વડોદરા: ગુજરાત સ્થાનિક સ્વરાજની ચૂંટણી 2026 માટે ભારતીય જનતા પાર્ટીએ વડોદરા મહાનગરપાલિકા (VMC) ના ઉમેદવારોની સત્તાવાર યાદી જાહેર કરી દીધી છે. આ યાદીમાં સૌથી ચોંકાવનારો નિર્ણય વર્તમાન હોદ્દેદારોને લઈને લેવામાં આવ્યો છે. વડોદરાના વર્તમાન મેયર પિંકીબેન સોની અને સ્ટેન્ડિંગ કમિટીના ચેરમેન ડૉ. શીતલ મિસ્ત્રીની ટિકિટ કાપી નાખવામાં આવી છે. ભાજપના આ આક્રમક નિર્ણયથી સ્થાનિક રાજકારણમાં મોટો ગરમાવો આવી ગયો છે.
નવા ચહેરાઓને મહત્વ, જૂના જોગીઓ આઉટ
પ્રદેશ ભાજપ અધ્યક્ષ જગદીશ વિશ્વકર્માની અધ્યક્ષતામાં મળેલી બેઠક બાદ જાહેર કરાયેલી યાદીમાં વડોદરાના અનેક પૂર્વ કાઉન્સિલરો અને દિગ્ગજોના પત્તા કપાયા છે. પક્ષે આ વખતે ‘નવા ચહેરા’ અને ‘યુવા જોશ’ પર પસંદગીનો કળશ ઢોળ્યો છે. મેયર પિંકી સોની જે વોર્ડમાંથી પ્રતિનિધિત્વ કરતા હતા ત્યાં હવે નવા ઉમેદવારને તક આપવામાં આવી છે. તેવી જ રીતે, વહીવટી પાંખના શક્તિશાળી ગણાતા શીતલ મિસ્ત્રીને પણ ટિકિટ ન મળતા અનેક તર્ક-વિતર્ક સર્જાયા છે.
યાદીના મુખ્ય અંશો
જાહેર થયેલી યાદી મુજબ વડોદરાના 19 વોર્ડ માટે ઉમેદવારો નક્કી કરવામાં આવ્યા છે.
શું આ ‘નો-રિપીટ’ થીયરીનો સંકેત છે?
રાજકીય વિશ્લેષકોના મતે, વડોદરામાં મેયર અને સ્ટેન્ડિંગ ચેરમેન જેવા ઉચ્ચ હોદ્દા ધરાવતા નેતાઓની ટિકિટ કાપવી એ સ્પષ્ટ સંકેત છે કે ભાજપ સત્તા વિરોધી લહેરને ખાળવા માટે સંપૂર્ણપણે નવા ચહેરાઓ સાથે મેદાને ઉતરી રહ્યું છે. આ નિર્ણયને કારણે પક્ષમાં આંતરિક અસંતોષ ઉભો થાય છે કે શિસ્તબદ્ધ કાર્યકરો પક્ષના નિર્ણયને સ્વીકારે છે તે જોવું રસપ્રદ રહેશે. આગામી 26 એપ્રિલે યોજાનારા મતદાનમાં વડોદરાની જનતા ભાજપના આ ‘નવા પ્રયોગ’ને કેટલો આવકારે છે તેના પર સૌની નજર રહેશે.
