નડિયાદ: ગુજરાતમાં સ્થાનિક સ્વરાજની ચૂંટણીનો માહોલ ચરમસીમાએ પહોંચ્યો છે, ત્યારે નડિયાદ મહાનગરપાલિકાના જંગમાં પણ હવે ખરાખરીના દ્રશ્યો જોવા મળી રહ્યા છે. નડિયાદ શહેર કોંગ્રેસ પ્રમુખ હાર્દિક ભટ્ટે આજે વોર્ડ નંબર ૧૨ માંથી જનસેવાના સંકલ્પ સાથે પોતાની ઉમેદવારી નોંધાવી છે. આ પ્રસંગે કોંગ્રેસના દિગ્ગજ નેતા અને પૂર્વ કેન્દ્રીય મંત્રી દિનશા પટેલની હાજરીએ રાજકીય ગણિતોમાં નવો વળાંક લાવ્યો છે.
ભવ્ય રેલી અને જનસમર્થન
ગુરુવારે સવારે નાના કુંભનાથ રોડ સ્થિત ચૂંટણી કાર્યાલય ખાતેથી એક વિશાળ રેલીનું આયોજન કરવામાં આવ્યું હતું. આ રેલીમાં કોંગ્રેસના કાર્યકરો અને સ્થાનિક ટેકેદારો મોટી સંખ્યામાં ઉમટી પડ્યા હતા. રેલી શહેરના મુખ્ય માર્ગો જેવા કે પારસ સર્કલ, સંતરામ મંદિર, બસ સ્ટેન્ડ અને રેલવે સ્ટેશન થઈને સરદાર ભવન ખાતે સંપન્ન થઈ હતી. સમગ્ર રેલી દરમિયાન “જનતાના પ્રશ્નો, કોંગ્રેસનો સંકલ્પ” ના નારાઓથી નડિયાદ ગૂંજી ઉઠ્યું હતું.
વિજય મુહૂર્તમાં નામાંકન
રેલી બાદ હાર્દિક ભટ્ટ પોતાના મુખ્ય ટેકેદારો સાથે કલેક્ટર કચેરી પહોંચ્યા હતા. શાસ્ત્રોક્ત વિધિ મુજબ બપોરે ૧૨:૩૯ કલાકે વિજય મુહૂર્તમાં તેમણે ચૂંટણી અધિકારી સમક્ષ પોતાનું ફોર્મ રજૂ કર્યું હતું. હાર્દિક ભટ્ટ લાંબા સમયથી નડિયાદના સ્થાનિક પ્રશ્નો માટે લડત આપી રહ્યા છે, ત્યારે તેમની આ ઉમેદવારી વિરોધ પક્ષો માટે પણ ચિંતાનો વિષય બની શકે છે.
વિકાસ અને લોકપ્રશ્નોની પ્રાથમિકતા
ફોર્મ ભર્યા બાદ મીડિયા સાથે વાતચીતમાં હાર્દિક ભટ્ટે જણાવ્યું હતું કે, “વોર્ડ નંબર ૧૨ના નાગરિકોની પાયાની જરૂરિયાતો, રસ્તા, પાણી અને ગટર જેવી સમસ્યાઓનો કાયમી ઉકેલ લાવવો તે મારી પ્રથમ પ્રાથમિકતા રહેશે.” પૂર્વ કેન્દ્રીય મંત્રી દિનશા પટેલની સક્રિય હાજરીએ સાબિત કર્યું છે કે કોંગ્રેસ આ વખતે નડિયાદ કોર્પોરેશનમાં મજબૂત પકડ જમાવવાના મૂડમાં છે.
