વડોદરા: વડોદરા શહેર પીસીબી (PCB) શાખાને એક ચોક્કસ બાતમી મળી હતી કે દંતેશ્વર, ચિત્રાનગર સોસાયટીમાં રહેતો અમિત સોલંકી નામનો ઈસમ પોતાની કાળા કલરની ફોર વ્હીલરમાં ખાસ બનાવેલી ટાંકીઓમાં ગોવા ખાતેથી ઈંગ્લીશ દારૂનો જથ્થો ભરીને વડોદરા આવી રહ્યો છે. બાતમી મુજબ, આ ઈસમ ચિખોદરા-ધનયાવી તરફથી થઈ તરસાલી થઈ વડોદરામાં પ્રવેશવાનો હતો. આ હકીકતને આધારે પીસીબીની ટીમે વોચ ગોઠવી હતી અને શંકાસ્પદ ફોર વ્હીલર આવતા જ તેને આંતરીને તલાશી લેતા ચોંકાવનારી વિગતો બહાર આવી હતી.
રાજસ્થાનમાં કરાવાયું હતું કારનું ‘સ્પેશિયલ મોડિફિકેશન’
પોલીસ તપાસમાં બહાર આવ્યું કે આરોપીએ દારૂની હેરાફેરી માટે અત્યંત શાતિર મગજ લડાવ્યું હતું. તેણે આ ફોર વ્હીલરમાં દારૂ ભરવા માટેની ત્રણ વિશેષ ટાંકીઓ રાજસ્થાન ખાતેથી બનાવડાવી હતી. ટાંકીઓમાં દારૂ ભરવા માટેના ઢાંકણ પાછળની લાઈટોમાં અને સીટની પાછળ છૂપી રીતે ફિટ કર્યા હતા. ટાંકીમાંથી દારૂ બહાર કાઢવા માટેના વાલ્વ પાછળના ટાયર ઉપરના ગાર્ડની અંદર છૂપી રીતે ફિટ કરવામાં આવ્યા હતા.
ગોવાના બારમાંથી ખરીદી અને વડોદરામાં છૂટક વેચાણ
આરોપી અમિત મણીલાલ સોલંકી ગોવા ખાતેથી અલગ-અલગ બારમાંથી ઈંગ્લીશ દારૂની ખરીદી કરતો હતો અને આ છૂપી ટાંકીઓમાં દારૂ ભરી વડોદરા લાવીને તેનું છૂટક વેચાણ કરતો હતો. પોલીસે આ મામલે કપુરાઈ પોલીસ સ્ટેશન ખાતે ગુનો રજીસ્ટર કરી કાયદેસરની કાર્યવાહી હાથ ધરી છે.
કબજે કરેલો મુદ્દામાલ
પોલીસે આ ઓપરેશનમાં કુલ ₹9,17,980 ની કિંમતનો મુદ્દામાલ જપ્ત કર્યો છે, જેની વિગતો નીચે મુજબ છે:
| મુદ્દામાલની વિગત | કિંમત (રૂપિયામાં) |
| ૨૪૫ લિટર છૂટ્ટો દારૂ | ₹3,67,500 |
| ઈંગ્લીશ દારૂની બોટલો | ₹24,000 |
| કાળા કલરની ફોર વ્હીલર ગાડી | ₹5,00,000 |
| રોકડ રકમ | ₹16,480 |
| બે મોબાઈલ ફોન | ₹10,000 |
