મુંબઈ: ભારતીય સિનેમાના ઈતિહાસમાં ૧૯ માર્ચ ૨૦૨૬નો દિવસ સુવર્ણ અક્ષરે લખાશે. રણવીર સિંહ સ્ટારર ફિલ્મ ‘ધુરંધર ૨’ એ થીયેટરોમાં રિલીઝ થતાની સાથે જ બોક્સ ઓફિસ પર સુનામી લાવી દીધી છે. આ ફિલ્મે પહેલા જ દિવસે વર્લ્ડવાઈડ ૨૦૦ કરોડથી વધુનું કલેક્શન કરીને ફિલ્મ ઈન્ડસ્ટ્રીના તમામ પંડિતોને ચોંકાવી દીધા છે. બોલિવૂડની કોઈ ફિલ્મે અત્યાર સુધી ૧૫૦ કરોડની ઓપનિંગ પણ જોઈ નહોતી, ત્યારે ‘ધુરંધર ૨’ એ ૨૦૦ કરોડનો પહાડ પાર કરી નવો બેન્ચમાર્ક સેટ કર્યો છે.
શાહરૂખ અને અલ્લુ અર્જુનના રેકોર્ડ ધ્વંસ
રણવીર સિંહની આ ફિલ્મે શાહરૂખ ખાનની ‘જવાન’ અને સાઉથના સુપરસ્ટાર અલ્લુ અર્જુનની ‘પુષ્પા ૨’ ના સૌથી મોટા ઓપનિંગ રેકોર્ડ્સને તોડી નાખ્યા છે. માત્ર ભારતમાં જ આ ફિલ્મે ૧૦૦ કરોડથી વધુની કમાણી કરી છે, જ્યારે પેડ પ્રીવ્યૂઝ દ્વારા જ ફિલ્મે અંદાજે ૪૨ થી ૫૦ કરોડનો આંકડો સ્પર્શી લીધો હતો. વર્ષ ૨૦૨૬ની સૌથી મોટી ઓપનિંગનો તાજ હવે રણવીર સિંહના નામે શણગારાયો છે. જે કમાણી સન્ની દેઓલની ‘બોર્ડર ૨’ ન કરી શકી, તે રણવીરની ‘ધુરંધર ૨’ એ કરી બતાવી છે.
વીકેન્ડમાં ૮૦૦ કરોડનો લક્ષ્યાંક
ફિલ્મના કલેક્શનની ગતિ જોતા નિષ્ણાંતો માની રહ્યા છે કે પ્રથમ વીકેન્ડમાં જ આ ફિલ્મ ૮૦૦ કરોડની નજીક પહોંચી જશે. વર્લ્ડવાઈડ ગ્રોસ કલેક્શન અત્યારે ૧૭૨ કરોડથી વધુ હોવાનું મનાઈ રહ્યું છે, પરંતુ ફાઈનલ આંકડાઓ હજુ પણ આનાથી વધુ હોવાની શક્યતા છે. ફિલ્મે રિલીઝના ૨૪ કલાકમાં જ ૨૦ જેટલા મહાકાય રેકોર્ડ્સ પોતાના નામે કર્યા છે.
દર્શકોનો અભૂતપૂર્વ પ્રતિસાદ
સમગ્ર દેશમાં ‘ધુરંધર ૨’ માટે ક્રેઝ જોવા મળી રહ્યો છે. હાઈ-ઓક્ટેન એક્શન અને રણવીર સિંહના પાવરફુલ પર્ફોર્મન્સને કારણે સોશિયલ મીડિયા પર પણ ફિલ્મની ભારે પ્રશંસા થઈ રહી છે. મલ્ટીપ્લેક્સથી લઈને સિંગલ સ્ક્રીન સુધી તમામ શો હાઉસફુલ જઈ રહ્યા છે. રણવીર સિંહ માટે આ ફિલ્મ તેના કરિયરની અત્યાર સુધીની સૌથી મોટી માઈલસ્ટોન સાબિત થઈ રહી છે.
