વડોદરા: આદિત્ય ધરના નિર્દેશનમાં બનેલી અને રણવીર સિંહ અભિનીત સ્પાય થ્રિલર ફિલ્મ ‘ધૂરંધર: ધ રીવેન્જ’ (ધૂરંધર ૨) હાલ સિનેમાઘરોમાં ઇતિહાસ રચી રહી છે. આ ફિલ્મમાં મુખ્ય કલાકાર રણવીર સિંહ હોવા છતાં, પીઢ અભિનેતા રાકેશ બેદી દ્વારા ભજવવામાં આવેલું ‘જમીલ જમાલી’ નું પાત્ર લોકોમાં ભારે આકર્ષણનું કેન્દ્ર બન્યું છે. આ પાત્રના અનોખા અંદાજ અને ડાયલોગ ડિલિવરીથી પ્રેક્ષકો મંત્રમુગ્ધ થયા છે, ત્યારે હવે ગુજરાત પોલીસે પણ આ પાત્રની લોકપ્રિયતાનો ઉપયોગ રસ્તા સુરક્ષા માટે કર્યો છે.
“બચ્ચા હે તું મેરા…”: ટ્રાફિક નિયમો માટે નવો અંદાજ
તાજેતરમાં ગુજરાત પોલીસના સત્તાવાર સોશિયલ મીડિયા હેન્ડલ પરથી એક ક્રિએટિવ ફોટો શેર કરવામાં આવ્યો છે. આ ફોટોમાં ‘જમીલ જમાલી’ નું કાર્ટૂન પાત્ર કારમાં સીટ બેલ્ટ બાંધીને બેઠેલું જોવા મળે છે. ફોટોની સાથે લખ્યું છે, “Bachcha hai tu mera, seat belt laga ke gadi chalaya kar” (બચ્ચા હે તું મેરા, સીટ બેલ્ટ લગાવીને ગાડી ચલાવ્યા કર). ઉલ્લેખનીય છે કે ફિલ્મમાં આ પાત્ર દરેકને ‘બચ્ચા હે તું મેરા’ કહીને સંબોધે છે, જે હાલ મીમ્સ અને રીલ્સમાં ખૂબ વાયરલ છે. પોલીસે આ ડાયલોગ દ્વારા નાગરિકોને “Follow rules and Maintain safety!” નો સંદેશ આપ્યો છે.
કોણ છે આ જમીલ જમાલી?
જેમણે હજુ સુધી ફિલ્મ નથી જોઈ, તેમના માટે જણાવી દઈએ કે જમીલ જમાલી એ ૨૦૨૬ની બ્લોકબસ્ટર ફિલ્મ ‘ધૂરંધર ૨’ નું એક ચતુર અને રમુજી પાત્ર છે. આ પાત્ર પાકિસ્તાની રાજકારણી નબીલ ગાબોલથી પ્રેરિત છે. કરાચી સ્થિત એક ચાલાક અને સ્વાર્થી રાજકારણી તરીકે રાકેશ બેદીએ આ પાત્રમાં જીવ રેડ્યો છે. તેમની ઘેરી હાસ્યપૂર્ણ શૈલીને કારણે આ પાત્ર રણવીર સિંહ જેટલું જ ચર્ચામાં છે.
બોક્સ ઓફિસ પર ૮૦૦ કરોડનો આંકડો પાર
ફિલ્મની કમાણીની વાત કરીએ તો ‘ધૂરંધર ૨’ એ માત્ર પાંચ દિવસમાં વિશ્વભરમાં ₹૮૦૦ કરોડ થી વધુનું કલેક્શન કરી લીધું છે. છઠ્ઠા દિવસે આ આંકડો ₹૮૨૯ કરોડને પાર કરી જવાનો અંદાજ છે. ભારતમાં પાંચ દિવસનું નેટ કલેક્શન ₹૫૧૯ કરોડથી વધુ નોંધાયું છે. ફિલ્મની આ સફળતા અને પાત્રોના ક્રેઝને જોતા ગુજરાત પોલીસની આ પહેલને લોકો ખૂબ આવકારી રહ્યા છે.
