વડોદરા શહેર સ્પેશિયલ ઓપરેશન ગ્રુપ (SOG) એ એક મોટી સફળતા મેળવી છે. કપુરાઈ પોલીસ સ્ટેશનમાં નોંધાયેલા ૬.૬૨ લાખ રૂપિયાના એમડી ડ્રગ્સ કેસમાં છેલ્લા ઘણા સમયથી વોન્ટેડ ચાલી રહેલી મહિલા આરોપી નીલોફર મુન્નાભાઈ સલમાનીને એસઓજીએ ઝડપી પાડી છે.
આ ઘટના ગત ૮ ફેબ્રુઆરીના રોજ બની હતી, જ્યારે એસઓજીને મળેલી બાતમીના આધારે પોલીસે ડભોઈ રોડ પર દરોડો પાડ્યો હતો. આ રેડ દરમિયાન, પોલીસે રાજસ્થાનના પ્રતાપગઢથી માદક પદાર્થ મેફેડ્રોન ડ્રગ્સનો કોમર્શિયલ જથ્થો લાવનાર આરોપી અશોકકુમાર મહીપાલ મેઘવાલને પકડી પાડ્યો હતો. તેની પાસેથી ૬૬ ગ્રામ અને ૨૮૦ મિલીગ્રામ ડ્રગ્સનો જથ્થો મળી આવ્યો હતો, જેની કિંમત ₹૬,૬૨,૮૦૦ આંકવામાં આવી હતી. આ ઉપરાંત, અન્ય મુદ્દામાલ સહિત કુલ ₹૬,૭૩,૧૩૦ નો મુદ્દામાલ પણ જપ્ત કરવામાં આવ્યો હતો.
આ કેસની વધુ તપાસ દરમિયાન, પકડાયેલા આરોપી અશોકકુમાર મેઘવાલ અને ફરાર આરોપી કાલુ ઉપરાંત, આ સમગ્ર ડ્રગ્સનો જથ્થો મંગાવનાર મુખ્ય આરોપી તરીકે નીલોફર મુન્નાભાઈ સલમાનીનું નામ સામે આવ્યું હતું. ત્યારથી પોલીસ તેને શોધી રહી હતી.
એસઓજીને બાતમી મળી હતી કે વોન્ટેડ આરોપી નીલોફર સલમાની સનફાર્મા રોડ પર આવેલા રોયલ વુડાના મકાનમાં તેની માતા જૈતુન રહેમાન શેખના ઘરે છુપાયેલી છે. આ બાતમીના આધારે એસઓજીની ટીમે દરોડો પાડીને નીલોફર સલમાનીને ઝડપી પાડી છે. આ ધરપકડથી આંતરરાજ્ય ડ્રગ્સ રેકેટના વધુ ખુલાસા થવાની સંભાવના છે.
