અબુધાબી: મધ્ય પૂર્વમાં ઈરાન અને ઈઝરાયેલ વચ્ચે ચાલી રહેલા ભયાનક યુદ્ધની સીધી અસર હવે સંયુક્ત આરબ અમીરાત (UAE) પર પણ જોવા મળી રહી છે. ઈરાન દ્વારા અબુધાબી સહિત અનેક સ્થળો પર કરવામાં આવી રહેલા મિસાઈલ હુમલાઓને ધ્યાનમાં રાખીને, અબુધાબી સ્થિત ભવ્ય BAPS હિન્દુ મંદિરને મુલાકાતીઓ માટે અસ્થાયી રૂપે બંધ રાખવાનો નિર્ણય લેવાયો છે. સત્તાવાર જાહેરાત મુજબ, આ મંદિર સોમવાર, 9 માર્ચ 2026 સુધી મુલાકાતીઓ માટે બંધ રહેશે.
સ્વામીજીઓ દ્વારા શાંતિ અને રક્ષણ માટે પ્રાર્થના
મંદિર પ્રશાસને જણાવ્યું છે કે રાષ્ટ્રીય સુરક્ષા એડવાઈઝરીને અનુસરીને અને ભક્તોની સલામતીને સર્વોપરી ગણીને આ સાવચેતીભર્યું પગલું ભરવામાં આવ્યું છે. ભલે મુલાકાતીઓ માટે દ્વાર બંધ હોય, પરંતુ મંદિરની અંદર સંતો-સ્વામીજીઓ દ્વારા સતત પ્રાર્થનાઓ કરવામાં આવી રહી છે. આ મુશ્કેલ સમયમાં વિશ્વમાં શાંતિ સ્થપાય, સૌનું રક્ષણ થાય અને માનવજાતનું કલ્યાણ થાય તેવા ઉમદા ઉદ્દેશ્ય સાથે પવિત્ર ગર્ભગૃહમાં વિશેષ પૂજા-અર્ચના ચાલુ રાખવામાં આવી છે.
નાગરિકોને વહીવટી તંત્રનું માર્ગદર્શન અનુસરવા અપીલ
વર્તમાન તણાવભરી પરિસ્થિતિમાં મંદિર પ્રશાસન અને સત્તાવાળાઓ દ્વારા ભક્તોને કેટલીક મહત્વની વિનંતીઓ કરવામાં આવી છે:
- શાંતિ જાળવો: કોઈપણ અફવાઓથી દૂર રહો અને ગભરાટ ફેલાવશો નહીં.
- સુરક્ષિત રહો: જ્યાં સૂચના આપવામાં આવે ત્યાં ઘરની અંદર જ રહો અને બિનજરૂરી બહાર નીકળવાનું ટાળો.
- સત્તાવાર માધ્યમો: માત્ર સરકારી ચેનલો દ્વારા શેર કરાયેલ સુરક્ષા માર્ગદર્શિકાનું જ ચુસ્તપણે પાલન કરો.
- પ્રાર્થના અને શ્રદ્ધા: ઘરે રહીને વ્યક્તિગત પ્રાર્થના કરો અને રાષ્ટ્રની એકતા, જવાબદારી અને વિશ્વાસમાં અડગ રહો.
સરકાર અને વહીવટી તંત્ર નાગરિકોની સુરક્ષા માટે રાત-દિવસ કામ કરી રહ્યું છે, ત્યારે સૌને એકતા અને શ્રદ્ધા સાથે સહકાર આપવા વિનંતી કરવામાં આવી છે.
