મુસાફરો માટે ખુશખબર : સુરત-ઉદયપુર વચ્ચે દોડશે નવી વંદે ભારત એક્સપ્રેસ, ૩ ઓક્ટોબરથી શરૂ થશે ટ્રેન સેવા!

સુરત: દક્ષિણ ગુજરાત અને રાજસ્થાન વચ્ચે મુસાફરી કરતા ટ્રેન મુસાફરો માટે રેલવે વિભાગ તરફથી એક મોટા અને આનંદના સમાચાર સામે આવ્યા છે. પશ્ચિમ રેલવે દ્વારા સુરત અને રાજસ્થાનના પ્રવાસન ધામ ઉદયપુર વચ્ચે નવી ‘સુરત-ઉદયપુર વંદે ભારત એક્સપ્રેસ’ શરૂ કરવાની તમામ મંજૂરીઓ આપી દેવામાં આવી છે. મંજૂર કરાયેલા રેલવે ટાઇમટેબલ મુજબ, આ પ્રીમિયમ વંદે ભારત ટ્રેનની નિયમિત સેવાઓ આગામી ૩ ઓક્ટોબરથી શરૂ થવાની પૂરી શક્યતા છે, જ્યારે ૨ ઓક્ટોબર એટલે કે ગાંધી જયંતિના વિશેષ અવસરે આ ટ્રેનને ઉદ્ઘાટન સ્પેશિયલ તરીકે લીલી ઝંડી બતાવવામાં આવી શકે છે. આ સાથે જ વલસાડ અને સુરત વચ્ચે નવી મેમુ (MEMU) ટ્રેન સેવા પણ ૩ ઓક્ટોબરથી કાર્યરત કરવામાં આવશે.

સુરત-ઉદયપુર વંદે ભારત એક્સપ્રેસ (ટ્રેન નંબર ૨૬૯૦૩) સુરત રેલવે સ્ટેશનથી સવારે ૬:૧૦ વાગ્યે ઉપડશે અને અંદાજે ૭ કલાક અને ૩૦ મિનિટનો સમય લઈને બપોરે ૧:૪૦ વાગ્યે ઉદયપુર સિટી પહોંચશે. વળતી મુસાફરીમાં ટ્રેન નંબર ૨૬૯૦૪ ઉદયપુર સિટીથી બપોરે ૩:૩૫ વાગ્યે ઉપડીને રાત્રે ૧૧:૦૦ વાગ્યે સુરત પરત ફરશે. આ સુવિધાજનક સમયપત્રકને કારણે મુસાફરો એક જ દિવસમાં બંને શહેરો વચ્ચે સરળતાથી પ્રવાસ કરી શકશે. આ આઠ કોચ ધરાવતી વંદે ભારત ટ્રેનનું પ્રાથમિક મેન્ટેનન્સ સુરત ખાતે કરવામાં આવશે, જ્યારે વડોદરા અને અસાર્વા ખાતે વોટરિંગ સ્ટેશન તરીકેની વ્યવસ્થા કરવામાં આવી છે.

રૂટ અને મહત્વના સ્ટોપેજ અંગે વિગતો આપતા રેલવે તંત્રએ જણાવ્યું છે કે આ ટ્રેન સુરતથી ઉપડીને ભરૂચ, વડોદરા, આણંદ, અમદાવાદના મણિનગર અને અસાર્વા, હિંમતનગર, શામળાજી રોડ, ડુંગરપુર અને ઝાવર જેવા મહત્વના વેપારી અને પ્રવાસન મથકો પર વાણિજ્યિક રોકાણ (Commercial Stoppage) કરશે. આ નવી વંદે ભારત ટ્રેન શરૂ થવાની સાથે જ પૂર્વમાં ચાલી રહેલી ઉદયપુર સિટી-અસાર્વા વંદે ભારત એક્સપ્રેસ (ટ્રેન નંબર ૨૬૯૬૩/૨૬૯૬૪) સેવા બંધ કરવામાં આવશે અને તેના બદલે આ વિસ્તૃત સુરત-ઉદયપુર સેવાનો લાભ મુસાફરોને મળશે.

બીજી તરફ, લોકલ ટ્રેન મુસાફરો માટે ‘વલસાડ-સુરત મેમુ’ (ટ્રેન નંબર ૬૯૧૪૯) પણ ૩ ઓક્ટોબરથી શરૂ થઈ રહી છે. આ ટ્રેન દરરોજ વલસાડથી બપોરે ૧:૨૦ વાગ્યે ઉપડશે અને ડુંગરી, જોરાવસણ, અમલસાડ, બીલીમોરા, અંચેલી, વેડછા, ગાંધી સ્મૃતિ, નવસારી, મરોલી, સચિન, ભેસ્તાન અને ઉધના જેવા સ્ટેશનો પર રોકાઈને સાંજે ૪:૪૦ વાગ્યે સુરત પહોંચશે. આ નવી ટ્રેનો શરૂ થવાથી દક્ષિણ ગુજરાતના નોકરીયાતો, વેપારીઓ અને રાજસ્થાન જતાં પ્રવાસીઓની મુસાફરી વધુ ઝડપી, સુવિધાજનક અને આરામદાયક બનશે.