વડોદરા: ગુજરાત પોલીસના સાયબર સેન્ટર ઓફ એક્સેલન્સ (CCE) એ વડોદરા શહેરમાંથી એક મસમોટા સાયબર ફ્રોડ નેટવર્કનો પર્દાફાશ કર્યો છે. આ ગેંગે દેશભરમાં અંદાજે ₹210 કરોડ ના વ્યવહારો બેંક એકાઉન્ટ્સ દ્વારા કરી સાયબર છેતરપિંડી આચરી હોવાનું બહાર આવ્યું છે. પોલીસે આ મામલે મુખ્ય સૂત્રધાર સહિત 6 શખ્સોની ધરપકડ કરી છે.
કઈ રીતે આચરતા હતા કૌભાંડ?
તપાસનીશ અધિકારીઓના જણાવ્યા અનુસાર, આરોપીઓ ‘મની મ્યુલ’ (નાણાકીય હેરાફેરી માટે વપરાતા ભાડૂતી એકાઉન્ટ) તરીકે સામાન્ય લોકોના નામે બેંક એકાઉન્ટ ખોલાવતા હતા. આ ગેંગ નીચે મુજબની મોડસ ઓપરેન્ડી અપનાવતી હતી:
- બેંકિંગ કીટનો કબજો: આરોપીઓ લોકોના નામે ખાતા ખોલાવી ડેબિટ કાર્ડ, ચેકબુક અને પાસબુક મેળવી લેતા હતા.
- SIM કાર્ડનું સેટિંગ: એકાઉન્ટ સાથે લિંક કરવા માટે અલગથી સિમ કાર્ડની વ્યવસ્થા કરી તમામ ટ્રાન્ઝેક્શન પોતાના મોબાઈલથી ઓપરેટ કરતા હતા.
- રોકડ ઉપાડ: ઓનલાઈન સ્કેમ દ્વારા મેળવેલા નાણાં આ એકાઉન્ટ્સમાં જમા થતા જ તેઓ તરત જ ઉપાડી લેતા હતા.
માસ્ટરમાઇન્ડ ‘મોન્ટુ’ અને તેની ગેંગ
પોલીસે દીપેશ રાજપુરોહિત ઉર્ફે મોન્ટુ ને આ કૌભાંડનો માસ્ટરમાઇન્ડ જાહેર કર્યો છે. તે પોતે અંદાજે 40 જેટલા શંકાસ્પદ બેંક એકાઉન્ટ્સ સંભાળતો હતો. તેની સાથે પકડાયેલા અન્ય આરોપીઓમાં:
- અદુલ કબીર મોહમ્મદ ઇલ્યાસ પઠાણ
- વિવેક વણઝારા
- મયંક બૈરવા
- રોહિત વર્મા
- મોહિત રાવલનો સમાવેશ થાય છે.
210 કરોડના ટ્રાન્ઝેક્શન અને 273 ફરિયાદો
આરોપીઓ પાસેથી મળી આવેલા 11 મોબાઈલ ફોનની તપાસ કરતા 50 જેટલા બેંક એકાઉન્ટની વિગતો મળી છે. નેશનલ સાયબર ક્રાઈમ હેલ્પલાઈન 1930 પર આ એકાઉન્ટ્સના સંદર્ભમાં અત્યાર સુધીમાં 273 ફરિયાદો નોંધાઈ ચૂકી છે. આ ગેંગ ડિજિટલ અરેસ્ટ સ્કેમ, ઇન્વેસ્ટમેન્ટ ફ્રોડ, લોન ફ્રોડ, UPI સ્કેમ અને ઓનલાઈન ગેમિંગ ફ્રોડ જેવી અનેક શ્રેણીઓમાં સક્રિય હતી.
ગુજરાત પોલીસ હવે આ કૌભાંડના છેડા ક્યાં સુધી વિસ્તરેલા છે અને અન્ય કયા લોકો આમાં સંડોવાયેલા છે તેની ઝીણવટભરી તપાસ કરી રહી છે.
