નવી દિલ્હી: આંતરરાષ્ટ્રીય મહિલા દિવસના અવસરે પ્રધાનમંત્રી નરેન્દ્ર મોદીએ રાષ્ટ્રની તમામ મહિલાઓને હાર્દિક શુભેચ્છા પાઠવી છે. તેમણે ભારતની મહિલા શક્તિના દૃઢ નિશ્ચય, અદભૂત સર્જનાત્મકતા અને અજેય સફળતાને સલામ કરતા જણાવ્યું હતું કે, દેશની પ્રગતિને આકાર આપવામાં મહિલાઓની ભૂમિકા સતત વધી રહી છે. પીએમ મોદીએ ભારપૂર્વક કહ્યું કે દરેક ક્ષેત્રમાં મહિલાઓ અપ્રતિમ જુસ્સા સાથે યોગદાન આપી રહી છે, જે આખા રાષ્ટ્ર માટે પ્રેરણાસ્ત્રોત છે.
સરકારી યોજનાઓના મૂળમાં મહિલા સશક્તિકરણ
વડાપ્રધાને ‘X’ (અગાઉનું ટ્વિટર) પર શ્રેણીબદ્ધ પોસ્ટ્સ દ્વારા જણાવ્યું હતું કે મહિલા સશક્તિકરણ એ વર્તમાન સરકારની પ્રાથમિકતા છે, મહિલા સશક્તિકરણ એ સરકારની અનેક યોજનાઓ અને પહેલોના કેન્દ્રસ્થાને છે. સરકાર એવી તકો ઊભી કરવા માટે પ્રતિબદ્ધ છે જ્યાં દરેક મહિલા પોતાની સંપૂર્ણ ક્ષમતાનો અનુભવ કરી શકે. ભારતની વિકાસ યાત્રામાં મહિલાઓનું યોગદાન ‘વિકસિત ભારત’ બનાવવાના સામૂહિક સંકલ્પને વધુ મજબૂત બનાવે છે.
વિકસિત ભારત તરફ પ્રયાણ
PM મોદીએ વધુમાં જણાવ્યું કે ભારતની નારી શક્તિની સિદ્ધિઓ સમગ્ર દેશ માટે ગર્વની વાત છે. રાષ્ટ્ર નિર્માણમાં મહિલાઓની ભૂમિકા પરિવર્તનશીલ સાબિત થઈ રહી છે. તેમણે નોંધ્યું કે છેલ્લા એક દાયકામાં પાયાના સ્તરે (Ground Level) મહિલાઓના જીવનમાં મોટું પરિવર્તન આવ્યું છે. જેમ જેમ દેશ આગળ વધશે, તેમ મહિલાઓની આશાઓ અને તેમની મહેનત ભારતને એક મજબૂત અને વધુ સમૃદ્ધ રાષ્ટ્ર બનવા તરફ દોરી જશે.
વડાપ્રધાને હેશટેગ #NayeBharatKiNariShakti સાથે મહિલાઓના જીવનમાં આવેલા સકારાત્મક બદલાવની ઝલક પણ રજૂ કરી હતી.
