વડોદરા: વડોદરા શહેરના ઝોન-૨ લોકલ ક્રાઈમ બ્રાન્ચ (LCB)ની ટીમે રાત્રીના સમયે બંધ દુકાનોના તાળા તોડી ચોરી કરતી એક રીઢા આરોપીને ઝડપી પાડી મોટી સફળતા મેળવી છે. પોલીસને આ આરોપી પાસેથી ચોરી કરેલો રૂ. ૧.૩૫ લાખનો મુદ્દામાલ, જેમાં રોકડ રકમનો પણ સમાવેશ થાય છે, તે ઉપરાંત એક એક્ટિવા અને એક મોબાઈલ ફોન સહિત કુલ રૂ. ૨.૦૪ લાખનો મુદ્દામાલ કબજે કર્યો છે. આ આરોપી છેલ્લા એક મહિનાથી શહેરમાં અનેક દુકાનોમાં ચોરી અને એક વાહન ચોરીની ઘટનાને અંજામ આપી રહ્યો હતો.
પોલીસને ગુપ્ત બાતમી મળી હતી કે એક શખ્સ ક્રીમ કલરના ચેક્સ શર્ટ અને બ્લુ જીન્સ પહેરીને કાળા કલરના એક્ટિવા પર ફરે છે, જે રાત્રે દુકાનોમાં ચોરી કરે છે અને હાલ તે અકોટા બ્રિજ નીચે ઊભો છે. આ બાતમીના આધારે, ઝોન-૨ એલસીબીની ટીમે ત્વરિત કાર્યવાહી હાથ ધરી હતી અને આરોપીને ચોરીના મુદ્દામાલ સાથે રંગેહાથ ઝડપી પાડ્યો હતો.
પકડાયેલા આરોપીની ઓળખ સયાજીગંજ વિસ્તારની ભાથુજીનગર ઝૂંપડપટ્ટીમાં રહેતા અંકીત રમણભાઈ પાટણવાડીયા તરીકે થઈ છે. પોલીસે તેની પૂછપરછ હાથ ધરીને વધુ ગુનાઓની માહિતી મેળવવાનો પ્રયાસ કરી રહી છે. આ ધરપકડ બાદ આરોપીને કાયદેસરની કાર્યવાહી માટે અકોટા પોલીસ સ્ટેશનને સોંપવામાં આવ્યો છે.
પોલીસનું માનવું છે કે આ રીઢા ચોરની ધરપકડથી શહેરમાં વધી રહેલી ઘરફોડ ચોરીની ઘટનાઓ પર લગામ લાગશે અને નાગરિકોમાં સુરક્ષાની ભાવના વધશે.
