બનાસકાંઠા: ગુજરાતના ડિજિટલ મનોરંજન જગત અને સોશિયલ મીડિયા પર પોતાની આગવી દેશી કોમેડીથી કરોડો લોકોના ચહેરા પર સ્મિત લાવનારા જાણીતા ઈન્ફ્લુએન્સર ‘ગુજ્જુ લવ ગુરુ’ ઉર્ફે ચંદનભાઈ ઢેગણભાઈ રાઠોડનું એક ભયાનક માર્ગ અકસ્માતમાં દુઃખદ અવસાન થયું છે. બનાસકાંઠા જિલ્લાના ભાભર-સુઈગામ હાઈવે પર હરિધામ ગૌશાળા નજીક બે બાઈકો વચ્ચે સર્જાયેલા ગંભીર અકસ્માતમાં ચંદનભાઈ રાઠોડને ગંભીર ઈજાઓ પહોંચી હતી. અકસ્માત બાદ તેમને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા હતા, પરંતુ સારવાર દરમિયાન તેમણે અંતિમ શ્વાસ લીધા હતા. આ કરૂણ ઘટનાના સમાચાર વાયુવેગે પ્રસરતાં જ ઉત્તર ગુજરાતના વાવ-થરાદ, સુઈગામ પંથક સહિત સમગ્ર રાજ્યના તેમના ચાહકોમાં ઘેરા શોકની લાગણી છવાઈ ગઈ છે.
અત્યંત સામાન્ય પરિસ્થિતિમાંથી પોતાની કલાત્મક સફર શરૂ કરી
બનાસકાંઠા જિલ્લાના સુઈગામ પંથકના વતની એવા ચંદન રાઠોડે અત્યંત સામાન્ય પરિસ્થિતિમાંથી પોતાની કલાત્મક સફર શરૂ કરી હતી. સોશિયલ મીડિયા પર પોતાની ઉત્તર ગુજરાતની કચ્છી-ગુજરાતી મિશ્રિત તળપદી બોલી, નિર્દોષ હાસ્ય અને અનોખી રજૂઆતથી તેઓ જોતજોતામાં લોકપ્રિયતાના શિખરે પહોંચી ગયા હતા. ઈન્સ્ટાગ્રામ પર તેમના ૧.૮ મિલિયન (૧૮ લાખ) થી પણ વધુ ફોલોઅર્સ હતા. તેઓ મુખ્યત્વે ગામડાના રોજિંદા જીવન, લગ્ન-સગપણમાં થતી છેતરામણીઓ, અને યુવાનોના વિષયો પર આધારિત ‘દેશી કન્ટેન્ટ’ બનાવતા હતા. તેમના ‘ડોબા ડોક્ટર’ અને ‘વાહતા વાડીના અખાતરા’ જેવા કોમેડી વીડિયો સોશિયલ મીડિયા પર ખૂબ જ ટ્રેન્ડ થયા હતા.
પોતાની અદ્ભુત કલા અને લોકપ્રિયતાના જોરે ચંદન રાઠોડે સોશિયલ મીડિયાથી આગળ વધીને ગુજરાતી ફિલ્મ ઈન્ડસ્ટ્રી સુધી પણ પોતાની ઓળખ બનાવી હતી. તેમણે ગુજરાતી ફિલ્મોના સુપરસ્ટાર વિક્રમ ઠાકોર સાથે ‘તુ અધૂરી વાર્તાનો છેડો’ નામની ફિલ્મમાં પણ મહત્વપૂર્ણ ભૂમિકા ભજવી હતી. અત્યંત નાની વયે સોશિયલ મીડિયા અને મનોરંજન ક્ષેત્રે પોતાની આગવી છાપ છોડનારા આ કલાકારના અચાનક વિદાયથી ચાહકો અને ગુજરાતી ફિલ્મ ક્ષેત્રના કલાકારો સ્તબ્ધ થઈ ગયા છે. અકસ્માતની જાણ થતાં જ પોલીસ કાફલો સ્થળ પર પહોંચ્યો હતો અને આગળની જરૂરી કાયદાકીય તપાસ હાથ ધરી હતી.
