સુરત: હીરા અને કાપડ નગરી તરીકે જાણીતું સુરત અત્યારે મધ્ય પૂર્વમાં ફાટી નીકળેલા યુદ્ધના કારણે ભારે ચિંતામાં મુકાયું છે. ઈરાન અને ઈઝરાયલ વચ્ચે શરૂ થયેલા ભયાનક યુદ્ધના કારણે સુરતનો ટેક્સટાઇલ ઉદ્યોગ સીધી રીતે પ્રભાવિત થયો છે. સુરતથી મોટાપાયે કાપડનો જથ્થો દરિયાઈ માર્ગે દુબઈ જાય છે અને ત્યાંથી અન્ય ખાડી દેશોમાં સપ્લાય કરવામાં આવે છે, પરંતુ હાલની સ્થિતિમાં આ સપ્લાય ચેઈન સંપૂર્ણપણે ખોરવાઈ ગઈ છે.
રમઝાન માસની તેજી પર પાણી ફરી વળ્યું
વર્તમાન સમયમાં પવિત્ર રમઝાન માસ ચાલી રહ્યો છે, જે સુરતના કાપડ વેપારીઓ માટે વર્ષની સૌથી મોટી સીઝન ગણાય છે. રમઝાન અને ઈદ નિમિત્તે દુબઈ, સાઉદી અરેબિયા, કુવૈત અને ઓમાન જેવા દેશોમાં સુરતની કુર્તીઓ, ડ્રેસ મટીરીયલ્સ અને સાડીઓની ભારે માંગ રહેતી હોય છે. જોકે, ઈરાન દ્વારા ૧૦ જેટલા ખાડી દેશો પર હુમલો અને એરપોર્ટ-બંદરો બંધ થવાના કારણે ઓર્ડર તૈયાર હોવા છતાં માલ રવાના થઈ શકતો નથી.
દરિયાઈ અને હવાઈ માર્ગો ઠપ્પ
ઈરાન દ્વારા સમુદ્રમાં મિસાઈલ હુમલા અને એર સ્પેસ બંધ કરવાના નિર્ણયને કારણે માલવાહક જહાજો મધદરિયે અટવાયા છે. સુરતના ટેક્સટાઇલ એક્સપોર્ટર્સ જણાવી રહ્યા છે કે જો આગામી બે-ત્રણ દિવસમાં પરિસ્થિતિ સામાન્ય નહીં થાય, તો સુરતના કાપડ બજારને કરોડો રૂપિયાનું નુકસાન વેઠવાનો વારો આવશે. માલ સમયસર ન પહોંચવાના કારણે વિદેશી ખરીદદારો ઓર્ડર કેન્સલ કરી રહ્યા છે.
વેપારીઓની મુશ્કેલીમાં તોતિંગ વધારો
સ્થાનિક વેપારીઓના મતે, સુરતનું કાપડ જે દરિયાઈ માર્ગે દુબઈ પહોંચતું હતું તે હવે અનિશ્ચિત સમય માટે અટકી ગયું છે. યુદ્ધની આ માઠી અસર માત્ર નિકાસ પર જ નહીં, પરંતુ સુરતના પ્રોસેસિંગ હાઉસ અને વણકરો પર પણ પડશે, કારણ કે નવા ઓર્ડર મળતા બંધ થયા છે. જો આ સંઘર્ષ લાંબો ચાલશે તો સુરતના કાપડ ઉદ્યોગ માટે વર્ષ ૨૦૨૬ અત્યંત પડકારજનક સાબિત થઈ શકે છે.
