ગુજરાતની ઉભરતી અને તેજસ્વી સ્પ્રિન્ટર કાજલ વાજાએ ફરી એકવાર વૈશ્વિક મંચ પર સાબિત કરી બતાવ્યું છે કે જો મનમાં દૃઢ નિશ્ચય, શિસ્ત અને અથાક મહેનત કરવાનો જુસ્સો હોય, તો સામાન્ય પરિવારમાંથી આવતી પ્રતિભાઓ પણ તમામ આર્થિક પડકારોને માત આપીને આંતરરાષ્ટ્રીય સ્તરે દેશનો તિરંગો લહેરાવી શકે છે. જૂનાગઢ જિલ્લાના દરિયાકાંઠાના ચોરવાડ ગામની ૧૯ વર્ષીય દીકરી કાજલે રવિવારે હોંગકોંગ ખાતે યોજાયેલી ૨૨મી એશિયન અંડર-૨૦ એથ્લેટિક્સ ચેમ્પિયનશિપમાં (Asian Under-20 Athletics Championship) મહિલાઓની 4×100 મીટર રિલે સ્પર્ધામાં ભારતને રજત ચંદ્રક (સિલ્વર મેડલ) અપાવવામાં અત્યંત મહત્વપૂર્ણ અને ઐતિહાસિક ભૂમિકા ભજવી છે.
૧૨મું ધોરણ ડ્રોપ કરીને કરી હતી તૈયારી, ભારતીય ટીમે તોડ્યો જૂનો નેશનલ રેકોર્ડ
ટ્રેક પર ભારતનું નામ રોશન કરવા અને સર્વશ્રેષ્ઠ પ્રદર્શન કરવા માટે કાજલે આ વર્ષે પોતાના શિક્ષણમાં ધોરણ-૧૨ની બોર્ડ પરીક્ષામાં એક વર્ષનો ડ્રોપ લીધો હતો અને તાલીમ પાછળ પોતાની જાત ઝોંકી દીધી હતી. તેની આ આકરી નિષ્ઠા અને ત્યાગનું ફળ આજે દેશને મળ્યું છે. હોંગકોંગની આ સ્પર્ધામાં કાજલે તમિલનાડુની ભાવના, હરિયાણાની આરતી અને ઉત્તર પ્રદેશની નિપમ સાથે મળીને ભારતીય ટીમનું પ્રતિનિધિત્વ કર્યું હતું.
આ ચારેય યુવા સ્પ્રિન્ટર્સે મેદાન પર અદભુત ટીમવર્ક, સ્પીડ અને શ્રેષ્ઠ બેટન એક્સચેન્જનું પ્રદર્શન કરીને માત્ર ૪૫.૦૫ સેકન્ડનો રેકોર્ડબ્રેક સમય નોંધાવ્યો હતો. આ પ્રદર્શન સાથે ભારતીય ટીમે રજત ચંદ્રક જીતવાની સાથે અંડર-૨૦ વર્ગમાં અગાઉનો ૪૫.૦૮ સેકન્ડનો નેશનલ રેકોર્ડ તોડીને એક નવો રાષ્ટ્રીય રેકોર્ડ પણ સ્થાપિત કર્યો છે.
આર્થિક તંગી પણ સપના આડે ન આવી, પિતા કરે છે ખેત મજૂરી
કાજલની આ આંતરરાષ્ટ્રીય સિદ્ધિ તેની સામાન્ય આર્થિક પૃષ્ઠભૂમિને જોતાં અન્ય યુવા રમતવીરો માટે ભારે પ્રેરણાદાયી બની જાય છે. તેના પિતા હીરાભાઈ વાજા જૂનાગઢ જિલ્લાના દરિયાકાંઠાના ચોરવાડ ગામના એક સામાન્ય ખેડૂત છે અને પરિવારનું ગુજરાન ચલાવવા માટે ખેત મજૂરી કરે છે. આર્થિક સંકડાશ હોવા છતાં, પિતાએ કાજલની રમતગમત કારકિર્દી આડે ક્યારેય મુશ્કેલી આવવા દીધી નથી અને કાજલે પણ પોતાના સપના સાકાર કરવા માટે દિવસ-રાત એક કર્યા છે.
