વડોદરા: સંસ્કારી નગરી વડોદરામાં આજે મહારાષ્ટ્રીયન સમાજ દ્વારા નૂતન વર્ષ ‘ગુઢીપડવા’ના પર્વની અપાર શ્રદ્ધા અને ઉત્સાહભેર ઉજવણી કરવામાં આવી રહી છે. વડોદરાના રાજવી ગાયકવાડ પરિવાર દ્વારા વર્ષોની પરંપરાને જાળવી રાખીને લક્ષ્મી વિલાસ પેલેસ ખાતે ગુઢી બનાવી પૂજા-અર્ચના કરવામાં આવી હતી. મહારાષ્ટ્રીયન સંસ્કૃતિમાં ગુઢીપડવાને નવા વર્ષના પ્રારંભ તરીકે માનવામાં આવે છે, ત્યારે રાજવી પરિવારે શ્રદ્ધાપૂર્વક આ દિવસની ઉજવણી કરી હતી.
દરબાર હોલમાં વેદોક્ત મંત્રોચ્ચાર
લક્ષ્મી વિલાસ પેલેસના ભવ્ય દરબાર હોલમાં રાજવી પરિવારના રાજગુરુ દ્વારા વેદોક્ત મંત્રોચ્ચાર સાથે ગુઢીની પૂજા કરાવવામાં આવી હતી. મહારાજા સમરજીતસિંહ ગાયકવાડે નવા વર્ષના નિમિત્તે ગુઢી અને ગાદીની વિશેષ પૂજા કરી હતી. આ ધાર્મિક વિધિમાં રાજવી પરિવારના સભ્યો જોડાયા હતા અને પરંપરા મુજબ વિજયના પ્રતીક સમાન ગુઢીને સ્થાપિત કરી આખા વર્ષ દરમિયાન સુખ-શાંતિની પ્રાર્થના કરી હતી.
શરણાઈના સૂર અને સંગીતમય વાતાવરણ
ગાયકવાડ શાસનકાળથી ચાલી આવતી પરંપરા મુજબ, પૂજા દરમિયાન શરણાઈ વગાડવામાં આવી હતી. મંગલમય વાતાવરણમાં શરણાઈના સૂર સાથે નૂતન વર્ષને વધાવવામાં આવ્યું હતું. ઉલ્લેખનીય છે કે, વડોદરામાં મહારાષ્ટ્રીયન સમુદાયની મોટી વસ્તી હોવાથી સમગ્ર શહેરમાં ઘર-ઘર પર ગુઢીઓ સજાવીને લોકોએ એકબીજાને નૂતન વર્ષની શુભકામનાઓ પાઠવી હતી.
વિજય અને સમૃદ્ધિનું પ્રતીક
ગુઢીપડવા એટલે માત્ર નવું વર્ષ જ નહીં, પરંતુ તે વિજય અને સમૃદ્ધિનું પ્રતીક પણ ગણાય છે. પેલેસ ખાતે થયેલી આ પૂજાના દર્શન કરવા અને રાજવી પરંપરાને નિહાળવી એ વડોદરાવાસીઓ માટે હંમેશા આકર્ષણનું કેન્દ્ર રહ્યું છે. આજના દિવસે કડવા લીમડાના પાન અને ગોળનું સેવન કરી સ્વાસ્થ્ય અને મંગલકામના કરવાની પરંપરા પણ શ્રદ્ધાપૂર્વક પાળવામાં આવી હતી.
