કર્ણાટકની રાજધાની બેંગલુરુ શહેરમાં બુધવારે બપોરે દિવસે-દહાડે એક અત્યંત સનસનાટીપૂર્ણ અને આયોજનબદ્ધ લૂંટની ઘટના સામે આવી છે, જેને તાજેતરના સમયની શહેરની સૌથી મોટી લૂંટ માનવામાં આવી રહી છે. છ શખ્સોના એક સંગઠિત ગેંગે RBI (રિઝર્વ બેંક ઓફ ઇન્ડિયા)ના અધિકારીઓ તરીકેનો ઢોંગ કરીને એક ATM કેશ વાનને આંતરી અને આશરે ₹૭.૧૧ કરોડની રોકડ લૂંટીને ફરાર થઈ ગયા છે.
‘ડોક્યુમેન્ટ વેરિફિકેશન’ના નામે રોકડની લૂંટ
લૂંટારાઓએ આ ઘટનાને ફિલ્મી અંદાજમાં અંજામ આપ્યો હતો. સાઉથ એન્ડ સર્કલ પાસે આ ગેંગે ATM કેશ વાનને આંતરી હતી. તેમણે વાનના સ્ટાફને જણાવ્યું કે તેઓ RBIના અધિકારીઓ છે અને કેટલાક ડોક્યુમેન્ટ્સનું વેરિફિકેશન કરવા માંગે છે.
વેરિફિકેશનના બહાને, લૂંટારાઓએ વાનના સ્ટાફને ડરાવી-ધમકાવીને તેમની કારમાં બેસાડ્યા હતા અને તેમની સાથે રોકડ ભરેલો જથ્થો પણ લઈ ગયા હતા. આ સમગ્ર ઓપરેશન કોઈ મની-હાઇસ્ટ (Money Heist) ઓપરેશનની જેમ ચોકસાઈથી પાર પાડવામાં આવ્યું હતું.
પોલીસ તપાસમાં સંપૂર્ણ તાકાત લગાવાઈ
લૂંટની ઘટનાની જાણ થતાં જ શહેર પોલીસમાં દોડધામ મચી ગઈ હતી અને સમગ્ર શહેરમાં હાઈ એલર્ટ જાહેર કરવામાં આવ્યું હતું. પોલીસને તપાસ દરમિયાન આરોપીઓની નકલી નંબર પ્લેટવાળી ઇનોવા કાર મળી આવી છે.
કર્ણાટકના ગૃહમંત્રી જી. પરમેશ્વરાએ આ ઘટનાની ગંભીરતાને ધ્યાનમાં લઈને જણાવ્યું છે કે, પોલીસને લૂંટારુ ગેંગ અંગે તમામ માહિતી મળી ગઈ છે અને તેમણે આશા વ્યક્ત કરી છે કે ગુનેગારોને ટૂંક સમયમાં જ પકડી લેવામાં આવશે. પોલીસે આ મોટા ષડયંત્રના મૂળ સુધી પહોંચવા માટે તમામ તાકાત લગાવી દીધી છે.
