ગાંધીનગર: ગુજરાતના મુખ્યમંત્રી ભૂપેન્દ્ર પટેલ દ્વારા રાજ્ય સરકારના કર્મચારીઓ માટે દિવાળી પર્વ પૂર્વે એક મોટી ભેટની જાહેરાત કરવામાં આવી છે. રાજ્ય સરકારના વર્ગ-૪ ના કર્મચારીઓ આવનારા દિવાળીના તહેવારોને ઉત્સાહપૂર્વક ઉજવી શકે, તે હેતુથી તેમને ₹૭,૦૦૦ ની મર્યાદામાં એડહોક બોનસ આપવાનો મહત્વપૂર્ણ નિર્ણય લેવામાં આવ્યો છે.
મુખ્યમંત્રી કાર્યાલય દ્વારા કરવામાં આવેલી આ જાહેરાત મુજબ, આ નિર્ણયથી રાજ્યના અંદાજે ૧૬,૯૨૧ વર્ગ-૪ના કર્મચારીઓને સીધો લાભ મળશે. આ બોનસની જાહેરાતથી કર્મચારીઓમાં ખુશીનો માહોલ છવાયો છે.
રાજ્ય સરકારના વર્ગ-4 ના કર્મચારીઓ આગામી દિવાળીના તહેવારો ઉત્સાહપૂર્વક ઉજવી શકે, તે માટે તેમને રૂપિયા 7000 ની મર્યાદામાં એડહોક બોનસ આપવાનો નિર્ણય કર્યો છે.
આ બોનસનો લાભ વર્ગ-4ના અંદાજે 16,921 કર્મચારીઓ તથા રાજ્ય મંત્રીમંડળ પરના મહેકમ પરના, વિધાનસભા અધ્યક્ષશ્રીના, દંડકશ્રીના,…— Bhupendra Patel (@Bhupendrapbjp) October 6, 2025
કોને કોને મળશે આ બોનસનો લાભ?
આ એડહોક બોનસ માત્ર રાજ્ય સરકારના વર્ગ-૪ના નિયમિત કર્મચારીઓ પૂરતું સીમિત નથી. આ બોનસનો લાભ નીચે મુજબના કર્મચારીઓને પણ મળવાપાત્ર થશે:
- રાજ્ય મંત્રીમંડળ પરના મહેકમ પરના કર્મચારીઓ.
- વિધાનસભા અધ્યક્ષશ્રીના, દંડકશ્રીના, નાયબ દંડક અને ઉપદંડકશ્રીના મહેકમ પરના કર્મચારીઓ.
- પંચાયતોમાં ફરજ બજાવતા વર્ગ-૪ના કર્મચારીઓ.
- યુનિવર્સિટી સંલગ્ન કોલેજોના કર્મચારીઓ.
- ગ્રાન્ટ-ઈન-એઈડ શાળા અને કોલેજોના કર્મચારીઓ.
- રાજ્ય સરકારના બોર્ડ-કોર્પોરેશનમાં ફરજ બજાવતા તેવા વર્ગ-૪ના કર્મચારીઓ, જેમને હાલમાં બોર્ડ-કોર્પોરેશન દ્વારા કોઈ બોનસ ચૂકવવામાં આવતું નથી.
સરકારના આ નિર્ણયથી વર્ગ-૪ના કર્મચારીઓને આર્થિક ટેકો મળશે, જેનાથી તેઓ મોંઘવારીના આ સમયમાં તહેવારોની ઉજવણી સારી રીતે કરી શકશે. રાજ્ય સરકારનો આ નિર્ણય તહેવારોના સમયે કર્મચારીઓની સુખાકારી અને ઉત્સાહ વધારવા તરફનો સકારાત્મક પગલું છે.
