અમદાવાદ: ગુજરાતમાં એક તરફ માર્ચ મહિનાની શરૂઆતથી જ કાળઝાળ ગરમી પડી રહી છે, ત્યાં બીજી તરફ હવામાન વિભાગ દ્વારા કમોસમી વરસાદની આગાહી કરવામાં આવતા ખેડૂતો અને નાગરિકોમાં ચિંતાનો માહોલ જોવા મળી રહ્યો છે. હવામાન કેન્દ્ર અમદાવાદ દ્વારા જાહેર કરવામાં આવેલા લેટેસ્ટ મેપ અને આગાહી મુજબ, આગામી ૧૮ થી ૨૦ માર્ચ દરમિયાન રાજ્યના વિવિધ ભાગોમાં હળવાથી મધ્યમ વરસાદની શક્યતા છે.
તારીખ મુજબ વરસાદની આગાહી:
૧૮ માર્ચ ૨૦૨૬: કચ્છ, બનાસકાંઠા, પાટણ, મહેસાણા, સાબરકાંઠા, મોરબી, જામનગર અને દેવભૂમિ દ્વારકા જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદ (૪૦-૫૦ કિમીની ઝડપે પવન) પડી શકે છે.
૧૯ માર્ચ ૨૦૨૬: વરસાદનો વ્યાપ વધશે. સૌરાષ્ટ્રના મોટાભાગના જિલ્લાઓ સહિત મધ્ય અને દક્ષિણ ગુજરાતના વડોદરા, ભરૂચ, સુરત, તાપી, ડાંગ અને નવસારી જિલ્લામાં ગાજવીજ સાથે વરસાદની આગાહી છે.
૨૦ માર્ચ ૨૦૨૬: ઉત્તર ગુજરાત અને પૂર્વ ગુજરાતના અરવલ્લી, મહીસાગર અને દાહોદ જિલ્લામાં વરસાદી માહોલ રહેવાની સંભાવના છે.
ખેડૂતો માટે માઠા સમાચાર
આ માવઠાની સૌથી વધુ અસર કૃષિ પાકો પર પડી શકે છે. હાલમાં ખેતરોમાં રવિ પાકની લણણી ચાલી રહી છે, ત્યારે અચાનક વરસાદ અને તેજ પવનને કારણે જીરું, ઘઉં અને કેરીના પાકને નુકસાન થવાની ભીતિ સેવાઈ રહી છે. હવામાન વિભાગે માછીમારો અને ખેડૂતોને સાવચેત રહેવા અને કાપણી કરેલો પાક સુરક્ષિત સ્થળે ખસેડવા સલાહ આપી છે.
ગરમી અને હીટવેવ વચ્ચે રાહત કે આફત?
નોંધનીય છે કે, અમદાવાદ મ્યુનિસિપલ કોર્પોરેશન દ્વારા હીટવેવને કારણે બપોરે ૧૨ થી ૪ વાગ્યા સુધી ટ્રાફિક સિગ્નલ બંધ રાખવાનો નિર્ણય લેવાયો છે. આવા સમયે વરસાદ આવવાથી તાપમાનમાં કામચલાઉ ઘટાડો થઈ શકે છે, પરંતુ વાતાવરણમાં ભેજ વધવાને કારણે બફારો (Humidity) પણ વધી શકે છે.
