ગુરુગ્રામ: દિલ્હી-એનસીઆર (NCR) ના પોશ વિસ્તાર ગણાતા ગુરુગ્રામના ગોલ્ફ કોર્સ રોડ પર રોડ રેજ (Road Rage) ની એક અત્યંત ચિંતાજનક અને હૃદયકંપાવનારી ઘટના સામે આવી છે. પોતાની સ્પોર્ટ્સ બાઇક પર જઈ રહેલી એક જાણીતી મહિલા રાઈડરને કારચાલકે કથિત રીતે જાણીજોઈને પાછળથી જોરદાર ટક્કર મારી દીધી હતી. ટક્કર એટલી ભયાનક હતી કે મહિલા રાઈડર રસ્તા પર ફેંકાઈ ગઈ હતી, જ્યારે તેની કિંમતી બાઈક કેટલાક મીટર સુધી રસ્તા પર ઢસડાઈ હતી. આ મામલાનો વિડીયો સોશિયલ મીડિયા પર વાયરલ થતાં જ લોકોમાં ભારે રોષ જોવા મળી રહ્યો છે અને મહિલા સુરક્ષા અંગે ગંભીર સવાલો ઊભા થયા છે.
ઇન્સ્ટાગ્રામ પર ‘rebelwheels_sia_’ નામના પેજથી જાણીતી બાઇકર સિયાએ રવિવારે પોતાના ગૃપ સાથે બાઇકિંગ દરમિયાન બનેલી આ ઘટનાનો વિડીયો શેર કર્યો હતો. સિયા તેની એપ્રિલિયા RS 457 (Aprilia RS 457) સ્પોર્ટ્સ બાઇક પર ગોલ્ફ કોર્સ રોડ પરથી પસાર થઈ રહી હતી ત્યારે એક સફેદ રંગની કારના સવાર લોકો પહેલેથી જ તેનો પીછો કરી રહ્યા હતા. કારચાલકે બાઇકની નજીક આવીને અસભ્ય અને આક્રમક વર્તન કરવાનું શરૂ કર્યું હતું. જ્યારે સિયાએ તેમને સુરક્ષિત અંતર જાળવવા વિનંતી કરી, ત્યારે કારમાં બેઠેલા લોકોએ તેને ગાડી રોકવા માટે કહ્યું હતું. ત્યારબાદ થોડી જ ક્ષણોમાં કારચાલકે ગુસ્સામાં આવી તેની બાઇકને જોરદાર ટક્કર મારી દીધી અને સ્થળ પરથી કાર લઈને ફરાર થઈ ગયો.
આ ભયાનક ઘટનાનો અનુભવ વર્ણવતા સિયાએ સોશિયલ મીડિયા પર લખ્યું કે, “મારી પાસે બોલવા માટે કશું બચ્યું નથી, પરંતુ આજે મને ગુરુગ્રામના રસ્તાઓ પર મારી સુરક્ષાને લઈને ભારે ડર અનુભવાયો છે. આવા અસામાજિક તત્વોને લોકોને ટક્કર મારીને ભાગી જવાનો કે કાયદાનો કોઈ ખોફ જ રહ્યો નથી.” આ વિડીયો વાયરલ થતાં જ ગુરુગ્રામ પોલીસ હરકતમાં આવી ગઈ છે અને કાર નંબરના આધારે તપાસ તેજ કરી છે.
બીજી તરફ, આ વાયરલ વિડીયોમાં દેખાતી સફેદ કારના મૂળ માલિક મનીષ નામના વ્યક્તિનું નિવેદન પણ સામે આવ્યું છે. મનીષે ન્યૂઝ એજન્સી સાથે વાતચીત કરતા દાવો કર્યો છે કે અકસ્માત સમયે તે પોતે કાર ચલાવી રહ્યો નહોતો. તેણે પોતાની કાર બે દિવસ પહેલા જ એક મિત્રને વાપરવા માટે આપી હતી અને તેને આ ઘટનાની જાણ સવારે વિડીયો વાયરલ થયા બાદ થઈ હતી. હાલમાં ગુરુગ્રામ પોલીસ દ્વારા ઘટનાસ્થળના સીસીટીવી ફૂટેજ ચકાસીને ગુનેગારો સુધી પહોંચવા અને કડક કાનૂની કાર્યવાહી કરવા માટે વધુ તપાસ હાથ ધરવામાં આવી છે.
