ડાંગ: ગુજરાતના પ્રાકૃતિક સૌંદર્યથી ભરપૂર ડાંગ જિલ્લામાં આદિવાસી સંસ્કૃતિના જતન સાથે વર્ષોથી ચાલ્યા આવતા કેટલાક અનિષ્ટ કુરિવાજો અને અંધશ્રદ્ધા સામે ડાંગ પોલીસે બાંયો ચડાવી છે. જિલ્લામાં મહિલાઓને ડાકણ પ્રથા અથવા અંધશ્રદ્ધાને કારણે થતા શારીરિક અને માનસિક અત્યાચારથી બચાવવા માટે વર્ષ ૨૦૨૩માં ‘પ્રોજેક્ટ દેવી’ (Project Devi) ની શરૂઆત કરવામાં આવી હતી. આ પ્રોજેક્ટ આજે અનેક મહિલાઓ માટે નવજીવન સમાન સાબિત થયો છે.
She Team દ્વારા ઘરે-ઘરે જઈને સુરક્ષાની ખાતરી
આ પ્રોજેક્ટ હેઠળ ડાંગ જિલ્લાની She Team અત્યંત અંતરિયાળ વિસ્તારોમાં જઈને આદિવાસી મહિલાઓની રૂબરૂ મુલાકાત લે છે. ટીમ દ્વારા મહિલાઓના પ્રશ્નો સાંભળવામાં આવે છે અને જે મહિલાઓને અંધશ્રદ્ધાને નામે પ્રતાડિત કરવામાં આવતી હોય તેમને તાત્કાલિક પોલીસ રક્ષણ પૂરું પાડવામાં આવે છે. અત્યાર સુધીમાં અંદાજે ૭૦ જેટલી મહિલાઓને આ કુરિવાજોના શિકાર બનતા અટકાવી સુરક્ષિત કરવામાં આવી છે.
ગોલ્ડ સ્કોચ એવોર્ડથી સન્માનિત
ડાંગ પોલીસની આ સંવેદનાસભર કામગીરીની નોંધ રાષ્ટ્રીય સ્તરે લેવામાં આવી છે. પ્રોજેક્ટ દેવીને તેની સફળતા અને સામાજિક બદલાવ લાવવાની ક્ષમતા બદલ પ્રતિષ્ઠિત ‘ગોલ્ડ સ્કોચ એવોર્ડ’ (Gold SKOCH Award) એનાયત કરવામાં આવ્યો છે. પોલીસના આ માનવીય અભિગમે આદિવાસી સમાજમાં પોલીસ પ્રત્યેનો વિશ્વાસ મજબૂત કર્યો છે.
કાયદાકીય મદદ અને જાગૃતિ
માત્ર રક્ષણ જ નહીં, પરંતુ પોલીસ દ્વારા મહિલાઓને તેમના પર થતા અત્યાચાર સામે કઈ કઈ કાયદાકીય જોગવાઈઓ છે તેની પણ સમજ આપવામાં આવે છે. અંધશ્રદ્ધા ફેલાવતા તત્વો સામે કડક કાર્યવાહી કરવાની સાથે સાથે ગ્રામીણ કક્ષાએ જનજાગૃતિ શિબિરો યોજીને સમાજને આ અનિષ્ટોથી દૂર રહેવા પ્રોત્સાહિત કરવામાં આવે છે. આ અભિગમને કારણે ડાંગમાં મહિલાઓ હવે નિડરતાથી પોતાના હકો માટે અવાજ ઉઠાવતી થઈ છે.
