ગાંધીનગર: ગુજરાતમાં સ્થાનિક સ્વરાજ્યની ચૂંટણીઓને લઈને મોટા સમાચાર સામે આવ્યા છે. ગુજરાત રાજ્ય ચૂંટણી પંચ દ્વારા ગાંધીનગર મહાનગરપાલિકા, ઓખા નગરપાલિકા અને દ્વારકા નગરપાલિકાની સામાન્ય ચૂંટણીઓ તેમજ રાજ્યના વિવિધ સ્થાનિક સ્વરાજ્યના એકમોની ખાલી પડેલી બેઠકોની પેટાચૂંટણીનો સત્તાવાર કાર્યક્રમ જાહેર કરી દેવામાં આવ્યો છે. ચૂંટણી પંચ દ્વારા બુધવારે જારી કરાયેલી જાહેરાત અનુસાર, તમામ બેઠકો માટે ૧૧ ઓક્ટોબર, ૨૦૨૬ (રવિવાર) ના રોજ સવારે ૭:૦૦ વાગ્યાથી સાંજે ૫:૦૦ વાગ્યા દરમિયાન મતદાન યોજાશે. ચૂંટણી કાર્યક્રમની જાહેરાત સાથે જ સંબંધિત વિસ્તારોમાં આદર્શ આચારસંહિતા પણ તાત્કાલિક અસરથી અમલમાં આવી ગઈ છે.
આ જાહેર કરાયેલા ચૂંટણી કાર્યક્રમમાં ગાંધીનગર મનપા, ઓખા અને દ્વારકા નગરપાલિકા ઉપરાંત ખેરાલુ, છોટાઉદેપુર અને બાયડ નગરપાલિકા તેમજ દેવભૂમિ દ્વારકા જિલ્લા પંચાયત અને પાદરા, સાતલાસણા અને હારીજ તાલુકા પંચાયતોની કુલ ૭ ખાલી પડેલી સીટો પરની પેટાચૂંટણીનો પણ સમાવેશ થાય છે. ચૂંટણી પંચના શિડ્યુલ મુજબ, ૨૧ સપ્ટેમ્બરના રોજ ચૂંટણી નોટિસ પ્રસિદ્ધ થશે, જ્યારે ઉમેદવારી પત્રો ભરવાની આખરી તારીખ ૨૬ સપ્ટેમ્બર રહેશે. ૨૮ સપ્ટેમ્બરે ફોર્મની ચકાસણી થશે અને ૨૯ સપ્ટેમ્બર સુધી ઉમેદવારી પત્રો પાછા ખેંચી શકાશે. ૧૧ ઓક્ટોબરે મતદાન પૂર્ણ થયા બાદ, જરૂર જણાય તો ૧૨ ઓક્ટોબરે પુનઃમતદાન યોજાશે. ત્યારબાદ ૧૩ ઓક્ટોબરના રોજ મતગણતરી હાથ ધરવામાં આવશે અને ૧૫ ઓક્ટોબર સુધીમાં સમગ્ર ચૂંટણી પ્રક્રિયા પૂર્ણ કરી દેવાશે.
રાજ્ય ચૂંટણી પંચે સ્પષ્ટ કર્યું છે કે મહાનગરપાલિકા, નગરપાલિકાઓ, જિલ્લા અને તાલુકા પંચાયતોની આ તમામ ચૂંટણીઓ ઈલેક્ટ્રોનિક વોટિંગ મશીન (EVM) દ્વારા જ યોજવામાં આવશે. મતદારોએ મતદાન મથક પર પોતાનું ઓળખપત્ર (EPIC) રજૂ કરવાનું રહેશે, પરંતુ જો કોઈ મતદાર પાસે ચૂંટણી કાર્ડ ન હોય તો પંચ દ્વારા નિર્ધારિત કરાયેલા અન્ય વૈકલ્પિક ઓળખ દસ્તાવેજો દર્શાવીને પણ મતદાન કરી શકાશે. ચૂંટણી પ્રક્રિયા શાંતિપૂર્ણ અને સુચારૂ રીતે સંપન્ન થાય તે માટે રાજ્ય ચૂંટણી પંચે તમામ સંબંધિત સરકારી તંત્રો અને સ્થાનિક પ્રશાસનને અત્યારથી જ જરૂરી તૈયારીઓ પૂર્ણ કરવા માટે આકરા નિર્દેશો આપી દીધા છે.
