ગાંધીનગર: રાજ્યમાં ચોમાસાની ઋતુ દરમિયાન પાણીજન્ય અને મચ્છરજન્ય રોગચાળા પર મેળવેલા સફળ નિયંત્રણ બાદ હવે સીઝનલ ફ્લૂ (H1N1) સામેની આગોતરી સજ્જતાની સમીક્ષા કરવામાં આવી છે. આરોગ્ય મંત્રી પ્રફુલ પાનશેરીયાના અધ્યક્ષસ્થાને ગાંધીનગર ખાતેથી વીડિયો કોન્ફરન્સના માધ્યમથી એક ઉચ્ચસ્તરીય સમીક્ષા બેઠક યોજાઈ હતી. આ બેઠકમાં રાજ્યની તમામ સિવિલ હોસ્પિટલોના તબીબી અધિક્ષકો, મેડિકલ કોલેજોના ડિન તેમજ જિલ્લા અને મહાનગરપાલિકાઓના સિનિયર આરોગ્ય અધિકારીઓ ઉપસ્થિત રહ્યા હતા.
દર્દીઓની હાલત સામાન્ય, નાગરિકોને ન ગભરાવા અપીલ
દિલ્હી અને મુંબઈ જેવા મહાનગરોમાંથી H1N1 ના કેસો સામે આવી રહ્યા છે અને ત્યાંથી ફ્લાઇટ્સ, ટ્રેન તથા બસ માર્ગે નાગરિકોની અવરજવર સતત રહે છે. આ સ્થિતિ વચ્ચે આરોગ્ય મંત્રીએ સ્પષ્ટતા કરી હતી કે ગુજરાતમાં H1N1નો કોઈ ગંભીર ઉપદ્રવ નથી અને હાલના દર્દીઓની સ્થિતિ સામાન્ય છે. તેથી નાગરિકોએ સહેજ પણ ચિંતા કરવાની જરૂર નથી.
સરકારી હોસ્પિટલો માટે આરોગ્ય મંત્રીની મુખ્ય સૂચનાઓ
સમીક્ષા બેઠક દરમિયાન આરોગ્ય મંત્રી પ્રફુલ પાનશેરીયાએ તબીબી અધિકારીઓ અને સિવિલ તંત્રને નીચે મુજબના કડક નિર્દેશ આપ્યા હતા:
- ૨૦૧૯ની ગાઇડલાઇનનું પાલન: વર્ષ-૨૦૧૯ની H1N1 ગાઇડલાઇન મુજબ જ દર્દીઓના સેમ્પલિંગ, ટેસ્ટિંગ અને સારવારની પ્રક્રિયાનું ચોક્કસ પાલન કરવું.
- દવાઓ અને સાધનોની ઉપલબ્ધતા: તમામ સરકારી હોસ્પિટલોમાં જરૂરી દવાઓ, ઓક્સિજન અને વેન્ટિલેટરની પર્યાપ્ત સુવિધાઓ ઉપલબ્ધ રાખવી.
- ઇમરજન્સી સેવાઓ: ઇમરજન્સી વિભાગો, ડોક્ટર્સ અને નર્સિંગ સ્ટાફને જરૂરી પ્રોટોકોલ અંગે સ્પષ્ટ સૂચનાઓ આપવી.
- આંતરિક પ્રશ્નોનો ઉકેલ: ટેકનિકલ કે સ્ટાફ સંબંધિત બાબતોનો આંતરિક સ્તરે જ ત્વરિત નિકાલ કરવો જેથી દર્દીઓની સારવારમાં ખલેલ ન પહોંચે.
- સ્વચ્છતા અભિયાન: હોસ્પિટલો પરિસરમાં સફાઈ અને સ્વચ્છતાની કામગીરી વધુ મજબૂત બનાવવી.
ગુજરાતના હેલ્થ મોડલની સરાહના
| વિગત | આરોગ્ય તંત્રની કામગીરી અને સ્થિતિ |
| રોગચાળા પર નિયંત્રણ | ચોમાસા દરમિયાન ઝાડા-ઉલટી, ટાઇફોઇડ, કોલેરા, મલેરિયા, ચિકનગુનિયા અને કમળા જેવા રોગો પર સફળ નિયંત્રણ મેળવવામાં આવ્યું છે. |
| ગુજરાતનું હેલ્થ મોડલ | સરકારી હોસ્પિટલોમાં તબીબો અને સ્ટાફની નિષ્ઠાપૂર્વકની કામગીરીને કારણે ગુજરાતનું હેલ્થ મોડલ દેશભરમાં નોંધપાત્ર સ્થાન ધરાવે છે. |
| તબીબી સજ્જતા | તમામ જિલ્લાઓ અને મહાનગરપાલિકાઓનું આરોગ્ય તંત્ર કોઈપણ પરિસ્થિતિને પહોંચી વળવા સુસજ્જ છે. |
