ઓર્લાન્ડોથી ઓસ્ટિન જઈ રહેલી ડેલ્ટા એરલાઇન્સની એક ફ્લાઈટમાં મોટી દુર્ઘટના થતા માંડ બચી છે. ૧૯ ઓગસ્ટ, ૨૦૨૫ના રોજ ડેલ્ટા એરલાઇન્સની ફ્લાઇટ ૧૮૯૩, બોઇંગ ૭૩૭-૮૦૦ પ્રકારના વિમાનમાં યાત્રા કરી રહેલા મુસાફરોએ જોયું કે ડાબી પાંખનો એક ફ્લૅપ (ફલક) ઉડાન દરમિયાન આંશિક રીતે અલગ થઈ ગયો હતો, જેના કારણે પાંખમાં સ્પષ્ટ ધ્રુજારી જોવા મળી હતી. આ દ્રશ્ય જોઈને મુસાફરોમાં ગભરાટ ફેલાઈ ગયો હતો, જોકે પાયલોટે પરિસ્થિતિને કાબૂમાં રાખી હતી.
ઓર્લાન્ડોથી ઓસ્ટિન જઈ રહેલી ડેલ્ટા એરલાઇન્સની એક ફ્લાઈટમાં મોટી દુર્ઘટના થતા માંડ બચી#Boeing #Orlando #Austin #Delta #Aviation #InternantionalNews pic.twitter.com/DomUUdSy3x— LokVani (@LVaniNews) August 21, 2025
એક મુસાફર શનિલા આરીફે પોતાના વિડીયોમાં બતાવ્યું કે લગભગ ૧૨,૦૦૦ ફૂટની ઊંચાઈએ ફ્લૅપ લટકી રહ્યો હતો, જેના કારણે તે વિમાનની પૂંછડી સાથે અથડાઈ શકે તેવી ભીતિ હતી. વિમાનમાં ૬૨ મુસાફરો અને ૬ ક્રૂ મેમ્બર્સ સવાર હતા.
વિમાન સ્થાનિક સમય અનુસાર બપોરે ૨:૨૪ વાગ્યે ઓસ્ટિન-બર્ગસ્ટ્રોમ ઇન્ટરનેશનલ એરપોર્ટ પર સુરક્ષિત રીતે ઉતરાણ કર્યું હતું અને કોઈ પણ મુસાફરને ઈજા થઈ ન હતી. લેન્ડિંગ બાદ ડેલ્ટા એરલાઇન્સે ફ્લૅપની સમસ્યાની પુષ્ટિ કરી હતી અને ૨૪.૭ વર્ષ જૂના આ વિમાન (રજીસ્ટ્રેશન N૩૭૪૦C)ને તાત્કાલિક સર્વિસમાંથી બહાર કરીને જાળવણી માટે મોકલી દીધું હતું.
હાલમાં ફેડરલ એવિએશન એડમિનિસ્ટ્રેશન (FAA) આ ઘટનાની તપાસ કરી રહ્યું છે. તપાસનો મુખ્ય ઉદ્દેશ્ય એ છે કે શું આ ઘટના પાછળ જાળવણીમાં કોઈ ભૂલ હતી કે પછી ટેકઓફ દરમિયાન કોઈ નુકસાન થયું હતું. ડેલ્ટા એરલાઇન્સે પોતાના નિવેદનમાં કહ્યું છે કે, “લેન્ડિંગ બાદ એવું જોવામાં આવ્યું કે ડાબી પાંખનો એક ભાગ જગ્યા પર નહોતો. મુસાફરોને થયેલી અસુવિધા માટે અમે માફી માંગીએ છીએ, કારણ કે અમારા લોકો અને ગ્રાહકોની સલામતીથી વધુ કંઈ પણ મહત્વનું નથી.”
