મધ્યપ્રદેશ: ભારતના મહત્વાકાંક્ષી ‘પ્રોજેક્ટ ચિત્તા’ માટે આજે એટલે કે 9 માર્ચ, 2026 નો દિવસ અત્યંત ગૌરવપૂર્ણ સાબિત થયો છે. મધ્યપ્રદેશના કુનો નેશનલ પાર્કમાં રહેલી નામિબિયન માદા ચિત્તા ‘જ્વાલા’એ 5 તંદુરસ્ત બચ્ચાને જન્મ આપ્યો છે. નોંધનીય છે કે ‘જ્વાલા’ ત્રીજી વખત માતા બની છે, જે આ પ્રોજેક્ટની સફળતાનો મોટો પુરાવો છે.
ભારતમાં ચિત્તાઓની સંખ્યામાં મોટો ઉછાળો
કેન્દ્રીય પર્યાવરણ અને વન મંત્રી ભૂપેન્દ્ર યાદવે આ ખુશખબર શેર કરતા જણાવ્યું હતું કે, આ નવા મહેમાનોના આગમન સાથે ભારતમાં ચિત્તાઓની કુલ સંખ્યા હવે 53 પર પહોંચી ગઈ છે. આ સાથે જ ભારતે ચિત્તા પુનઃસ્થાપન ક્ષેત્રે ‘અડધી સદી’ વટાવી દીધી છે. આ જન્મ સાથે ભારતીય ધરતી પર જન્મેલા અને જીવંત રહેલા બચ્ચાઓની કુલ સંખ્યા 33 થઈ ગઈ છે. ભારતમાં અત્યાર સુધીમાં ચિત્તાઓના 10 સફળ લીટર (બચ્ચાઓનો જન્મ) નોંધાયા છે.
નિષ્ણાતો અને વનકર્મીઓની મહેનત રંગ લાવી
આ ઐતિહાસિક સિદ્ધિ પાછળ પશુચિકિત્સકો, ફિલ્ડ સ્ટાફ અને વન્યજીવ નિષ્ણાતોની રાત-દિવસની સખત મહેનત રહેલી છે. ભૂપેન્દ્ર યાદવે આ તમામ કર્મચારીઓની કુશળતા અને પ્રતિબદ્ધતાની પ્રશંસા કરી છે. તેમણે આશા વ્યક્ત કરી હતી કે જ્વાલા અને તેના પાંચેય બચ્ચા સ્વસ્થ રહીને ભારતની ચિત્તા સંરક્ષણની ગાથાને વધુ ઊંચાઈએ લઈ જશે.
તાજેતરમાં જ દક્ષિણ આફ્રિકન ચિત્તા ‘ગામિની’એ પણ 4 બચ્ચાને જન્મ આપ્યો હતો અને ફેબ્રુઆરીમાં બોત્સ્વાનાથી પણ નવા ચિત્તાઓ લાવવામાં આવ્યા હતા. આમ, સતત વધી રહેલી સંખ્યા દર્શાવે છે કે આફ્રિકન ચિત્તાઓ ભારતના પર્યાવરણમાં ખૂબ જ સારી રીતે અનુકૂલન સાધી રહ્યા છે.
