વડોદરા: આવતી કાલથી આધ્યાત્મિકતા અને મા શક્તિની અરાધનાના મહાપર્વ એવા પવિત્ર નવરાત્રી મહોત્સવનો પ્રારંભ થવા જઈ રહ્યો છે. આ અવસરે સંસ્કારી નગરી વડોદરા સહિત સમગ્ર રાજ્યભરમાં ઉત્સાહ અને ઉમંગનો માહોલ જોવા મળી રહ્યો છે. વડોદરા શહેરના સુપ્રસિદ્ધ અને પ્રાચીન માઈ મંદિરોમાં ભક્તોની આસ્થા અને ભક્તિભાવને ધ્યાનમાં રાખીને વિશેષ શણગાર, સુરક્ષા વ્યવસ્થા તેમજ વિવિધ સુવિધાઓ ઊભી કરવામાં આવી છે. શક્તિપીઠો અને અંબાજી મંદિરોમાં ઘટસ્થાપન અને નવરાત્રી ઉત્સવની તડામાર તૈયારીઓ આખરી તબક્કામાં પહોંચી ચૂકી છે.
વડોદરા શહેરના ઐતિહાસિક માંડવી સ્થિત અંબાજી માતાજી મંદિર, કારેલીબાગ સ્થિત બહુચરાજી મંદિર સહિતના તમામ મુખ્ય માઈ મંદિરોમાં નવરાત્રી મહોત્સવની ભવ્ય ઉજવણી માટે આયોજકો અને ટ્રસ્ટ દ્વારા તૈયારીઓ પૂર્ણ કરાઈ છે. નવરાત્રી પર્વ દરમિયાન મંદિરોમાં માઈ ભક્તોની ભારે ભીડ ઉમટી પડતી હોય છે. તેને ધ્યાનમાં રાખીને તમામ દર્શનાર્થીઓ અત્યંત સરળતાથી અને શાંતિપૂર્ણ વાતાવરણમાં મા શક્તિના દર્શન કરી શકે તે માટે દર્શન માટેની અલગ-અલગ લાઈનો, બેરિકેડ્સ અને છાંયડા સહિતના આયોજનો કરવામાં આવ્યા છે.
શહેરના મધ્યમાં આવેલા માંડવી સ્થિત અંબાજી મંદિર ખાતે ધજા-પતાકા અને રંગબેરંગી ઝળહળતી રોશનીથી આકર્ષક શણગાર કરવામાં આવ્યો છે. ઉલ્લેખનીય છે કે, વડોદરાની પ્રાચીન પરંપરા મુજબ સમગ્ર શહેરમાં માત્ર માંડવી અંબા માતાના ચોકમાં જ પરંપરાગત રીતે ‘ઓન્લી પુરુષોના ગરબા’ યોજાય છે. સેંકડો વર્ષોથી ચાલતી આ અનોખી પરંપરા મુજબ આ વર્ષે પણ અંબા માતાના ચોકમાં માત્ર પુરુષોના પ્રાચીન ગરબાની અનોખી રમઝટ જામશે, જેને જોવા માટે પણ દૂર-દૂરથી લોકો ઉમટી પડે છે. આ ગરબા મહોત્સવને લઈને મંદિર પરિસર અને ચોકમાં તમામ તૈયારીઓ આટોપી લેવામાં આવી છે.
નવરાત્રીના પાવન પર્વને પગલે માંડવી, કારેલીબાગ અને રાવપુરા સહિતના મંદિર આસપાસના પૂજાપાના બજારોમાં માતાજીની ચૂંદડી, પૂજા સામગ્રી, ગરબા (કોડિયા) અને શણગારની વસ્તુઓ ખરીદવા માટે ભક્તોની ભારે ભીડ જોવા મળી રહી છે. બીજી તરફ, સમગ્ર વડોદરા શહેરમાં નવરાત્રીનો તહેવાર શાંતિ, સલામતી અને સૌહાર્દપૂર્ણ વાતાવરણમાં ઉજવાય તે હેતુથી વડોદરા શહેર પોલીસ તંત્ર દ્વારા તમામ મુખ્ય મંદિરો અને ગરબા ગ્રાઉન્ડ્સ આસપાસ ચુસ્ત પોલીસ બંદોબસ્ત અને સીસીટીવી કેમેરાનું નેટવર્ક ગોઠવી દેવામાં આવ્યું છે.
