ખેડૂતો માટે મોટા સમાચાર : ઉનાળુ મગની ટેકાના ભાવે ખરીદી માટે આવતીકાલથી ઓનલાઇન નોંધણી શરૂ, જાણો સંપૂર્ણ પ્રક્રિયા

ગાંધીનગર: ગુજરાતમાં ઉનાળુ મગનું વાવેતર કરતા ખેડૂતોને તેમના પાકના પોષણક્ષમ ભાવ મળી રહે તે માટે રાજ્ય સરકારે એક મહત્વપૂર્ણ જાહેરાત કરી છે. વર્ષ ૨૦૨૫-૨૬ના ઉનાળુ મગની ટેકાના ભાવે ખરીદી કરવા માટે આવતીકાલ એટલે કે તા. ૨૭ મે, ૨૦૨૬થી ખેડૂતોની ઓનલાઇન નોંધણી પ્રક્રિયા સત્તાવાર રીતે શરૂ થઈ રહી છે. મગ પાકનું વેચાણ કરવા ઈચ્છતા ખેડૂતો આગામી તા. ૧૦ જૂન, ૨૦૨૬ સુધી (૧૫ દિવસ માટે) ગ્રામ્ય સ્તરે જઈને આ રજીસ્ટ્રેશન કરાવી શકશે.

ઈ-ગ્રામ કેન્દ્રો પર વિનામૂલ્યે ઓનલાઇન રજીસ્ટ્રેશન

રાજ્યના તમામ જિલ્લાના ખેડૂતો ગ્રામ્ય કક્ષાએ આવેલા ઈ-ગ્રામ કેન્દ્રો ખાતે જઈને વિલેજ કોમ્પ્યુટર આંત્રપ્રિન્યોર (VCE) મારફતે કોઈ પણ જાતના શુલ્ક વગર તદ્દન વિનામૂલ્યે ઓનલાઇન નોંધણી કરાવી શકશે. આ રજીસ્ટ્રેશન પ્રક્રિયાને વધુ પારદર્શક અને સરળ બનાવવા માટે આ વખતે ખેડૂતોનું બાયોમેટ્રીક (ફિંગરપ્રિન્ટ) ઓથેન્ટીકેશન અથવા ફેસ ઓથેન્ટીકેશન (ચહેરો ઓળખવાની પદ્ધતિ) નો ઉપયોગ કરવામાં આવશે.

‘ફાર્મર રજીસ્ટ્રેશન’ કરાવવું ફરજિયાત

ખેતી નિયામકની કચેરી દ્વારા સ્પષ્ટ કરવામાં આવ્યું છે કે ટેકાના ભાવે ખરીદીનો લાભ લેવા માટે ખેડૂતો માટે ‘ફાર્મર રજીસ્ટ્રેશન’ (Farmer Registration) કરાવવું અત્યંત ફરજિયાત છે. ફાર્મર રજીસ્ટ્રેશન હેઠળ ખેડૂતનો જે સર્વે નંબરનો વિસ્તાર આવરી લેવાયો હશે, તેને જ ખરીદીની નોંધણી માટે માન્ય રાખવામાં આવશે. આથી, ખેડૂતોએ પોતાના તમામ સર્વે નંબરનો સમાવેશ આ રજીસ્ટ્રેશનમાં અચૂક કરાવી લેવા વિનંતી કરાઈ છે.

નોંધણી માટેની બે સરળ પદ્ધતિઓ:

ખેડૂત મિત્રો પોતાની અનુકૂળતા મુજબ નીચેની બેમાંથી કોઈપણ એક પદ્ધતિ દ્વારા ફાર્મર રજીસ્ટ્રેશન કરાવી શકે છે:

જાતે ઓનલાઇન નોંધણી: ખેડૂતો જાતે જ સત્તાવાર ઓનલાઇન પોર્ટલ gjfr.agristack.gov.in પર જઈને અથવા ગુગલ પ્લે સ્ટોર પરથી ‘ફાર્મર રજીસ્ટ્રી ગુજરાત’ મોબાઇલ એપ્લિકેશન ડાઉનલોડ કરીને ઘરે બેઠા નોંધણી કરી શકે છે.

રૂબરૂ મુલાકાત દ્વારા: આ ઉપરાંત ખેડૂતો પોતાના ગામના VCE, VLE ઓપરેટર, સીએસસી (CSC) સેન્ટર્સ અથવા ગ્રામસેવક પાસે રૂબરૂ જઈને પણ પોતાનું રજીસ્ટ્રેશન કરાવી શકે છે.

જરૂરી દસ્તાવેજો: રજીસ્ટ્રેશન કરાવતી વખતે ખેડૂતોએ પોતાનું આધાર કાર્ડ, આધાર કાર્ડ સાથે લિન્ક થયેલો ચાલુ મોબાઈલ નંબર અને જમીનની વિગતો દર્શાવતો સર્વે નંબર (૭/૧૨, ૮-અ) પોતાની સાથે રાખવાનો રહેશે.

પ્રતિ ક્વિન્ટલ મળશે ₹૮,૭૬૮ નો મસમોટો ભાવ

અત્રે ઉલ્લેખનીય છે કે, ભારત સરકારે વર્ષ ૨૦૨૫-૨૬ના ઉનાળુ મગ પાક માટે પ્રતિ ક્વિન્ટલ રૂ. ૮,૭૬૮ નો ઐતિહાસિક ટેકાનો ભાવ જાહેર કર્યો છે. હાલમાં ખુલ્લા બજારમાં મગના બજારભાવ આ ટેકાના ભાવ કરતાં નીચા ચાલી રહ્યા હોવાથી, જગતના તાતને આર્થિક નુકસાનથી બચાવવા માટે ભારત સરકારના ‘પ્રધાનમંત્રી અન્નદાતા આય સંરક્ષણ અભિયાન’ (PM-AASHA) અંતર્ગત આ સુદ્રઢ ખરીદીનું આયોજન હાથ ધરાયું છે. ખેતી નિયામકની કચેરીએ તમામ ખેડૂતોને સમયસર નોંધણી કરાવી આ યોજનાનો મહત્તમ લાભ લેવા અપીલ કરી છે.