આણંદ ભાજપનું નવું સંગઠન જાહેર: જુના જોગીઓ અને નવા ચહેરાઓનું સંતુલન

• જિલ્લા પ્રમુખ સંજય પટેલે પ્રદેશના આદેશ મુજબ ટીમ જાહેર કરી
• જગત પટેલ, પ્રવીણ વાઘેલા અને વિપુલ શાહ મહામંત્રી તરીકે નિયુક્ત
• જગત પટેલ મહામંત્રી અને સુનીલ શાહ કોષાધ્યક્ષ પદે યથાવત

આણંદ: આણંદ જિલ્લા ભારતીય જનતા પાર્ટીના સંગઠનને લઈને લાંબા સમયથી ચાલી રહેલી પ્રતીક્ષાનો અંત આવ્યો છે. ભાજપ પ્રદેશ અધ્યક્ષ જગદીશ વિશ્વકર્માની સૂચના અને માર્ગદર્શન હેઠળ, આણંદ જિલ્લા ભાજપ પ્રમુખ સંજય પટેલ દ્વારા નવા જિલ્લા સંગઠનના હોદ્દેદારો અને વિવિધ મોરચાના પ્રમુખોની સત્તાવાર જાહેરાત કરવામાં આવી છે. આ નવી ટીમમાં અનુભવી નેતાઓ અને નવા લોહીનું સંતુલન સાધવાનો પ્રયાસ કરવામાં આવ્યો છે.

મહામંત્રી અને કોષાધ્યક્ષની મહત્વની જવાબદારી

નવા માળખામાં મહામંત્રી તરીકે જગત પટેલ (આણંદ), પ્રવીણ વાઘેલા (તારાપુર) અને વિપુલ શાહ (સોજીત્રા) ની નિમણૂક કરવામાં આવી છે. જ્યારે સમગ્ર જિલ્લાના હિસાબી વ્યવહારની જવાબદારી એટલે કે કોષાધ્યક્ષ તરીકે ફરી એકવાર સુનીલ રસિકલાલ શાહ પર વિશ્વાસ મૂકવામાં આવ્યો છે. આ ઉપરાંત કાર્યાલય મંત્રી તરીકે ભાવેશ કાંતિભાઈ પટેલની વરણી કરવામાં આવી છે.

વિવિધ મોરચાના પ્રમુખોની વરણી

સંગઠનને બળ પૂરું પાડતા વિવિધ મોરચાના સુકાનીઓ પણ જાહેર કરાયા છે:

• કિસાન મોરચા: દત્તેશ અમીન (વિરસદ)
• યુવા મોરચા: ભાગ્યેશ વ્યાસ
• મહિલા મોરચા: મયુરીબેન પટેલ
• બક્ષીપંચ મોરચા: હિતેશ ભરથરી

આઈ.ટી. અને મીડિયા સેલ પર વિશેષ ધ્યાન

વર્તમાન ડિજિટલ યુગને ધ્યાને રાખીને સોશિયલ મીડિયા વિભાગના કન્વિનર તરીકે દિવ્યેશસિંહ રાજ, આઈ.ટી. વિભાગ માટે કિંજલ પટેલ અને મીડિયા વિભાગ માટે યશદીપ ગઢવીની નિમણૂક કરવામાં આવી છે.

ઉપપ્રમુખ અને મંત્રીઓની યાદી

જિલ્લા ભાજપમાં 8 ઉપપ્રમુખ અને 7 મંત્રીઓની વરણી કરવામાં આવી છે, જેમાં જિલ્લાના તમામ તાલુકાઓને પ્રતિનિધિત્વ આપવાનો પ્રયાસ કરાયો છે. ઉપપ્રમુખ તરીકે રાજ દેવીસિંહ હઠીસિંહ, દિનેશભાઈ પઢીયાર, વિમલભાઈ પટેલ, નિલેષભાઈ દવે, નિમિષાબેન ઝાલા, સુનિત પટેલ, આરતીબેન પટેલ અને શિલ્પાબેન બારોટનો સમાવેશ થાય છે. જ્યારે મંત્રી તરીકે ભાસ્કરભાઈ ગોહેલ, મિહિર રાણા, પથિક પટેલ, સુધાબેન ચૌહાણ, જોરૂભાઈ ભરવાડ, ગીતાબેન પરમાર અને એકતાબેન પંચાલને સ્થાન મળ્યું છે.