કચ્છ જિલ્લામાં વહીવટી અધિકારી અને ચૂંટાયેલા પ્રતિનિધિઓ વચ્ચે તણાવનો મોટો બનાવ સામે આવ્યો છે. માંડવી તાલુકા પંચાયત કચેરી ખાતે યોજાયેલી ગ્રામ વિકાસની રિવ્યૂ બેઠકમાં હાજર રહેલા DDO (જિલ્લા વિકાસ અધિકારી)એ સરપંચ પ્રતિનિધિઓને ‘ગેટ આઉટ’ (Get Out) કહી દેતાં સમગ્ર મામલો વિફર્યો હતો. આ ઘટના બાદ DDOના વિરોધમાં જોરદાર સૂત્રોચ્ચાર કરવામાં આવ્યા હતા અને ચૂંટાયેલા પ્રતિનિધિઓએ DDOને તેમની ચેમ્બર બહાર નીકળવા દીધા નહોતા.
મળતી માહિતી મુજબ, બેઠક દરમિયાન જ્યારે સરપંચ પ્રતિનિધિઓ ગ્રામ વિકાસ અને જનતાને લગતા મુદ્દાઓ અંગે DDO સમક્ષ રજૂઆત કરી રહ્યા હતા, ત્યારે કોઈ કારણોસર ઉગ્ર બોલાચાલી થઈ હતી. આ બોલાચાલી દરમિયાન DDOએ ગુસ્સે થઈને પ્રતિનિધિઓને ‘તમે અહીંથી બહાર નીકળી જાઓ’ (Get Out) એમ કહી દીધું હતું. DDOના આ વર્તનને કારણે ચૂંટાયેલા પ્રતિનિધિઓ અને સરપંચ પ્રતિનિધિઓ રોષે ભરાયા હતા.
DDO પર ગંભીર આક્ષેપો:
વિરોધ કરી રહેલા ચૂંટાયેલા પ્રતિનિધિઓએ DDO પર ગંભીર આક્ષેપો કર્યા હતા કે તેમને ગ્રામ વિકાસ સંબંધિત સમસ્યાઓ અને લોકોની રજૂઆતો કરવા દેવામાં આવતી નહોતી. પ્રતિનિધિઓએ આક્ષેપ કર્યો કે અધિકારીઓ ચૂંટાયેલા પ્રતિનિધિઓનું અપમાન કરી રહ્યા છે અને લોકશાહી ઢબે ચૂંટાયેલા પ્રતિનિધિઓની અવગણના કરી રહ્યા છે.
પરિસ્થિતિ એટલી તંગ બની ગઈ કે DDOને તેમના ચેમ્બરમાંથી બહાર નીકળવું મુશ્કેલ બન્યું હતું. અંતે, મામલો શાંત પાડવા માટે પોલીસની મદદ લેવી પડી હતી. પોલીસ રક્ષણ મળ્યા બાદ જ DDO માંડ-માંડ પંચાયત કચેરીની બહાર નીકળી શક્યા હતા. આ ઘટનાએ કચ્છ જિલ્લાના વહીવટી અને રાજકીય વર્તુળોમાં ભારે ચર્ચા જગાવી છે.
