લાઠી (અમરેલી): સમગ્ર ગુજરાતમાં જિલ્લા અને તાલુકા પંચાયતની ચૂંટણીઓનું રણશિંગું ફૂંકાઈ ગયું છે, ત્યારે અમરેલી જિલ્લાના લાઠી તાલુકામાં પણ વહીવટી તંત્ર દ્વારા ચૂંટણી પ્રક્રિયાને નિષ્પક્ષ અને શાંતિપૂર્ણ રીતે પૂર્ણ કરવા માટે તૈયારીઓ તેજ કરી દેવામાં આવી છે. આગામી ૨૬મી એપ્રિલ ૨૦૨૬ના રોજ યોજાનાર મતદાનને અનુલક્ષીને લાઠી વહીવટી માળખું અત્યારથી જ એક્શન મોડમાં જોવા મળી રહ્યું છે.
નાયબ કલેકટર દ્વારા માર્ગદર્શન અને તાલીમ
ચૂંટણી પ્રક્રિયામાં કોઈ પણ પ્રકારની કચાસ ન રહે તે હેતુથી લાઠી નાયબ કલેકટરની અધ્યક્ષતામાં એક વિશેષ તાલીમ કાર્યક્રમનું આયોજન કરવામાં આવ્યું હતું. આ તાલીમમાં મતદાન મથકની કાર્યપદ્ધતિ, મતદારોની સુવિધા અને ઇમર્જન્સી સ્થિતિમાં લેવાના થતા પગલાં અંગે વિસ્તૃત માર્ગદર્શન આપવામાં આવ્યું હતું. આ પ્રસંગે લાઠી મામલતદાર કચેરીનો સ્ટાફ, પ્રાંત કચેરીના અધિકારીઓ, નગરપાલિકાના કર્મચારીઓ તેમજ તલાટી મંત્રીઓ મોટી સંખ્યામાં ઉપસ્થિત રહ્યા હતા.
EVM અને સાધન સામગ્રી સ્ટ્રોંગ રૂમમાં સુરક્ષિત
લાઠી તાલુકા પંચાયતની ચૂંટણી માટે જરૂરી એવા ઈલેક્ટ્રોનિક વોટિંગ મશીન (EVM) અને અન્ય સાધન સામગ્રી પ્રાંત કચેરી ખાતે આવી પહોંચ્યા છે. ચૂંટણી અધિકારીની દેખરેખ હેઠળ આ તમામ સામગ્રીને અત્યંત સુરક્ષિત રીતે સ્ટ્રોંગ રૂમમાં રાખવામાં આવી છે અને ત્યાં ચુસ્ત પોલીસ પહેરો લગાવી દેવામાં આવ્યો છે.
ગામડે ગામડે મતદાન મથકોનું આયોજન
તા. ૨૬-૦૪-૨૦૨૬ના રોજ લાઠી તાલુકાના દરેક ગામડામાં મતદાન મથકો ઊભા કરવામાં આવશે. વહીવટી તંત્રનો મુખ્ય ઉદ્દેશ્ય એ છે કે મતદાનના દિવસે કોઈપણ જાતની અવ્યવસ્થા ઊભી ન થાય અને મતદારો નિર્ભય થઈને પોતાના મતાધિકારનો ઉપયોગ કરી શકે. ચૂંટણી અધિકારીએ સ્ટાફને નમ્રતાપૂર્વક અને શિસ્તબદ્ધ રીતે કામગીરી કરવા તાકીદ કરી છે.
