી, શ્વેતા તિવારી અને અભિષેક મલ્હાન જેવા ૨૧ મનોરંજન જગતના સેલિબ્રિટીઓ ભાગ લઈ રહ્યા છે.
