ગાંધીનગર: હવામાન વિભાગ (IMD) દ્વારા ગુજરાતના વિવિધ વિસ્તારો માટે આગામી ૨૪ કલાક દરમિયાન ગાજવીજ, વીજળીના કડાકા-ભડાકા અને તેજ પવન સાથે વરસાદની શક્યતા વ્યક્ત કરતા ‘યલો એલર્ટ’ જારી કરવામાં આવ્યું છે. શનિવાર, ૧૯ સપ્ટેમ્બરના રોજ હવામાન વિભાગ દ્વારા જારી કરાયેલા તાજા બુલેટિન અનુસાર, રાજ્યના કેટલાક વિસ્તારોમાં સામાન્યથી મધ્યમ વરસાદી ઝાપટાં સાથે ૩૦ થી ૪૦ કિલોમીટર પ્રતિ કલાકની ઝડપે પવન ફૂંકાવાની અને વીજળી પડવાની સંભાવના છે.
મધ્ય ગુજરાતના વડોદરા અને છોટાઉદેપુરમાં અલગ-અલગ સ્થળોએ ગાજવીજ સાથે વરસાદી માહોલ રહેશે
હવામાન વિભાગના જણાવ્યા અનુસાર, પંચમહાલ, દાહોદ અને મહીસાગર સહિત મધ્ય ગુજરાતના વડોદરા અને છોટાઉદેપુરમાં અલગ-અલગ સ્થળોએ ગાજવીજ સાથે વરસાદી માહોલ રહી શકે છે. આ ઉપરાંત દક્ષિણ ગુજરાતના નર્મદા, ભરૂચ, સુરત, તાપી, ડાંગ, નવસારી અને વલસાડ જિલ્લાઓમાં તેમજ દમણ અને દાદરા નગર હવેલીના વિસ્તારોમાં પણ વીજળીના કડાકા સાથે હળવાથી મધ્યમ વરસાદની પૂરેપૂરી શક્યતા વ્યક્ત કરવામાં આવી છે.
જોકે, સમગ્ર રાજ્યની વાત કરીએ તો સાર્વત્રિક અને ભારે વરસાદની તીવ્રતામાં હવે ઘટાડો નોંધાયો છે. આગામી સાત દિવસ એટલે કે ૨૫ સપ્ટેમ્બર સુધી રાજ્યમાં ક્યાંય પણ અત્યંત ભારે વરસાદની કોઈ ચેતવણી કે આગાહી નથી. હવામાન વિભાગે વધુમાં જણાવ્યું હતું કે વિતેલા ૨૪ કલાક દરમિયાન દક્ષિણપશ્ચિમ ચોમાસું ગુજરાત પર સક્રિય રહ્યું હતું, જેમાં ગીર સોમનાથના અલગ-અલગ વિસ્તારોમાં ૭ થી ૧૧ સેન્ટીમીટર જેટલો ભારે વરસાદ નોંધાયો છે.
અમદાવાદ શહેર અને તેની આસપાસના વિસ્તારો માટે હવામાન વિભાગે આગાહી કરી છે કે રવિવારની સવાર સુધી વાદળછાયું વાતાવરણ રહેશે અને એક કે બે વાર ગાજવીજ સાથે વરસાદી ઝાપટું પડી શકે છે. વાવાઝોડા અને વીજળીના કડાકા દરમિયાન નાગરિકોને સલામત સ્થળે રહેવા, વૃક્ષો નીચે આશ્રય ન લેવા, ઈલેક્ટ્રિક ઉપકરણો અનપ્લગ કરવા તેમજ જળાશયો અને વીજળીના વાહક પદાર્થોથી દૂર રહેવાની ખાસ સલાહ આપવામાં આવી છે.
