ચેન્નઈ: તમિલનાડુમાં મહિલા સશક્તિકરણ અને આર્થિક સ્વાવલંબનને નવી ઊંચાઈએ પહોંચાડવા માટે એક ઐતિહાસિક લોકકલ્યાણકારી યોજનાની શરૂઆત કરવામાં આવી છે. રાજ્યના મુખ્યમંત્રી જોસેફ વિજયે ગાંધી જયંતિના પાવન પર્વે ચેન્નઈના કોયમ્બેડુ બસ ટર્મિનલ ખાતેથી મહિલાઓ માટે સરકારી બસોમાં મફત મુસાફરી પૂરી પાડતી ‘વેટ્ટ્રી પયનમ’ (Vettri Payanam – વિજય યાત્રા) યોજનાનું ઉદ્ઘાટન કર્યું હતું. લોન્ચિંગ ઈવેન્ટ દરમિયાન મુખ્યમંત્રી વિજયે પોતે સરકારી બસમાં સવાર થઈને મહિલા મુસાફરોને મફત ટિકિટો આપીને યોજનાનો વિધિવત પ્રારંભ કરાવ્યો હતો. તમિલનાડુ સરકારના દાવો અનુસાર, આ વિસ્તૃત યોજના થકી દરરોજ અંદાજે ૮૫ લાખ જેટલી મહિલાઓને પ્રત્યક્ષ લાભ મળશે.
ઓગસ્ટ મહિનામાં તમિલનાડુ વિધાનસભાના બજેટ સત્ર દરમિયાન મુખ્યમંત્રી જોસેફ વિજયે મહિલાઓ માટેની મફત બસ પ્રવાસ યોજનાનો વ્યાપ વધારવાની મહત્વપૂર્ણ જાહેરાત કરી હતી. સામાજિક ન્યાયના સિદ્ધાંતને આધારે હાથ ધરાયેલી આ પહેલ અંગે વાત કરતા મુખ્યમંત્રીએ જણાવ્યું હતું કે, તમિલનાડુના કોઈપણ ખૂણામાં રહેતી મહિલા માટે મુસાફરીનું ભાડું શિક્ષણ, આરોગ્ય કે રોજગારીની તકો મેળવવામાં ક્યારેય બાધરૂપ બનવું જોઈએ નહીં. આથી જ રાષ્ટ્રપિતા મહાત્મા ગાંધીજીની જન્મજયંતિ એટલે કે ૨ ઓક્ટોબરથી આ યોજનાને સમગ્ર રાજ્યમાં વ્યાપક સ્તરે લાગુ કરવાનો નિર્ણય લેવામાં આવ્યો હતો.
કાર્યક્રમ દરમિયાન રાજ્યના પરિવહન મંત્રી વિજય તમિલન પાર્થિબને યોજનાનું મહત્વ સમજાવતા જણાવ્યું હતું કે, મહિલાની પ્રગતિ એ માત્ર એક વ્યક્તિનો વિકાસ નથી, પરંતુ તે તેના સમગ્ર પરિવાર અને સમાજની ઉન્નતિનો માર્ગ પ્રશસ્ત કરે છે. સરકારી સ્પષ્ટતા મુજબ આ યોજનામાં કોઈપણ પ્રકારનો આવકનો માપદંડ (Income Limit) રાખવામાં આવ્યો નથી, એટલે કે તમામ ક્ષેત્ર અને વર્ગની મહિલાઓ આ લાભ મેળવવા માટે હકદાર રહેશે. આ ઉપરાંત, મહિલાઓ દિવસ દરમિયાન ગમે તેટલી વખત મુસાફરી કરે, તેની સફરની સંખ્યા પર પણ કોઈ મર્યાદા કે કેપિંગ રાખવામાં આવ્યું નથી.
અગાઉ આ યોજના હેઠળ મહિલાઓને મેટ્રોપોલિટન અને શહેરી સામાન્ય બસોમાં માત્ર ૪૦ કિલોમીટર સુધીની મફત સફર કરવાની છૂટ હતી. પરંતુ હવે આ યોજનાનો વિસ્તાર કરીને તેને તમિલનાડુ રાજ્ય માર્ગ પરિવહન નિગમ દ્વારા ચલાવવામાં આવતી એક્સપ્રેસ, એલએસએસ, ડિલક્સ, સબઅર્બન ઓર્ડિનરી અને પહાડી વિસ્તારોની ઘાટ ઓર્ડિનરી બસોમાં પણ લાગુ કરી દેવામાં આવી છે. આ વિસ્તરણ સાથે જ હવે રાજ્યની કુલ ૧૨,૬૯૫ સરકારી બસોમાં મહિલાઓ કોઈપણ ચાર્જ ચૂકવ્યા વિના મુક્તપણે મુસાફરી કરી શકશે, જે તેમના આર્થિક અને સામાજિક સશક્તિકરણમાં ગેમ-ચેન્જર સાબિત થશે.
