સરકારી નોકરીના ઇન્ટરવ્યુનું નામ પડે એટલે સામાન્ય રીતે સુટ-બૂટ, ટાઈ અને ચમકતા ફોર્મલ શૂઝ પહેરેલા ઉમેદવારોનું ચિત્ર મનમાં સ્પષ્ટ થઈ જાય છે. પરંતુ દક્ષિણ કોરિયાના પર્સનલ મેનેજમેન્ટ મંત્રાલયે (Ministry of Personnel Management) આ સદીઓ જૂની પરંપરાને સંપૂર્ણપણે બદલી નાખતો એક ક્રાંતિકારી નિર્ણય લીધો છે. દક્ષિણ કોરિયા સરકારે સરકારી સિવિલ સર્વિસના ઇન્ટરવ્યુમાં જીન્સ અને સ્નીકર્સ (કેઝ્યુઅલ શૂઝ) પહેરીને આવવાની સત્તાવાર મંજૂરી આપી દીધી છે, જ્યારે નેકટાઈ અને ફોર્મલ ડ્રેસ શૂઝ (હાર્ડ સોલવાળા ચમકતા બૂટ) પર કડક પ્રતિબંધ લગાવી દીધો છે. ઓક્ટોબર ૨૦૨૬ થી યોજનારી તમામ સરકારી ભરતી ઇન્ટરવ્યુમાં આ નવો ડ્રેસ કોડ અમલી બનશે.
મંત્રાલય દ્વારા રાષ્ટ્રીય ભરતી પોર્ટલ પર જાહેર કરાયેલી માર્ગદર્શિકા મુજબ, પુરુષ અને મહિલા બંને ઉમેદવારોને પરંપરાગત ઔપચારિક સૂટ (Formal Suits) ન પહેરવા માટે ખાસ અપીલ કરવામાં આવી છે. નવા નિયમો હેઠળ ઉમેદવારો જીન્સ, કોટન પેન્ટ્સ, સ્લેક્સ, નીટવેર, જેકેટ્સ, શર્ટ અને સ્નીકર્સ પહેરીને ઇન્ટરવ્યુ આપી શકશે. જોકે, સ્પોર્ટ્સ વેર, હાઇકિંગ કપડાં, શોર્ટ્સ, સ્લીવલેસ ટોપ્સ, હાઈ હિલ્સ અને સ્લીપર્સ પર મનાઈ ફરમાવવામાં આવી છે. આ નિર્ણય પાછળનો મુખ્ય હેતુ નોકરી ઇચ્છુક યુવાનો પરથી આર્થિક બોજ ઘટાડવાનો અને ઇન્ટરવ્યુ દરમિયાન તણાવમુક્ત વાતાવરણ પૂરું પાડવાનો છે.
આ નિર્ણયમાં ખાસ ધ્યાન ખેંચનારી બાબત એ છે કે ટાઈ અને ફોર્મલ શૂઝ પર મૂકાયેલો પ્રતિબંધ. જો કોઈ ઉમેદવાર ટાઈ પહેરીને આવશે, તો તેને ઇન્ટરવ્યુ રૂમમાં પ્રવેશતા પહેલા ટાઈ ઉતારી લેવા માટે કહેવામાં આવશે. તેવી જ રીતે, જો કોઈ ઉમેદવાર ફોર્મલ ડ્રેસ શૂઝ પહેરીને આવશે, તો તેના બૂટ પર કાપડના સ્લીપ-ઓન શૂ કવર પહેરાવવામાં આવશે. આ પાછળ એક વ્યવહારુ કારણ પણ છે; કડક સોલ વાળા ફોર્મલ શૂઝના કારણે હોલવેમાં થતો ‘ટપ-ટપ’ અવાજ પરીક્ષા અને ઇન્ટરવ્યુ લેતા અધિકારીઓ માટે ભારે વિક્ષેપ ઊભો કરતો હતો.
દક્ષિણ કોરિયામાં વર્ષ ૨૦૧૬ થી જ ઉમેદવારોને સરળ કપડાં પહેરવાની અનૌપચારિક સલાહ આપવામાં આવતી હતી, પરંતુ ગેરફાયદો થવાના ભયથી મોટાભાગના યુવાનો મોંઘા ફોર્મલ સૂટ ખરીદીને જ ઇન્ટરવ્યુ આપવા જતા હતા. હવે આ માનસિકતા બદલવા માટે મંત્રાલયે એઆઈ (AI) દ્વારા જનરેટ કરાયેલી સ્વીકાર્ય કેઝ્યુઅલ કપડાંની તસવીરો પણ જાહેર કરી છે. આ જ સરળ ડ્રેસ કોડ ઇન્ટરવ્યુ લેનાર પેનલના અધિકારીઓ પર પણ લાગુ થશે. સોશિયલ મીડિયા પર આ નિર્ણયના મિશ્ર પ્રતિસાદ મળ્યા છે, જ્યાં મોટાભાગના યુવાનોએ મોંઘા સૂટના ખર્ચમાંથી મુક્તિ મળવા બદલ આ નિર્ણયને વધાવી લીધો છે.
