નડિયાદ: નડિયાદ શહેર સ્થિત અનુસૂચિત જાતિ સરકારી કન્યા છાત્રાલયમાં છેલ્લા એક અઠવાડિયાથી રાત્રિના સમયે અજાણ્યા શખ્સો દ્વારા બારી-બારણાં ખખડાવી વિદ્યાર્થીનીઓને હેરાન કરવાની ઘટનાઓ સામે આવી હતી. આ ગંભીર બાબતની નોંધ લઈને જિલ્લા વહીવટીતંત્ર અને પોલીસ તંત્ર એક્શન મોડમાં આવ્યું છે. આજે નડિયાદ SC-ST સેલના ડી.વાય.એસ.પી. કૃણાલ રાઠોડ અને અનુસૂચિત જાતિ વિભાગના નાયબ નિયામક ધવલ કરેઠાએ સંયુક્ત રીતે છાત્રાલયની મુલાકાત લીધી હતી.
સુરક્ષા વ્યવસ્થામાં કરવામાં આવ્યો નોંધપાત્ર વધારો
મુલાકાત દરમિયાન અધિકારીઓએ વિદ્યાર્થીનીઓ સાથે વ્યક્તિગત વાતચીત કરી તેમની સમસ્યાઓ સાંભળી હતી અને સુરક્ષા સુનિશ્ચિત કરવા માટે નીચે મુજબના મહત્વના નિર્ણયો લીધા છે:
નવી સુરક્ષા નિમણૂક: છાત્રાલયમાં તાત્કાલિક અસરથી બે મહિલા સિક્યુરિટી ગાર્ડની નિમણૂક કરવામાં આવી છે.
ફેન્સિંગની વ્યવસ્થા: છાત્રાલયની ૭ ફૂટ ઊંચી દીવાલ પર વધારાનું સાડા ત્રણ ફૂટનું મજબૂત ફેન્સિંગ લગાવી દેવામાં આવ્યું છે.
બાહ્ય સુરક્ષા: બે પુરુષ સિક્યુરિટી ગાર્ડ છાત્રાલયની બહારના ભાગે રહીને સતત પહેરો ભરશે.
પોલીસ પેટ્રોલિંગ: રાત્રે ૧૧ વાગ્યાથી સવારે ૬ વાગ્યા સુધી બે હોમગાર્ડ જવાન તૈનાત રહેશે અને ‘SHE’ ટીમ દ્વારા પણ નિયમિત મુલાકાત લેવામાં આવશે.
ટેકનોલોજીનો ઉપયોગ: છાત્રાલયના પાછળના ભાગે વધુ લાઈટિંગ અને નાઈટ વિઝન સીસીટીવી કેમેરા લગાવવાની કામગીરી શરૂ કરી દેવામાં આવી છે.
કડક કાર્યવાહીની ખાતરી
જિલ્લા પોલીસ અધિક્ષક વિજય પટેલના માર્ગદર્શન હેઠળ પોલીસ પોઈન્ટ ગોઠવી દેવામાં આવ્યા છે. ડી.વાય.એસ.પી. કૃણાલ રાઠોડે જણાવ્યું હતું કે, સમગ્ર ઘટનાની તપાસ ચાલુ છે અને જવાબદાર તત્વો સામે કડક કાનૂની કાર્યવાહી કરવામાં આવશે. વિદ્યાર્થીનીઓને ઇમરજન્સી હેલ્પલાઇન નંબર ૧૧૨ અને નડિયાદ પશ્ચિમ પોલીસ સ્ટેશનના સંપર્ક નંબર પણ આપી દેવામાં આવ્યા છે જેથી કોઈપણ અડચણ સમયે ત્વરિત મદદ મળી શકે.
