જામનગર: ગુજરાતનું જામનગર ફરી એકવાર આંતરરાષ્ટ્રીય વાયુસેનાના વિમાનોનું સાક્ષી બન્યું છે. રિપબ્લિક ઓફ કોરિયા એરફોર્સ (RoKAF) ની સુપ્રસિદ્ધ ‘બ્લેક ઈગલ્સ’ (Black Eagles) એરોબેટિક ટીમના વિમાનોએ જામનગર એરફોર્સ સ્ટેશન ખાતે ટ્રાન્ઝિટ હોલ્ટ કર્યો હતો. સૌદી અરેબિયામાં યોજાનારા ‘વર્લ્ડ ડિફેન્સ શો 2026’ (World Defence Show 2026) માં ભાગ લેવા જઈ રહેલી આ ટીમને ભારતીય વાયુસેના (IAF) દ્વારા તમામ પ્રકારની સુવિધાઓ પૂરી પાડવામાં આવી હતી.
9 ફાઈટર વિમાનો અને C-130 નું આગમન
દક્ષિણ કોરિયાની આ ટુકડીમાં 9 T-50B એરોબેટિક વિમાનો અને એક C-130 હર્ક્યુલસ પરિવહન વિમાનનો સમાવેશ થતો હતો. આ કાફલો 31 જાન્યુઆરીથી 1 ફેબ્રુઆરી, 2026 દરમિયાન જામનગરમાં રોકાયો હતો. આ દરમિયાન ભારતીય વાયુસેનાએ લેન્ડિંગ, ટેકનિકલ સુવિધાઓ ઉપરાંત કસ્ટમ્સ અને ઈમિગ્રેશન પ્રક્રિયામાં સંપૂર્ણ સહયોગ આપ્યો હતો.
વૈશ્વિક મંચ પર ભારતની ભૂમિકા
ભારતીય વાયુસેનાએ સોશિયલ મીડિયા પર આ અંગે માહિતી આપતા ‘બ્લેક ઈગલ્સ’ ટીમને સુરક્ષિત ઉડાન અને સફળ લેન્ડિંગ માટે શુભેચ્છાઓ પાઠવી હતી. જામનગર એરફોર્સ સ્ટેશન વ્યૂહાત્મક રીતે અત્યંત મહત્વનું છે અને આંતરરાષ્ટ્રીય ઉડાન ભરતા મિત્ર દેશોના વિમાનો માટે તે એક મહત્વના બેઝ તરીકે કાર્ય કરે છે. દક્ષિણ કોરિયાની આ ટીમના આધુનિક વિમાનોને જામનગરના આકાશમાં નિહાળવા એ એક અદ્ભુત લ્હાવો હતો.
આ ટ્રાન્ઝિટ હોલ્ટ ભારત અને દક્ષિણ કોરિયા વચ્ચેના મજબૂત સંરક્ષણ સંબંધો અને પરસ્પર વિશ્વાસને પ્રદર્શિત કરે છે. ‘બ્લેક ઈગલ્સ’ ટીમ હવે સૌદી અરેબિયા પહોંચીને વિશ્વ સમક્ષ પોતાનું કૌશલ્ય પ્રદર્શિત કરશે.
