આણંદ: આંતરરાષ્ટ્રીય મહિલા દિવસની રાજ્ય કક્ષાની ઉજવણી પ્રસંગે આણંદ જિલ્લાના ફાળે એક મોટું ગૌરવ આવ્યું છે. જિલ્લાના અડાસ ગામના વતની અને જાણીતા સામાજિક કાર્યકર ડો. હંસા કુંવરબા રાજને તેમની મહિલા ઉત્કર્ષની પ્રવૃત્તિઓ માટે રાજ્યના મુખ્યમંત્રી ભૂપેન્દ્ર પટેલના હસ્તે ‘રાજ્ય મહિલા વિકાસ પુરસ્કાર’ એનાયત કરવામાં આવ્યો છે. આ પ્રસંગે મહિલા અને બાળ કલ્યાણ મંત્રી મનીષાબેન વકીલ પણ ખાસ ઉપસ્થિત રહ્યા હતા.
દીકરીઓનું શિક્ષણ અને આત્મનિર્ભરતા પર ભાર
ડો. હંસા કુંવરબા રાજે ગ્રામીણ ક્ષેત્રે મહિલાઓને આર્થિક રીતે સધ્ધર બનાવવા માટે પાયાનું કામ કર્યું છે. તેમણે ખાસ કરીને દીકરીઓ અધવચ્ચેથી અભ્યાસ ન છોડે તે માટે વાલીઓમાં જાગૃતિ લાવવાનું કાર્ય કર્યું હતું. આ સાથે મહિલાઓને સ્વરોજગારના વિવિધ આયામો સાથે જોડી તેમને આર્થિક પગભર બનાવવા માટેના પ્રયાસો કર્યા છે. તેમજ રાજ્ય સરકારની વિવિધ કલ્યાણકારી યોજનાઓ છેવાડાના ગામડાની મહિલાઓ સુધી પહોંચાડવામાં તેઓ સેતુ સમાન બન્યા છે.
તૂટતા પરિવારોને બચાવવાનું ભગીરથ કાર્ય
તેમના કાર્યની સૌથી નોંધપાત્ર બાબત કુટુંબ વ્યવસ્થા જાળવી રાખવાની રહી છે. આજના સમયમાં જ્યારે વિભક્ત કુટુંબોનું પ્રમાણ વધી રહ્યું છે, ત્યારે ડો. હંસા કુંવરબાએ સંયુક્ત કુટુંબની ભાવના જાળવી રાખવા માટે અથાક પ્રયત્નો કર્યા છે. તેમણે પતિ-પત્ની વચ્ચેના વિખવાદોમાં મધ્યસ્થી કરી, છૂટાછેડાના કિસ્સાઓ અટકાવવા અને પરિવારોને વિખરાતા બચાવવામાં મોટું પ્રદાન આપ્યું છે.
મંત્રીઓ અને આગેવાનો દ્વારા શુભેચ્છાઓનો વરસાદ
આ ગૌરવપૂર્ણ સિદ્ધિ બદલ ડો. હંસા કુંવરબા રાજને અનેક મહાનુભાવોએ શુભેચ્છાઓ પાઠવી છે. જેમાં અન્ન અને નાગરિક પુરવઠા મંત્રી રમણ પટેલ, નાણાં રાજ્ય મંત્રી કમલેશ પટેલ, સાંસદ મિતેશ પટેલ અને જિલ્લા પંચાયત પ્રમુખ હસમુખ પટેલ અને જિલ્લા ભાજપ અગ્રણી સંજય પટેલનો સમાવેશ થાય છે. આ પુરસ્કાર મળતા જ અડાસ ગામ સહિત સમગ્ર આણંદ જિલ્લામાં હર્ષની લાગણી ફેલાઈ છે. ડો. હંસા કુંવરબાની આ સિદ્ધિ અન્ય મહિલાઓ માટે પણ પ્રેરણારૂપ બની રહેશે.
