ટાટા ગ્રૂપમાં મોટો ધડાકો: નોએલ ટાટા સાથેના મતભેદો વચ્ચે એન. ચંદ્રશેખરન ટાટા સન્સના ચેરમેન પદેથી હટશે

નવી દિલ્હી: ભારતના સૌથી મોટા અને પ્રતિષ્ઠિત વ્યાપારિક સામ્રાજ્ય ટાટા ગ્રૂપમાંથી કોર્પોરેટ જગતને હચમચાવી દેતા મોટા સમાચાર સામે આવ્યા છે. ટાટા સન્સના ચેરમેન એન. ચંદ્રશેખરન (N Chandrasekaran) ફેબ્રુઆરી ૨૦૨૭માં તેમનો વર્તમાન કાર્યકાળ પૂરો થતાં જ પોતાના પદ પરથી નિવૃત્ત થશે. ટાટા ટ્રસ્ટ્સના ચેરમેન નોએલ ટાટા (Noel Tata) સાથે પુનઃનિમણૂક (Reappointment) અંગે લાંબા સમયથી ચાલી રહેલા મતભેદો અને મડાગાંઠ બાદ, ૬૩ વર્ષીય ચંદ્રશેખરને ટાટા સન્સના બોર્ડને સ્પષ્ટ કરી દીધું છે કે તેઓ ફેબ્રુઆરી ૨૦, ૨૦૨૭ના રોજ કાર્યકાળ પૂર્ણ થયા પછી આ પદ પર ચાલુ રહેવા માગતા નથી.

૪૦ વર્ષની સફર અને બોર્ડને ઉત્તરાધિકારી શોધવાની વિનંતી

ટાટા ગ્રૂપ સાથે છેલ્લા ૪૦ વર્ષથી જોડાયેલા અને ૨૦૧૭થી ટાટા સન્સની કમાન સંભાળી રહેલા એન. ચંદ્રશેખરને બોર્ડને વિનંતી કરી છે કે ગ્રૂપમાં સ્મૂથ ટ્રાન્ઝિશન (સરળ નેતૃત્વ પરિવર્તન) સુનિશ્ચિત કરવા માટે વહેલી તકે નવા ચેરમેનની પસંદગી પ્રક્રિયા શરૂ કરવામાં આવે. બોર્ડ મીટિંગ અને ૧૮ ઓગસ્ટે યોજાનારી કંપનીની વાર્ષિક સાધારણ સભા (AGM) અગાઉ જ તેમણે પોતાની નિવૃત્તિનો નિર્ણય સ્પષ્ટ કરી દીધો છે.

નોએલ ટાટા સાથે ક્યાં સર્જાયો તણાવ?

ટાટા ગ્રૂપની મુખ્ય હોલ્ડિંગ કંપની ટાટા સન્સમાં ટાટા ટ્રસ્ટ્સ (Tata Trusts) ૬૬% હિસ્સેદારી ધરાવે છે, જેના કારણે ગ્રૂપના શાસન અને નિર્ણયોમાં ટ્રસ્ટની ભૂમિકા અત્યંત મહત્વપૂર્ણ રહે છે. રિપોર્ટ્સ મુજબ, કેટલાક નવા બિઝનેસ સાહસો અને કામગીરી અંગે ટાટા ટ્રસ્ટ્સના ચેરમેન નોએલ ટાટા અને ચંદ્રશેખરન વચ્ચે મતભેદો સર્જાયા હતા. બોર્ડમાં પુનઃનિમણૂકના પ્રસ્તાવ પર સર્વસંમતિ ન સધાતા ચંદ્રશેખરને સામેથી જ દાવેદારી ન કરવાનો નિર્ણય લીધો હતો.

ચંદ્રશેખરનના નેતૃત્વમાં ટાટા ગ્રૂપનો સ્વર્ણિમ કાળ

રતન ટાટા બાદ ટાટા પરિવાર બહારના પ્રથમ વ્યાવસાયિક એક્ઝિક્યુટિવ તરીકે ટાટા સન્સની કમાન સંભાળનારા ચંદ્રશેખરનના કાર્યકાળમાં ગ્રૂપે અભૂતપૂર્વ પ્રગતિ કરી હતી:

• આવકમાં રેકોર્ડ ગ્રોથ: નાણાકીય વર્ષ ૨૦૨૦માં ટાટા ગ્રૂપની કુલ આવક ₹૭.૮૯ લાખ કરોડ હતી, જે નાણાકીય વર્ષ ૨૦૨૬માં વધીને ₹૧૬.૨૪ લાખ કરોડ પહોંચી ગઈ.
• નફામાં પાંચ ગણો ઉછાળો: ગ્રૂપનો ચોખ્ખો નફો (PAT) ₹૩૨,૦૦૦ કરોડથી વધીને ₹૧.૭૧ લાખ કરોડ થયો.
• માર્કેટ કેપિટલાઇઝેશન: ગ્રૂપની લિસ્ટેડ કંપનીઓનું માર્કેટ કેપ ₹૯.૩૧ લાખ કરોડથી વધીને ₹૨૪.૩૯ લાખ કરોડ (ગયા વર્ષે મહત્તમ ₹૨૭.૮૫ લાખ કરોડ) સુધી પહોંચ્યું હતું.

તેમના નેતૃત્વમાં જ એર ઈન્ડિયાનું સંપાદન (Acquisition), સેમિકન્ડક્ટર પ્લાન્ટ્સ, ઈલેક્ટ્રોનિક્સ મેન્યુફેક્ચરિંગ અને ટાટા ન્યુ (Tata Neu) જેવા ડિજિટલ સાહસોનો પાયો નંખાયો હતો.

શેરબજાર પર અસર

ચંદ્રશેખરનના રાજીનામા અને ફેબ્રુઆરી ૨૦૨૭માં એક્ઝિટના સમાચાર વાયરલ થતાં જ શેરબજારમાં ટાટા ગ્રૂપના શેરોમાં ગાબડું જોવા મળ્યું હતું. ટાટા કન્સલ્ટન્સી સર્વિસિસ (TCS), ટાટા મોટર્સ, ટાટા કન્ઝ્યુમર અને ટાટા પાવરના શેરોમાં ૨% થી ૪% સુધીનો કડાકો નોંધાયો હતો.