કાજલના કોચ શિવમ ઉપાધ્યાયે તેની સફળતા વિશે ગૌરવપૂર્વક જણાવ્યું કે, “કાજલ દેશની સૌથી આશાસ્પદ યુવા સ્પ્રિન્ટર્સમાંની એક છે. ૧૦૦ મીટર, ૨૦૦ મીટર અને રિલે સ્પર્ધાઓમાં તેણે અગાઉ પણ અનેક મેડલ્સ જીત્યા છે. તેની શિસ્ત, ગજબનો આત્મવિશ્વાસ અને સ્પર્ધાત્મક માનસિકતા તેને અન્ય ખેલાડીઓથી અલગ પાડે છે.” કાજલના પારિવારિક સ્નેહી મંથન ડાભીએ પણ ઉમેર્યું કે કાજલને શાળા સમયથી જ રમતગમત પ્રત્યે વિશેષ લગાવ હતો.
મેડલ્સ અને રાષ્ટ્રીય રેકોર્ડ્સની વણઝાર
હોંગકોંગમાં જીતેલો સિલ્વર મેડલ એ કાજલની અદભુત સિદ્ધિઓની યાદીમાં વધુ એક છોગું છે.
- ૨૦૨૫ (રાંચી): દક્ષિણ એશિયન સિનિયર એથ્લેટિક્સ ચેમ્પિયનશિપની 4×100 મીટર રિલેમાં સિલ્વર મેડલ જીત્યો હતો.
- માર્ચ ૨૦૨૬ (ભુવનેશ્વર): પ્રથમ ઇન્ડોર ઓપન એથ્લેટિક્સ ચેમ્પિયનશિપમાં ૬૦ મીટર દોડમાં માત્ર ૭.૫૦ સેકન્ડનો સમય નોંધાવીને ગોલ્ડ મેડલ જીત્યો અને અંડર-૨૦ વર્ગનો નવો નેશનલ રેકોર્ડ પણ પોતાના નામે કર્યો હતો.
શાળાથી શરૂ થયેલી સફર હાઈ-પરફોર્મન્સ સેન્ટર સુધી પહોંચી
કાજલની આ લાંબી સફર ગુજરાત રાજ્યના સ્પોર્ટ્સ ઓથોરિટી ઓફ ગુજરાત (SAG) ના સ્કૂલ પ્રોગ્રામથી શરૂ થઈ હતી. ત્યારબાદ ૨૦૧૯ માં તે કોડીનાર સ્થિત જિલ્લા કક્ષાની સ્પોર્ટ્સ સ્કૂલ (DLSS) માં જોડાઈ, જ્યાં તેની દોડવાની પ્રતિભાને યોગ્ય આકાર મળ્યો. તેની અસાધારણ ક્ષમતાને ધ્યાને રાખીને ૨૦૨૩ માં તેની પસંદગી નડિયાદ સ્થિત પ્રતિષ્ઠિત ‘હાઈ-પરફોર્મન્સ સેન્ટર’ (HPC) માટે કરવામાં આવી હતી, જ્યાં તે હાલમાં દેશના શ્રેષ્ઠ કોચિંગ હેઠળ અદ્યતન તાલીમ મેળવી રહી છે.
વાપીના રાહુલ જાખરે ડેકાથ્લોનમાં ગોલ્ડ જીત્યો, હર્ષ સંઘવીએ પાઠવ્યા અભિનંદન
આ જ ઇન્ટરનેશનલ ચેમ્પિયનશિપમાં ગુજરાત માટે બમણી ખુશીના સમાચાર એ આવ્યા છે કે, વલસાડ જિલ્લાના વાપીના વતની રાહુલ જાખરે ડેકાથ્લોન (Decathlon) સ્પર્ધામાં નવો રાષ્ટ્રીય રેકોર્ડ સ્થાપીને ભારત માટે સુવર્ણ ચંદ્રક (ગોલ્ડ મેડલ) જીત્યો છે.
ગુજરાતના આ બંને યુવા સ્ટાર્સની વૈશ્વિક સિદ્ધિ બદલ રાજ્યના ગૃહ અને રમતગમત મંત્રી હર્ષ સંઘવીએ કાજલ વાજા, રાહુલ જાખર અને ભારતીય રિલે ટીમને ટ્વિટર (X) ના માધ્યમથી વિશેષ અભિનંદન પાઠવ્યા છે. તેમણે જણાવ્યું કે, “મુખ્યમંત્રી ભૂપેન્દ્ર પટેલના નેતૃત્વ હેઠળ રાજ્ય સરકાર ગુજરાતના ઉભરતા ખેલાડીઓને તેમના વૈશ્વિક સપનાઓ સાકાર કરવા માટે તમામ આધુનિક સુવિધાઓ અને આર્થિક પ્રોત્સાહન પૂરી પાડવા કટિબદ્ધ છે. કાજલ અને રાહુલની આ સિદ્ધિ ગુજરાત અને સમગ્ર દેશ માટે અત્યંત ગૌરવની ક્ષણ છે.”
