નવી દિલ્હી: દિલ્હી પોલીસની એક મહિલા હેડ કોન્સ્ટેબલે એવું પ્રશંસનીય અને માનવતાવાદી કાર્ય કરી બતાવ્યું છે, જેનાથી અનેક નિરાશ અને અસહાય પરિવારોના ચહેરા પર ફરીથી ખુશીની મુસ્કાન પાછી ફરી છે. દક્ષિણ-પૂર્વ દિલ્હી જિલ્લાના જેતપુર પોલીસ સ્ટેશનમાં ફરજ બજાવતા મહિલા હેડ કોન્સ્ટેબલ ચંચલે માત્ર 12 મહિનાના ટૂંકા સમયગાળામાં 119 જેટલા ગુમ થયેલા બાળકોને શોધી કાઢીને સુરક્ષિત રીતે તેમના પરિવારજનો સાથે મિલાવ્યા છે. આ અદ્ભુત કામગીરી ઉપરાંત, તેમણે અન્ય 16 ગુમ થયેલા વયસ્કોને પણ શોધી કાઢવામાં સફળતા મેળવી છે.
119 ગુમ થયેલા બાળકોને શોધી કાઢ્યા
દિલ્હી પોલીસ દ્વારા આપવામાં આવેલી સત્તાવાર માહિતી અનુસાર, હેડ કોન્સ્ટેબલ ચંચલે નવેમ્બર 2025થી ઓક્ટોબર 2026 દરમિયાન આ મોટી સિદ્ધિ હાંસલ કરી છે. તેમણે આ એક વર્ષ દરમિયાન જે 119 ગુમ થયેલા બાળકોને શોધી કાઢ્યા છે, તેમાંથી 41 બાળકોની ઉંમર 14 વર્ષથી પણ ઓછી હતી. જ્યારે બાકીના 78 બાળકો 14થી 18 વર્ષની વય જૂથના હતા. નાની વયના બાળકોના ગુમ થવા પાછળ બળજબરી, માનવ તસ્કરી કે રખડપટ્ટી જેવા ગંભીર જોખમો રહેલા હોય છે, ત્યારે આટલી મોટી સંખ્યામાં બાળકોને શોધી લાવવા એ પોલીસ અધિકારીની નિષ્ઠા દર્શાવે છે.
લાપતા થયેલા બાળકોની શોધખોળ માટે હેડ કોન્સ્ટેબલ ચંચલે સતત તપાસ અને ફોલોઅપ પ્રક્રિયા ચાલુ રાખી હતી. આ જટિલ કામગીરી પૂર્ણ કરવા માટે તેમણે પોલીસની ગુપ્ત માહિતી (ઇન્ટેલિજન્સ), ટેકનિકલ સર્વેલન્સ અને સર્ચ ઓપરેશનનો મહત્તમ ઉપયોગ કર્યો હતો. આ ઉપરાંત, અન્ય રાજ્યોની પોલીસ એજન્સીઓ સાથે પણ નિરંતર સંકલન જાળવી રાખ્યું હતું. ચંચલે દિલ્હી-એનસીઆર ઉપરાંત અન્ય રાજ્યોના ચાઈલ્ડ કેર હોમ્સ, બિન-સરકારી સંસ્થાઓ (NGO) અને ચાઈલ્ડ વેલફેર કમિટીઓ (CWC) સાથે પણ સતત સંપર્ક બનાવી રાખ્યો હતો, જેના કારણે ગુમ થયેલા બાળકોની યોગ્ય ઓળખ થઈ શકી અને તેમને સુરક્ષિત રીતે તેમના ઘર સુધી પહોંચાડી શકાયા.
પોતાના માસુમ બાળકના ગુમ થઈ જવાથી પરિવાર પર શું વીતે છે અને તેમની રાહ જોવી કેટલી પીડાદાયક હોય છે, તેનો અંદાજ લગાવવો પણ અશક્ય છે. આવા કપરા સમયમાં 119 બાળકોને શોધીને તેમના પરિવારો સાથે પુનઃમિલન કરાવવું એ એક અત્યંત પ્રશંસનીય અને મોટી સિદ્ધિ ગણાય. દિલ્હી પોલીસનું કહેવું છે કે મહિલા હેડ કોન્સ્ટેબલ ચંચલની આકરી મહેનત અને ઝીણવટભરી તપાસની પદ્ધતિને કારણે બાળકોને સુરક્ષિત રીતે ઘરે પહોંચાડવામાં મદદ મળી છે. સાથે જ આ કામગીરીથી બાળ સુરક્ષા, બાળ શોષણ અટકાવવા અને માનવ તસ્કરી રોકવાની દિશામાં પણ મોટું યોગદાન મળ્યું છે.
દક્ષિણ-પૂર્વ જિલ્લાના ડીસીપી (DCP) દ્વારા મહિલા હેડ કોન્સ્ટેબલ ચંચલની આ અસાધારણ કામગીરી અને ફરજ નિષ્ઠાની મુક્ત મને સરાહના કરવામાં આવી છે. દિલ્હી પોલીસે જણાવ્યું છે કે તેમની આ અદ્ભુત સિદ્ધિ અન્ય તમામ પોલીસકર્મીઓ અને સુરક્ષા દળો માટે પણ એક ઉત્કૃષ્ટ પ્રેરણા સ્ત્રોત સાબિત થશે.
